ՙՙՄ. ՄԻՆԱՍՅԱՆԸ ՀՈՒՅՍ ՈՒՆԻ, ՈՐ ՙԶՎԱՐԹՆՈՑԻ՚ ՀԱՐՑՈՒՄ ԴՐԱԿԱՆ ՏԵՂԱՇԱՐԺԵՐ ԿԼԻՆԵՆ

Մ. ՄԻՆԱՍՅԱՆԸ ՀՈՒՅՍ ՈՒՆԻ, ՈՐ ՙԶՎԱՐԹՆՈՑԻ՚ ՀԱՐՑՈՒՄ ԴՐԱԿԱՆ ՏԵՂԱՇԱՐԺԵՐ ԿԼԻՆԵՆ

ՙԶվարթնոց՚ օդանավակայանի կլոր շենքը քանդելու կամ պահպանելու շուրջ առաջացած խնդիրը քննարկելու համար վերջերս մի քանի ճարտարապետներ հանդիպում են ունեցել ՀՀ քաղավիացիայի գլխավոր վարչությունում: ՀՀ ճարտարապետների միության նախագահ ՄԿՐՏԻՉ ՄԻՆԱՍՅԱՆԸ նշում է, որ Քաղավիացիայի վարչությունը նույնպես անհանգստացած է` շենքը քանդելու խնդիրը այդքան շոշափվում է, սակայն արդյունքում չկա հստակ պատասխան, բացի մեկից` շենքը երկար ժամանակ չի օգտագործվել եւ գտնվում է սեյսմիկ վտանգի մեջ, ուստի պետք է քանդել:
Մ. Մինասյանը փաստում է, որ  Քաղավիացիայում վերջին հանդիպումը ցույց է տվել, որ իրենց երկխոսության արդյունքում ավելի դրական արդյունքների կհասնեն: Հանդիպմանը ներկա է եղել նաեւ կոնսենսիոների ներկայացուցիչը եւ փաստել է, որ իրենց ճարտարապետական ներուժով մեկ անգամ էլ կվերանայեն հարցը. ՙՄենք պնդեցինք, որ այդ հարցը վերանայվի ոչ թե տեղ ազատելով ու հին շենքը քանդելով, այլ` նայել այն սկզբունքով, որպեսզի կարողանանք պահել հին մասնաշենքը: Նրանց հետ մեր վերջին պայմանավորվածությունը հույս է ներշնչում, որ դրական տեղաշարժեր կարող են լինել՚: Իսկ թե ե±րբ կլինի` Մինասյանը դժվարանում է պատասխանել, քանի որ հստակ օր նշված չէ:
Մ. Մինասյանը նաեւ տեղեկացրեց, որ դիմելու են ՀՀ մշակույթի նախարարություն` Զվարթնոցի շենքը հուշարձանների ցանկում ներառելու համար, թեպետ չի երաշխավորում, որ շենքը քանդելու դեպքում այդ փաստը հաշվի կառնեն:
Մ. Մինասյանի բնորոշմամբ` ՙԶվարթնոց՚ օդանավակայնի կլոր շենքը հայ ճարտարապետության գործընթացների լավագույն էջերից մեկն է, եթե այդ գործընթացից հանվում է Երիտասարդական պալատը կամ ՙՄոսկվա՚ կինոթատրոնի Ամառային դահլիճը, նշանակում է, որ հայ ճարտարապետները եւ Հայաստանը ընդհանրապես այդ շրջանում ոչ մի կառույցով չեն ներկայացել աշխարհին: Սա այն դեպքում, երբ այդ կառույցները եղել են Խորհրդային Միության նշանավոր կառույցներից, որոնք տեղ են գտնել ամսագրերում, որպես ճարտարապետական մոդեռնիզմի լավագույն նմուշներ:

ԶՎԱՐԹ ԽԱՉԱՏՐՅԱՆ