Երեւանում «Գինի լից» ակցիաներ Թեհլերյանի պատվին այլեւս չեն անցկացվի

Երեւանում «Գինի լից» ակցիաներ Թեհլերյանի պատվին այլեւս չեն անցկացվի

Դեռ շաբաթներ առաջ Երեւանի հենց սրտի մեջ` Հյուսիսային պողոտայում «Պատանի պատմագետների ակումը» եւ «Միշտ երիտասարդ» հասարակական կազմակերպությունը կազմակերպել էին «Գինի լից» ֆլեշ մոբ, նվիրված հայ հերոս Սողոմոն Թեհլերյանի փառահեղ գործին, երբ 1921 թ. Բեռլինում նա գնդակահարեց Մեծ Եղեռնի կազմակերպիչ-ոճրագործներից մեկին` Թալեաթ փաշային: Ակցիայի նպատակը թերեւս մեկն էր  վառ պահել Հայոց Ցեղասպանության զոհերի հիշատակը, եւ «Գինի լից»-ի միջոցով երախտագիտության խոսք հայտնել ազգի հերոս Թեհլերյանին: Սակայն, արի ուտես, որ նմանատիպ ակցիաներ, որոնք բարձրացնում էին երիտասարդների հայերնասիրությունն ու ոգին, եւ էլ ավելի խորացնում գիտակցումը սեփական ազգի, դրա հերոսների եւ պատմության նկատմամբ, այլեւ չեն կազմակերպվելու, պատճառը մեկն է` ֆինանսական խնդիրը: Ակումբի նախագահ ԱՐԱՅ ՀԱԿՈԲՅԱՆԸ մեծ ցավով տեղեկացրեց. «Պատանի Պատմագետների Ակումբը մեծ ցավով հայտնում է, որ ունենալով ֆինանսական և տարածքային խնդիրներ չի կարողանում շարունակել իր աշխատանքները, որի պատճառով էլ այսօր քննարկել է ակումբի աշխատանքների կասեցման և ակումբի լուծարման հարցը, որը վերջնական տեսք կունենա սույն թվականի ապրիլի 15 ին մինչ այդ մենք կփորձենք որոնել ակումբի պահպանման և արդեն մեկնարկված հինգերորդ հոսքի ընդունելության և ուսումնական փուլը ավարտին հասցնելու բոլոր հնարավոր ուղիները :

Շնորհակալություն ենք հայտնում բոլոր այն մարդկանց ովքեր մեզ այս չորս տարիների ընթացքում աջակցել են և եղել մեր կողքին»:

Հարկ ենք գտնում նկատել, որ ՊՊԱ-ն դիմել է ՀՀ մի շարք բարեգործական և կոմերցիոն կազմակերպությունների, որոնք, ցավոք սրտի, չեն հետաքրքրվում ՊՊԱ-ով կամ նպատակահարմար չեն գտնում այն ֆինանսավորել: Ցավալի է, երբ ամեն մի ստորաքարշ ծրագիր կարող է խոշոր ֆինանսավորում ստանալ, իսկ այ հայրենասիրություն սերմանող եւ պատմություն ուսուցանող կարեւորագույն կառույցները արժանանում են նման ճակատագրի:

ՍՈՍԵ ՉԱՆԴՈՅԱՆ