ԷԴՈՒԱՐԴ ՍԵԴՐԱԿՅԱՆ. «ՍՏԵՂԾԱԳՈՐԾՈՂ ՄԱՐԴԸ ՄԻՇՏ ԷԼ ՍՏԵՂԾԱԳՈՐԾԵԼՈՒ ՀԱՄԱՐ ԺԱՄԱՆԱԿ ԿԳՏՆԻ»

ԷԴՈՒԱՐԴ ՍԵԴՐԱԿՅԱՆ. «ՍՏԵՂԾԱԳՈՐԾՈՂ ՄԱՐԴԸ ՄԻՇՏ ԷԼ ՍՏԵՂԾԱԳՈՐԾԵԼՈՒ ՀԱՄԱՐ ԺԱՄԱՆԱԿ ԿԳՏՆԻ»

Օրերս Գեղեցիկ արվեստների ազգային ակադեմիայի հիմնադիր-ռեկտոր, ՀՀ նկարիչների միության անդամ, գեղանկարիչ Էդուարդ Սեդրակյանը դարձավ 70 տարեկան: Հոբելյանի առիթով, Սեդրակյանի հիմնադրած բուհի ուսանողները կազմակերպել էին միջոցառում` ներկայացնելով Սեդրակյանի կյանքի, գործունեության կարևոր և հիշարժան դրվագները: Միջոցառմանը ներկա էին Սեդրակյանի հարազատներ, ընկերներ, գործընկերներ և տարբեր տարիներին բուհն ավարտած ուսանողներ:

«Իրավունքը» ևս շնորհավորելով ԷԴՈՒԱՐԴ ՍԵԴՐԱԿՅԱՆԻ 70-ամյակը գեղանկարչի հետ զրուցեց նրա ձեռքբերումների, հիմնադրած բուհի և ցուցահանդեսների մասին:

«Ձեռքբերուներ շատ են եղել, օրինակ, կայուն և լավ ընտանիք ունենալը` լավ զավակներ, ովքեր ունեն իրենց ընտանիքը, զավակները և ապրում են ակտիվ ստեղծագործական կյանքով, դա արդեն ինձ համար ձեռքբերում է: Իհարկե, ձեռքբերում է նաև իմ ամբողջ ստեղծագործական անցած ուղին, այսպես ասելով թվում է` սա իմ ստեղծագործական կյանքի ավարտն է, սակայն ավատը չէ, քանի որ այդ ամբողջ ճանապարհին կան ձեռքբերումներ: Ի վերջո, այն ճանապարհը, որն անցել եմ իր ամբողջ հարթություններով և դժվարություններով, բացի այն, որ հետաքրքիր է դարձրել իմ ստեղծագործական կյանքը, այլև` ամբողջ այդ ընթացքում սկսել եմ վերանայել իմ աշխատանքը` լավը վատից զատելով: Իմ ողջ ստեղծագործական կյանքը եղել է ակտիվ, սա նույնպես ինձ համար ձեռքբերում է: Ես էությամբ ակտիվ մարդ եմ և միշտ աշխատում եմ ինձ համար նոր մի աշխատանք ստեղծել, նոր բարդության մեջ մտնել: 1996 թվականին, երբ ստեղծեցի Գեղեցիկ արվեստների ազգային ակադմիան գտնվում էի բուռն ստեղծագործական և մանկավարժական գործունեության մեջ, սակայն ինձ ինչ-որ բան էր պակասում, հոգու այդ բացը լրացրեցի ստեղծելով ակադեմիան»:

Գեղանկարչի համար լուրջ ձեռքբերում է նաև իր վերջերս հիմնադրած «Հայ կիրառական արվեստների և դիզայնի միավորում» հասարակական կազմակերպությունը, որտեղ այժմ ընթանում են աշխատանքեր, որպեսզի հետագայում հանրությանը ներկայանան կայուն միության կարգավիճակով` միություն, որը զբաղվում է իրեն թողած ժառանգությամբ:Միության նպատական է հայ կիրառական արվեստը և դիզայնը առաջ տանել և նրան բերել համաշխարհային ճանաչում: «Պետք է ձգտել լավին և ձգտման այդ ճանապարհին նորանոր բարձունքներ նվաճել: Իմ կյանքում չի եղել մի դեպք, որ ես ասեմ սա դժվար է, սա բարդ է, ես միշտ կատարում եմ աշխատանքը` անընդատ խնդիրը բարդացնելով, որի վառ ապացույցն է ակադեմիայի ստեղծումը և բարձր որակի հասցնելը: Մեծ նվիրման ու տքնաջան աշխատանքի արդյունքում է, որ ակադեմիայի սաները տոնել են բազում հաղթանակներ` մասնակցելով բազմաթիվ հանրապետական և միջազգային փառատոների»,-նշում է ԷԴՈՒԱՐԴ ՍԵԴՐԱԿՅԱՆԸ:

- Բուհ ղեկավարելը արդյո՞ք չի խանգարում Ձեր ստեղծագործական գործունեությանը:

- Իհարկե կան նկարիչներ, արվեստագետներ, ովքեր ասում են, թե մանկավարժությունը խանգարում է իրենց ստեղծագործել: Անշուշտ, այս մտքի հետ ես համամիտ չեմ, կարող եմ անգամ ասել, որ ինձ օգնում է, մի պարզ պատճառով` մենք սովորեցնելով սովորում ենք: Սովորում ենք երիտասարդներից, ովքեր թարմ ուղեղներ են: Նրանք այսօր ավելի շատ տեղեկություններ ունեն, ամբողջ աշխարհը նրանց աչքերի առջև է: Երիտասարդների հետ շփումը բերում է բոլորովին նոր մտքեր` մենք թարմ ենք մնում մտքով, ինչու չէ, նաև տեսքով: Ստեղծագործող մարդը միշտ էլ ստեղծագործելու համար ժամանակ կգտնի, եթե ասելիք կա ապա ինչ- որ ժամանակ այն ասվում է, ոչինչ չի կարող խանգարել:

- Վերջին անհատական ցուցահանդեսի ժամանակ նշեցիք, որ Ձեր հոբելյարի հետ կապված արվեստասեր հասարակությանը կրկին կներկայանաք ցուցահանդեսով:

- Կարծում եմ մինչև տարվա վերջ կլինի իմ հերթական ցուցահանդեսը: Գործերը շատ են, նախապատրաստվում եմ հետաքրքիր ընտրություն կատարել, որպեսզի այդ ցուցահանդեսին ներկայանամ ուրիշ խոսքով:

- Բոլոր նկարներում գերիշխում են կապույտը և մանուշակագույնը, իսկ ի՞նչ գույներով կներկեյիք 70 տարիների ապրած ձեր կյանքի օրերը:

- Այդ գույների ընտրությունը հատուկ արված չէ, քանի որ գույնը տեսնում եմ ու զգում: Նկարելուց երբեք չես մտածում ինչ գույն վերցնել, սա գալիս է ուրիշ տեղից, որը չես կարող իմանալ` ուրիշ թելադրանք է: Անում ես այն, ինչ տեսնում ես, չեմ ուզում որևէ գույնի նեղացնել, բայց նկարներում կապույտը և մանուշակագույնն, իրոք գերիշխող են: Չգիտեմ, գուցե սա ինչ-որ բան ասում է իմ ներաշխարհի մասին: Կյանքիս օրերը բոլոր գույներով էլ կներկեմ, քանի որ յուրաքանչյուր գույն իր խորհուրդն ունի: Բոլորս մեր կյանքի օրերը պետք է ներկենք այն գույներով, որն զգում ենք այդ օրը:

ԶՎԱՐԹ ԽԱՉԱՏՐՅԱՆ