5 ՏՈԿՈՍ ԴԵՊՔԵՐՈՒՄ ՀԵՊԱՏԻՏ C-Ն ՓՈԽԱՆՑՎՈՒՄ Է ՍԵՌԱԿԱՆ ՃԱՆԱՊԱՐՀՈ

5 ՏՈԿՈՍ ԴԵՊՔԵՐՈՒՄ ՀԵՊԱՏԻՏ C-Ն ՓՈԽԱՆՑՎՈՒՄ Է ՍԵՌԱԿԱՆ ՃԱՆԱՊԱՐՀՈՎ

Ինչպես Հայաստանում, այնպես էլ ամբողջ աշխարհում հեպատիտ C-ով հիվանդների թվի աճ է նկատվում: Այս մասին լրագրողների հետ հանդիպման ժամանակ  ասաց «Նորք» ինֆեկցիոն հիվանդանոցի Հեպատոլոգիայի բաժանմունքի վարիչ Հասմիկ Ղազինյանը: «Դա վերաբերում է ոչ միայն Հայաստանին, այլև ամբողջ աշխարհին: Պատճառն այն է, որ ներկայումս չկա պատվաստանյութ, իսկ դրա պատճառն այն է, որ հայտնաբերելիությունը բավականին ակտիվացել է, պատճառն այն է, որ փոխանցման ուղիներից մեկը՝ ներերակային թմրանյութների օգտագործումն, ամբողջ աշխարհում վերելք է ապրում: Դա կարելի է բացատրել տարբեր պատճառներով, բայց ամենակարևոր պատճառն այն է, որ չկա պատվաստանյութ հեպատիտ C-ի դեմ»,- ասաց վարակաբանը: Վարակաբանի հաղորդմամբ՝ ամբողջ աշխարհում, այդ թվում՝ նաև Հայաստանում, հեպատիտ C-ի խոցելի խմբի մեջ մտնում են օնկոլոգիական հիվանդություններով (ուռուցքով),  հեմոդիալիզով հիվանդները. «Խոցելի խմբի մեջ են մտնում, ցավոք, նաև բուժաշխատողները, հատկապես՝ լաբորատոր ծառայության աշխատակիցները, ինչպես նաև՝ ներերակային թմրանյութեր օգտագործող մարդիկ: Համասեռամոլները ևս խոցելի խմբերի շարքին են դասվում: Իհարկե, կան նաև խոցելի խմբերի մեջ մտնող այլ մարդիկ ևս, բայց հիմնականը նշվածներն են»: Խոսելով վարակի փոխանցման ուղիներից` Հասմիկ Ղազինյանն ասաց, որ այն փոխանցվում է հիմնականում վարակված արյան միջոցով. «Քանի որ հեպատիտ C-ն համարվում է արյունային ինֆեկցիա, փոխանցման ուղիները հիմնականում բժշկական գործիքների միջոցով են, սկսած ստոմատոլոգիական միջոցներից, գինեկոլոգիական գործիքները, վիրաբուժական գործիքները, կոսմետոլոգիական գործիքները, արյան փոխներարկումը»: Ըստ նրա` 5 տոկոս դեպքերում վարակը կարող է փոխանցվել նաև սեռական ճանապարհով, 5 տոկոսի դեպքում էլ՝ մորից անցնել երեխային: Հիվանդությունը կանխարգելելու նպատակով վարակաբանը խորհուրդ է տալիս որքան հնարավոր է խուսափել նշված ուղիներից. «Ցանկացած կոսմետոլոգիական սրահներ չգնալ, սեռական ճանապարհով չվարակվելու համար խուսափել պատահական սեռական կապերից, կամ պատահական կապերն անպայման լինեն պաշտպանված, և նույնիսկ խոզանակների օգտագործման դեպքում է պետք շատ զգույշ լինել. դրանք ևս պետք է լինեն ապահովված»:

ԱՍՏՂԻԿ ՍՈՒՔԻԱՍՅԱՆ