«ԻՐԱՎՈՒՆՔԻ» ԿՈՂՄԻՑ «ՏԱՐՎԱ ԼԱՎԱԳՈՒՅՆ ՆԱԽԱՐԱՐ» Է ՃԱՆԱՉՎԵԼ ՀՀ ՍՓՅՈՒՌՔԻ ՆԱԽԱՐԱՐ ՀՐԱՆՈՒՇ ՀԱԿՈԲՅԱՆԸ

«ԻՐԱՎՈՒՆՔԻ» ԿՈՂՄԻՑ «ՏԱՐՎԱ ԼԱՎԱԳՈՒՅՆ ՆԱԽԱՐԱՐ» Է ՃԱՆԱՉՎԵԼ ՀՀ ՍՓՅՈՒՌՔԻ ՆԱԽԱՐԱՐ ՀՐԱՆՈՒՇ ՀԱԿՈԲՅԱՆԸ (ՏԵՍԱՆՅՈՒԹ)

Այսօր «Իրավունքի» «Ուղիղ կապ» նախագծի հյուրն էր ՀՀ սփյուռքի նախարար ՀՐԱՆՈՒՇ ՀԱԿՈԲՅԱՆԸ, ով մեկ ժամ ուղիղ հեռախոսակապ ձեւաչափով պատասխանեց «Իրավունքի» ընթերցողների եւ ակտիվ հասարակության հեռախոսազանգերին` տալով հուզող մի շարք հարցերի պատասխաններ: Նշենք, որ զանգահարողները մեծամասամբ հետաքրքվում էին քեսաբահայության վիճակի, նրանց այսօրվա ու վաղվա մասին, եւ, իհարկե, հարցերի մի ստվար մաս վերաբերում էր Ուկրաինայում տեղի ունեցած դեպքերից հետո ուկրաինահայերի եւ ղրիմահայերի խնդիրներին:

Ի դեպ, տիկին նախարարին «Իրավունքի» կողմից անակնկալ էր սպասվում: «Իրավունքն» ավանդաբար ամփոփելով տարվա ընթացքում տարբեր ոլորտներում հայ գործիչների գործունեությունը, եւ, հաշվի առնելով իր ընթերցողների կարծիքը, 2013 թվականի «ԼԱՎԱԳՈՒՅՆ նախարար» է ճանաչել ՀՀ Սփյուռքի նախարար ՀՐԱՆՈՒՇ ՀԱԿՈԲՅԱՆԻՆ` Սփյուռքի հետ կապերի սերտացման հարցերում նախաձեռնողական եւ հետեւողական լինելու համար»: ԱԺ ՀՀԿ խմբակցության պատգամավոր, ՍԻՄ կուսակցության նախագահ ՀԱՅԿ ԲԱԲՈՒԽԱՆՅԱՆԸ հանձնելով պատվոգիրը նախարարին` նշեց. «Սփյուռքի հետ կատարած Ձեր աշխատանքը, մտավոր աշխատանքային գործունեությունը,  հայ ժողովրդի համար Ձեր մեծ ներդրումը բարձր է գնահատվում մեր ժողովրդի կողմից: Շնորհակալություն Ձեր կատարած աշխատանքի համար, առավել եւս հիմա` Քեսաբի դեպքերի հետ կապված էլ ավելի ընդգծվեց ձեր կատարած աշխատանքը եւ նաեւ ձեր կառույցի կարեւորությունը, անհրաժեշտությունը, հրատապությունը: Մեր կոլեկտիվը, «Իրավունք» թերթը եւ ՍԻՄ կուսակցությունը կանգնած են ձեր կողքին եւ պատրաստակամ ցանկացած հարցով աջակցել»:

«Շնորհակալ եմ, համենայն դեպս, կարծում եմ` Սփյուռք-հայրենիք գործակցությունը ռազմավարական նշանակություն ունեցող տարածք է եւ Սփյուռքի նախարարության ստեղծումը, որը Հանրապետության նախագահի գաղափարն էր այսօր իրականացնում եմ անձամբ»,- ընդունելով պատվոգիրը` ասաց տիկին նախարարն ու հավելեց.- «Շատերը էին թերահավատ, շատերն էին կասկածում` նախարարությունը կկայանա, թե` ոչ, բայց ի պատիվ մեր թիմի, մեծ շնորհակալություն եմ ուզում հայտնել մեր Սփյոռքին եւ նրա կառույցներին ու կազմակերպություններին, որ վստահեցին մեզ, հավատացին եւ մեր ծրագրերի մասնակիցը դարձան: Դրա համար էլ նախարարությունը ընդլայնվեց ու կայացավ: Առավել եւս շնորհակալություն եմ հայտնում Հայաստանի այն քաղաքացիներին, «Իրավունք» թերթի ընթերցողներին, որոնք գնահատել կարող են: Դա ամենամեծագույն շնորհն է եւ ես շատ շնորհակալ եմ, որովհետեւ այսօր շատ սիրում են բացասականի մասին խոսել, սակայն կարեւոր է նաեւ արված գործը տեսնել ու գնահատելը: Այս հաճելի, գեղեցիկ եւ շատ կարեւոր պարգեւը նախեւառաջ մեր նախարարության բոլոր աշխատակիցներին է վերաբերում եւ երկրորդ` պարտավորեցնում է, որ ավելին պետք է անել ու ավելին աշխատել, որովհետեւ  ժողովուդը, եթե թեկուզ փոքրիկ հավատ եւ հույս ունի տվյալ դեպքում այս կառույցի նկատմամբ, ապա այն պետք է դարձնենք առավել մեծ, առավել ճոխ եւ կազմակերպված»:

ՀՐԱՆՏ ՍԱՐԱՖՅԱՆ

Հ.Գ.- Մեր ընթերցողների հարցերն ու ՀՀ Սփյուռքի նախարար Հրանուշ Հակոբյանի տված պատասխաններն ամբողջությամբ կարդացե՛ք «Իրավունք» թերթի ուրբաթ օրվա տպագիր համարում: