2014 ԹՎԱԿԱՆԸ ՍԱՀՅԱՆԱԿԱՆ ՊՈԵԶԻԱՅԻ ՏԱՐԻ

Արխիվ 12-16 15 Ապրիլ, 2014 19:26

2014 ԹՎԱԿԱՆԸ ՍԱՀՅԱՆԱԿԱՆ ՊՈԵԶԻԱՅԻ ՏԱՐԻ

Հայ մեծանուն բանաստեղծ ՀԱՄՈ ՍԱՀՅԱՆԻ 100-ամյակին նվիրված միջոցառումները շարունակվում են: Սկսած բանաստեղի ծննդյան օրից` ապրիլի 14-ից ամենուրեք թևածում է սահյանական շունչը, ամենուրեք հնչում են երգեր` Սահյանի բառերով: Ապրիլի 15-ին Ալ.Սպենդիարյանի անվան ազգային ակադեմիական թատրոնում տեղի ունեցավ հերթական միջոցառումը` համերգային ծրագիր նվիրված անվանի բանաստեղի 100-ամյակին: Լեփ-լեցուն դահլիճում Սահյանի մասին պատմող կարճ ֆիլմերը ընդմիջվում էին նրա բանաստեղծությունների ներկայացմամբ, երեկոյին հանդիսատեսը մեկ անգամ ևս զմայլվեց Սահյանի խոսքերով գրված երգերով: Հրապարակախոս Մերուժան Տեր-Գուլանյանը, անվանի կոմպոզիտոր Տիգրան Մանսուրյանը և ՀՀ գրողների Միության նախագահ Էդուարդ Միլիտոնյանը դահլիճից հնչեցրեցին խոսքեր` բանաստեղծությունների տեսքով: Մերուժան Տեր-Գուլանյանը նաև երգեց, քանի որ Սահյանը նրա խոսքով` շատ է սիրել երբ ինքը երգել է: «Մեր հայ ազգային մշակույթը հարուստ մշակույթ է, բոլորը թող գան ու սովորեն հայ ճարտարապետությունը և արվեստի մյուս ճյուղերը: Մենք հայերս միշտ միասնական ազգ ենք եղել և օտարները աշխատել են խարխլել մեր միասնականությունը, պատմական հիշողությունը և միտքը»,-զրույցներից մեկում այսպես է բնորոշում հայ մշակույթը և ազգին Համո Սահյանը:

Բանաստեղծի 100-ամյա հոբելյանին նվիրված միջոցառմանը ներկա էր ՀՀ նախագահ Սերժ Սարգսյանը, ՀՀ մշակույթի նախարարի պաշտոնակատար Հասմիկ Պողոսյանը, Սահյանի հարզատներն ու մշակույթի անվանի գործիչներ:

Նշենք, որ Համո Սահյանի ծննդավայր՝ Լոր գյուղում գտնվող նրա տունը, կվերակառուցվի և կվերածվի թանգարանի, որտեղ կպահպանվեն գրողի թողած ժառանգությունը: Տուն-թանգարանի բակում կտեղադրվի նաև Սահյանի կիսանդրին: «Համո Սահյան» գիտամշակութային կենտրոնի տնօրեն Շչորս Դավթյանի խոսքով` տուն-թանգարանի վերակառուցելու հետո այնտեղ կբացվի ցուցադրություն, որտեղ տեղ կգտնեն նաև վերջինիս մոտ պահված Համո Սահյանի մի քանի ձեռագրեր, գրքեր և այլ իրեր:

ԶՎԱՐԹ ԽԱՉԱՏՐՅԱՆ