ՙՓԱՍՏՈՐԵՆ, ԱՅՍ ԱՆԳԱՄ ԵՎՍ ՎԻՐԱՎՈՐՎԵԼ Է ՙՇԱՆԹԻ՚ ԳԵՐՆՈՒՐԲ ՀՈԳԻՆ

ՓԱՍՏՈՐԵՆ, ԱՅՍ ԱՆԳԱՄ ԵՎՍ ՎԻՐԱՎՈՐՎԵԼ Է ՙՇԱՆԹԻ՚ ԳԵՐՆՈՒՐԲ ՀՈԳԻՆ

Երեկ Կենտրոն եւ Նորք-Մարաշ ընդհանուր իրավասության դատարանում դատավոր Ավետիսյանի նախագահությամբ տեղի ունեցավ ՙՇանթ՚-ն ընդդեմ ՙԻրավունք՚ թերթի` գործարար համբավին պատճառված վնասի մասին հերթական հայցի նախնական դատական նիստը: Պարզվում է` այս անգամ եւս վիրավորվել է ՙՇանթ՚ հեռուստաընկերությունը` ի դեմս նրա առաջնորդ Արթուր Եզեկյանի զգայուն հոգին: Նշենք, որ դատարանում ՙԻրավունքի՚ ներկայացուցիչն է ՙԼեւ գրուպ՚ ընկերության ղեկավար, փաստաբան Լեւոն Բաղդասարյանը: Այս անգամ ՙՇանթի՚ հայցի առարկան 2013 թվականի դեկտեմբերի 2-ին ՙԻրավունք՚ թերթում տպագրված ՙՙԻրավունքը՚ պետք է շնորհակալություն հայտնի ՙՇանթին՚` թերթը տասը րոպե գովազդելու համար՚ վերտառությամբ հոդվածի շրջանակներում է, որտեղ, ըստ հայցվոր կողմի` ՙՇանթ՚ ՍՊԸ-ին հասցվել է վիրավորանք: Իսկ մտացածին վիրավորանքի համար հայցվոր կողմը հերքում եւ դրան գումարած` երկու միլիոն դրամ է պահանջում: Վերջիններս, սակայն, ոչ միայն վիրավորվել են, այլ  նաեւ իրենց զրպարտված են զգում` հոդվածում տպագրված հետեւյալ նախադասության համար. ՙՎերջին մի քանի տարիների ընթացքում ոչ միայն քցում եւ խաբում են իրենց իսկ կադրերին, այլ նաեւ գնալով` ռեյտինգի խիստ նվազում է նկատվում վերջիններիս մոտ՚: ՙՇանթը՚ վիրավորվել է հետեւյալ արտահայտություններից. ՙԻնչ-որ հեռուստաընկերություն փորձում է սեւ բիծ քաշել քսանհինգ տարվա թերթի վրա՚, ՙՉէ, հաստատ, ՙՇանթը՚ չի կարողանում մարսել իր սեփական քցոցին շատերի նկատմամբ՚ եւ երրորդ` ՙՉնայած, սրանց էլ կարելի է հասկանալ՚:
Ի պատասխան` ՙԻրավունքի՚ ներկայացուցիչը մասնավորապես նշեց.
- Առարկում եմ հայցադիմումին:  Եվրոպական կոնվենցիայի բազմաթիվ նախադեպեր, եւ մասնավորապես Կոնվենցիայի 10-րդ հոդվածը պաշտպանում է համընդհանուր հետաքրքրություն ներկայացնող դեպքի վերաբերյալ տեղեկություն տարածելու լրագրողի իրավունքը: Լրագրողը օգտվել է իր ազատության իրավունքից:
Հաջորդ դատական նիստը հետաձգվեց երկու շաբաթով:  
ՙՇանթի՚ դատական տեռորը ՙԻրավունքի՚ դեմ, որի ընթացքում զուգահեռաբար քննվում են ՙՇանթի՚ 6 հայցերը թերթի դեմ, եւ որի արդյունքում արդեն 7-8 ամիս խաթարվել է թերթի բնականոն աշխատանքը, շարունակվում է:

ԻԼՈՆԱ ԱԶԱՐՅԱՆ