ՙԾԽԱԽՈՏԸ, ԱԼԿՈՀՈԼՆ ՈՒ ՅՈՒՂՈՏ ՍՆՆԴԱՄԹԵՐՔԸ` ԲԱՐՁՐ ՃՆՇՄԱՆ ՊԱՏՃԱՌ

ԾԽԱԽՈՏԸ, ԱԼԿՈՀՈԼՆ ՈՒ ՅՈՒՂՈՏ ՍՆՆԴԱՄԹԵՐՔԸ` ԲԱՐՁՐ ՃՆՇՄԱՆ ՊԱՏՃԱՌ

- Ի՞նչ է զարկերակային գերճնշումը: Մասնագետի չեմ դիմել, սակայն վերջերս հաճախակի է ճնշումս բարձրանում, երբեմն լինում են ցավեր սրտի շրջանում: Օգտագործում եմ կիտրոն, մածուն, հանքային ջուր, կարելի՞ է:

Հարցին պատասխանում է թիվ 2 բուժմիավորման թերապեւտ
ՔՐԻՍՏԻՆԵ ՀՈՒՆԱՆՅԱՆԸ.

-Զարկերակային գերճնշումը լուրջ հիպերտոնիկ հիվանդություն է: Ընդունված է տարբերել երկու տեսակի զարկերակային գերճնշում` ՙէսենցիալ՚ եւ ՙերկրորդային՚: Առաջինի դեպքում անհայտ են զարկերակային ճնշման բարձրացման պատճառները, երկրորդի դեպքում` այն պայմանավորված է որեւէ օրգան համակարգի ախտահարման հետ: Դրանք հիմնականում թիրախ-օրգաններն են` սիրտը, գլխուղեղը, երիկամները:  Զարկերակային գերճնշման դասակարգման մեջ տարբերում են երեք խմբի զարկերակային գերճնշում. թեթեւ, միջին ծանրության եւ ծանր: Զարկերակային ճնշման օպտիմալ մակարդակը 120/80 մմ սս-ն է:
Ցանկացած հոգեհուզական լարվածություն, սթրես կարող են բերել գլխուղեղի կիսագնդերի կեղեւում խանգարման, որի հետեւանքով առաջանում է զարկերակային ճնշման բարձրացում:  Բարձր ճնշման ժամանակ հիվանդները, որպես կանոն, գանգատվում են գլխացավից, գլխապտույտից, քթային արյունահոսությունից, ականջներում խշշոցի զգացումից, սրտխփոցից, երբեմն լինում են ցավեր սրտի շրջանում: Կանանց շրջանում զարկերակային բարձր ճնշման պատճառ  կարող են լինել հակաբեղմնավորիչների օգտագործումը: Իսկ այդ պարագայում անհրաժեշտ է դադարեցնել այն եւ դիմել մասնագետի:
Բացի այդ` զարկերակային ճնշումը հաճախ հանդիպում է կլիմաքտերիկ շրջանում, դաշտանադադարից հետո:
Թիվ մեկ խորհուրդը` զերծ մնալ սթրեսային վիճակներից, հրաժարվել ծխելուց, ալկոհոլի չարաշահումից, յուղոտ սննդամթերքից, չզբաղվել ինքնաբուժությամբ, չհետեւել հարեւանի, դեղատան աշխատակցի խորհուրդներին: Ցանկալի չէ նաեւ տարվել տնական պարզունակ մեթոդներով: Կիտրոնը, մածունը, հանքային ջուրը եղանակ չեն փոխի, եթե արդեն առկա է զարկերակային գերճնշում հիվանդությունը:
Շուկան ողողված է բազմաթիվ հակահիպերտենզիվ պրեպարատներով, որոնք նշանակվում են հատուկ հետազոտություն անցնելուց հետո: Գերճնշում ունեցող հիվանդներին անհրաժեշտ է տարին մեկ-երկու անգամ ենթարկվել լաբորատոր-գործիքային քննության: Կատարել արյան եւ մեզի հետազոտություն, էլեկտրասրտագրություն, ակնահատակի հետազոտություն:

Հարցին պատասխանում է նաեւ Էրեբունի ԲԿ Առիթմոլոգիական սրտաբանական կենտրոնի, առիթմոլոգիական ծառայության ղեկավար սրտաբան-առիթմոլոգ ԼՈՒՍԻՆԵ ՄԽԻԹԱՐՅԱՆԸ.
-Եթե բարձրացել է արյան զարկերակային ճնշումը, պետք է շտապ օգնություն կանչել: Եթե տվյալ անձը հետազոտվել է բժշկի մոտ, գիտի, որ գրպանում պետք է պահի համապատասխան դեղամիջոց: Անթույլատրելի են տնական պարզունակ մեթոդները: Արյան զարկերակային բարձր ճնշում ունեցող անձինք պետք է դիմեն սրտաբանի կամ նյարդաբանի օգնությանը:  

ՎԼԱԴ ՄՈՒՐԱԴՅԱՆ