«ՈՎ Է ԱՍՈՒՄ, ՈՐ ԱԿՈՒՄԲՈՒՄ ԵՐԳԵԼՈՎ ԿԱՐՈՂ ԵՍ ԴԻՄԱԿԱՅԵԼ ՇՈՈՒ-ԲԻԶՆԵՍՈՒՄ»
Արխիվ 12-16
«ՈՎ Է ԱՍՈՒՄ, ՈՐ ԱԿՈՒՄԲՈՒՄ ԵՐԳԵԼՈՎ ԿԱՐՈՂ ԵՍ ԴԻՄԱԿԱՅԵԼ ՇՈՈՒ-ԲԻԶՆԵՍՈՒՄ»
Երկարատեւ լռությունից հետո երգիչ ՎԼԱԴԻՄԻՐ ԲԱՐԽՈՅԱՆԸ կրկին բեմում է, բայց այս անգամ դերասանի կարգավիճակով` «Սիրո Կամուրջ» մյուզիքլում: «Իրավունքի» հետ զրույցում պարզվեց, որ լռելու համար Վլադիմիրն ուներ իր պատճառները:
-Գալիս է մի պահ, որ հոգնում ես ամեն ինչից: Հոգնել էի անընդհատ նույնը լինելուց: Այսինքն` այն ամենը, ինչ կատարվում էր մեր երգարվեստում, ինձ չէր գոհացնում. միանման համերգներ, տեսահոլովակներ... Նորություն էի ուզում, այնպիսի մի բան, որ երբեք չէի արել:
- Երկարատեւ դադարից հետո հանդես եկաք ոչ թե նոր երգով կամ տեսահոլովակով, այլ, որպես դերասան` «Սիրո Կամուրջ» մյուզիքլում:
- «Սիրո Կամուրջ» մյուզիքլն ինձ գրավեց նրանով, որ ինձ կարող էի բացահայտել մի ուրիշ անկյունից, որտեղ ոչ միայն կերգեի, այլեւ կպարեի, ցույց կտայի իմ դերասանական տվյալները:
Մի խոսքով, ուրախ եմ, որ նման հնարավորություն ինձ տրվեց` ոչ միայն խաղալ մյուզիքլում, այլեւ լինել գլխավոր հերոսը, դա իրոք անսպասելի էր ինձ համար:
- Կարելի է ասել` նման մյուզիքլ Հայաստանում առաջին անգամ էր բեմադրվում... 
- Իրոք, մեր հանդիսատեսի համար այն տոն է: «Սիրո Կամուրջ» մյուզիքլում հանդիսատեսը տեսնում է բեմական ողջ ուժը, այսինքն` բեմը մաքսիմալ օգտագործվում է` թե՛ լուսային էֆեկտներ եւ թե՛ տեխնիկական հագեցվածություն, կենդանի հնչողություն, պարային հրաշալի շոու, եւ ինչպես վերջում ականատես ենք լինում ծափահարություններին, վստահ կարող եմ ասել, որ շոուն հաջողված է: Հանդիսատեսը կարիք ուներ նման ներկայացման:
- Վլադիմիր, «Սիրո կամուրջ» մյուզիքլի պրեմիերայից առաջ խոսակցություններ էին պտտվում, որ ներկայացման փորձերի ժամանակ վիճել եք մյուզիքլում ընդգրկված դերասան-երգիչ Նարեկ Բավեյանի հետ: Նույնիսկ բանը հասել է ծեծկռտուքի, արդյունքում Նարեկը կապտուկներ է ստացել: Դա համապատասխանո՞ւմ է իրականությանը, թե՞ պարզապես հերթական հորինված բամբասանքն էր հասարակության կողմից:
- Նարեկի հետ լավ ընկերներ ենք, գործընկերներ, փակագծերը չեմ ուզում բացել... Կարող եմ միայն ասել, որ դա շոուի մի հատվածն է, երբ մենք կոնֆլիկտ ենք ունենում, բայց ի վերջո ամեն ինչ իր տեղն է ընկնում: Ցավոք սրտի, չեմ կարող ասել, որ նույնը կյանքում է տեղի ունենում, բայց ներկայացման վերջում հաղթում է սերը... Սերը, որ ուժեղ է եւ միշտ հաղթում է:
- Այսօր հայկական շոու-բիզնեսը կարծես պասիվ դերում է, չկան նախկինի նման համերգներ, ձայնասկավառակներ չեն թողարկվում, մենահամերգեր շատ քիչ են լինում... Ի՞նչը շոու-բիզնեսին բերեց այս վիճակին:
- Ցավալի է, բայց իրոք մեր ասպարեզը` շոու-բիզնեսը, ներկա պահին դեգրադացիա է ապրում: Հույս ունեմ, որ ինչ-որ մի բան կփոխվի, սառույցը կկոտրվի եւ կծնվեն նոր մտքեր, կլինեն նոր հնարավորություններ մեր երգիչների համար` ավելի լավ կազմակերպված համերգներ: Մի խոսքով, հույս ունեմ, որ դեռ կգան լավ օրեր մեր երգարվեստի համար: Օրինակ` մեր ներկայացումը արդեն իսկ նորություն է, հանդիսատեսը ոգեւորված է, շատ կուզենամ, որ բարի նախանձից դրդված էլի 
նմանատիպ մտքեր ծնվեն, չէ՞ որ երբեմն մրցակցությունը դրական արդյունքի է բերում:
- Ձեր քույրը` Մարգարիտա Բարխոյանը, նույնպես չի երեւում ասպարեզում, ընդհանրապես, քույր ու եղբայր նույնիսկ նախկինի նման զուգերգով հանդես չեք գալիս:
- Մենք չենք դադարել աշխատել, եթե տեսահոլովակ չենք նկարահանում` չի նշանակում, որ հեռացել ենք: Ասեմ ավելին` Մարգարիտան արդեն նոր տեսահոլովակ է նկարահանել իր հեղինակած երգի հիման վրա: Ուրախ ենք, որ նա սկսել է երգեր գրել: Ես նույնպես պատրաստվում եմ նկարահանել տեսահոլովակ, բայց մտադիր եմ տեսահոլովակս դրսում նկարահանել. Դա որպես գաղտնիք ասացի:
- Եթե չեմ սխալվում, Դուք երկուսդ էլ որոշ երգիչ-երգչուհիների նման ակումբներում չեք երգում, ի՞նչ եք կարծում, հե՞շտ է այդպես, ակումբում չերգելով դիմակայել շոու-բիզնեսում:
- Իսկ ով է ասում, որ ակումբում երգելով կարող ես դիմակայել շոու-բիզնեսին: Ոչ,
ուղղակի այդպես քո գոյատեւումն ես ապահովում: Ցավում եմ, որ մեր իրականության մեջ հակառակ գործընթաց սկսվեց: Եթե արտասահմանում երգիչները ակումբներից են սկսում եւ բարձրանում են դեպի վեր, դուրս են գալիս դրա միջից, ապա մեզ մոտ հակառակն է: Այստեղ դու բարձրագույն երաժշտական կրթություն ես ստանում, հաջողությունների ես հասնում, բայց քանի որ պետք է ինչ-որ կերպ ապրել, ստիպված ես լինում մտնել ակումբային կյանք: Դա վատ է, այ այստեղից էլ սկսվում է խնդիրը, որ համերգներ հաճախակի չեն կազմակերպվում եւ երգիչները ստիպված են իրենց հացը վաստակել ակումբներում:
- Օրերս համացանցում հայտնվեց Ձեր կատարմամբ «Ես սիրել գիտեմ» Կարեն Գրիգորյանի հեղինակած երգի դեմո տարբերակը: Ե՞րբ վերջնական պատրաստ կլինի երգը եւ արդյո՞ք այդ երգը Ձեր սիրո մասին է պատմում:
- Կարենի հետ վաղուց ենք ընկերներ, ուրախ եմ եւ հպարտ, որ ընկերություն եմ անում գրագետ անձնավորության հետ: Բայց, երբեւէ առիթ չի եղել, որ կատարեմ Կարենի երգերից որեւէ մեկը: Կարենի հեղինակած երգը, որը շուտով արդեն կձայնագրեմ, ուղղակի իմ հոգու ներկա պահի արտացոլումն է, այն, ինչ զգում եւ վերապրում եմ: Շնորհակալ եմ նրանից, որ երգի միջոցով ինձ հնարավորություն տվեց արտահայտելու իմ ապրումները:
1
9827 դիտում
2
2258 դիտում
3
2225 դիտում
4
2093 դիտում
5
1960 դիտում
