"ՎԵՐԱԴԱՐՁ ԴԵՊԻ ՀԱՐՈՒԹՅՈՒՆ" ԳԻՐՔԸ ՆԵՐԿԱՅԱՑՎԵՑ ՀԱՅ ԸՆԹԵՐՑՈՂԻՆ

"ՎԵՐԱԴԱՐՁ ԴԵՊԻ ՀԱՐՈՒԹՅՈՒՆ" ԳԻՐՔԸ ՆԵՐԿԱՅԱՑՎԵՑ ՀԱՅ ԸՆԹԵՐՑՈՂԻՆ

Կամերային թատրոնի "Երկաթ" ակումբում տեղի ունեցավ ժամանակակից գրող ԴԱՎԻԹ ԱՍԱՏՐՅԱՆԻ "Վերադարձ դեպի հարություն" գրքի շնորհանդեսը, որը բանաստեղծի չորրորդ գիրքն է: Գրքի երեք բաժիններում ("Վերադարձ դեպի հարություն", "Ծածկվիր չմրսես", "Ու հայրս կոչ կանի") ներառված են Դավիթ Ասատրյանի քաղաքական, սիրային և կարոտի բանաստեղծությունները: Հինգ տարի է ինչ ընթերցող հանրությունը ճանաչում է Դավիթ Ասատրյան գրողին, սակայն հասցրել է սիրել և գնահատել նրան "Իմ նախորոդ գրքում` "Սիրո երաշտում" կար խաբված սիրեկանի կերպար, իսկ այս գրքում հիմնականում քաղաքացիական, սիրային և կորուսյալ տարիների պոեզիան է: 90-ական թվականների իմ մանկությունից երկար ժամանակ չի անցել, բայց այն արդեն կորուսյալ ժամանակ է, և բնավ էլ պարտադիր չէ, որ դառնաս 50 տարեկան նոր սկսես մանկությունդ փորփրել: Կարելի է հենց պատանեկության շրջանից դուրս գալ և շփվել մանկության հետ",- անդրադառնալով գրքին նշեց ԴԱՎԻԹ ԱՍԱՏՐՅԱՆԸ:

Իր գրքերի տպագրության համար միշտ Դավիթի կողքին են ՀՀ պաշտպանության նախարարությունը և իր ընկերները."Ունեմ լավ ընկերներ ովքեր ինձ աջակցում են, Դավիթ Մշեցու նման ընկեր ունեմ, ում բանվորությամբ վաստակած գումարով տպագրվեց իմ երկրորդ գիրքը":

Երևանի գրողների միության նախագահ ԱԲԳԱՐ ԱՓԻՆՅԱՆԸ շնորհավորելով Դավիթին միաժամանակ փաստեց, որ նրա ներկայությունը հայ գրականության մեջ կաևոր է. "Դավիթ Ասատրյանը մտել է հայ գրականություն, որպեսզի ցույց տա, որ հայ մշակույթը միշտ հաղթող է: Եթե կա Դավիթը, նշանակում է հայ գրականության առողջ ծիլը բարձրանում է":

Շնորհանդեսին ներկա էր նաև գրականագետ ԱՐՔՄԵՆԻԿ ՆԻԿՈՂՈՍՅԱՆՆ ով հերքեց այն կարծիքը, թե Հայաստանում երիտասարդ գրողների շրջանում միմյանց նկատմամբ կա հակակրանք և ատելություն: Ըստ գրականագետի, վերջին հինգ տարիների ընթացքում բանաստեղծական աշխարհի համապատկերի մեջ Դավիթ Ասատրյանի ներկայությունը ոգեշնչող է, քանի որ վերջինս գիտի դասական տաղաչափության հանգը, հանգի գրագետ կառուցելը . "Այս ամենն ինձ թույլ է տալիս ասելու, որ ապագայում մենք կունենաք մեծ ասելիքով բանաստեղծ, որովհետև Դավիթի մոտ շնորհքը աստվածատուր է":

Շնորհանդեսի ընթացքում Դավիթ Ասատրյանը ներկաների համար ընթերցեց իր ստեղծագործություններից մի քանիսը, այդ թվում նաև հայ-ադրբեջանական սահմանին արիաբար զոհված, Արցախի Հանրապետության բանակի կրտսեր սերժանտ ԱՐՄԵՆ ՀՈՎՀԱՆՆԻՍՅԱՆԻՆ նվիրված "Գնաս բարով եղբայր" բանաստեղծությունը:

Նշենք, որ շնորհանդեսին ներկա էր նաև Դավիթ Ասատրյանի հրամանատարը, ով նրան հանձնեց ՀՀ պաշտպանության նախարարության "Վազգեն Սարգսյան" մեդալը` Հայոց ազգային բանակում ծառայության երկու տարիների ընթացքում ցուցաբերած ռազմահայրենասիրական բարձր դաստիարակության համար:

ԶՎԱՐԹ ԽԱՉԱՏՐՅԱՆ