ՙՀԱՅ ԸՄԲԻՇՆԵՐԸ ԵՎՐՈՊԱՅԻ ԱՌԱՋՆՈՒԹՅՈՒՆՈՒՄ

ՀԱՅ ԸՄԲԻՇՆԵՐԸ ԵՎՐՈՊԱՅԻ ԱՌԱՋՆՈՒԹՅՈՒՆՈՒՄ

Հայաստանի հունահռոմեական եւ ազատ ոճի ըմբշամարտի հավաքականները Ֆինլանդիայի Վանտա քաղաքում կայացած ըմբշամարտի Եվրոպայի առաջնությունից վերադարձան գոհացնող արդյունքներով: Ազատ ոճի ըմբշամարտի հավաքականը նվաճել է մեկ արծաթե եւ երկու բրոնզե մեդալներ, իսկ հունահռոմեկան ոճի ընտրանին մրցաշարից վերադարձել է մեկ ոսկե եւ մեկ արծաթե մեդալով: Արդարության համար պետք է նշել, որ ազատոճայինները մրցաշարին մասնակցեցին լուրջ կորուստով, առանց աշխարհի եւ Եվրոպայի չեմպիոն Դավիթ Սաֆարյանի, ում մասնակցությունը մրցաշարին աննկատ իհարկե չէր մնա:
Հունահռոմեական ոճի հավաքականից արծաթե մեդալակիր է դարձել Արսեն Ջուլֆալակյանը, իսկ ոսկե մեդալը Հայաստան է բերել Արթուր Ալեքսանյանը, ով երրորդ տարին անընդմեջ նվաճում է մրցաշարի չեմպիոնի կոչումը:

Թեեւ Արսեն Ջուլֆալակյանի արծաթե մեդալը նույնպես կարող էր ոսկի լինել, բայց  մրցաշարում հայ մարզիկների ելույթներն ամփոփելով, այնուամենայնիվ, չենք կարող չնշել, որ հայկական սպորտի համար ոչ հեշտ ժամանակներում ըմբշամարտը, որպես հենակետային մարզաձեւ, պահպանում է առաջատարի դիրքերը, իսկ միջազգային հարթակներում` մշտապես հաջողություններ գրանցում: Հայաստանի սպորտի եւ երիտասարդության հարցերի նախարարությունը եւս այս փաստն անտեսել չէր կարող: Սպորտի եւ երիտասարդության նախարարի պաշտոնակատար Յուրի Վարդանյանն այս կապակցությամբ ընդունել էր Եվրոպայի առաջնությունում մեդալ նվաճած հայ մարզիկներին եւ նրանց մարզիչներին: Միջոցառման ընթացքում մարզիկներն ու մարզիչներն արժանացան տարբեր խրախուսանքների: Եվրոպայի առաջնության արծաթե մեդալակիր Գրիգոր Գրիգորյանին եւ բրոնզե մեդալակիր Գարիկ Բարսեղյանին շնորհվեց ՙՄիջազգային կարգի սպորտի վարպետի՚ կոչում: Հունահռոմեական ըմբշամարտի հավաքականի գլխավոր մարզիչ, օլիմպիական խաղերի եւ աշխարհի չեմպիոն Լեւոն Ջուլֆալակյանը ՀՀ ֆիզիկական կուլտուրայի եւ սպորտի զարգացման գործում մեծ ներդրում ունենալու համար պարգեւատրվեց ՙԲացառիկ ծառայությունների համար՚ ոսկե մեդալով: ՀՀ վաստակավոր մարզիչ Գեւորգ Ալեքսանյանին մարզչական աշխատանքում բարձր արդյունքներ ցուցաբերելու համար շնորհվեց ՀՀ ՙՖիզիկական կուլտուրայի եւ սպորտի պատվավոր աշխատողի՚ կոչում:
Հաջորդ խոշոր մրցաշարը, որին երկու հավաքականներն էլ կմասնակցեն հնարավորինս լիարժեք եւ ուժեղ կազմով, աշխարհի առաջնությունն է: Եվրոպայի եռակի չեմպիոնի ծրագրերը` այդ առաջնության հետ կապված, կներկայացնենք ՙԻրավունքի՚ հաջորդ համարում:

ՔՐԻՍՏԻՆԵ ՊԵՏՐՈՍՅԱՆ