ԱՐԱՄ ՍԱԹՅԱՆ. «ԻՆՉՊԵՍ ՌԱԲԻՍԸ ՄՏԱՎ ՄԵՐ ԿՅԱՆՔ, ԱՅՆՊԵՍ ԷԼ ՝ ՊԵՏՔ Է ԴՐԱ ԴԵՄՆ ԱՌՆԵԼ ԵՐԱԺՇՏՈՒԹՅԱՄԲ»

ԱՐԱՄ ՍԱԹՅԱՆ. «ԻՆՉՊԵՍ ՌԱԲԻՍԸ ՄՏԱՎ ՄԵՐ ԿՅԱՆՔ, ԱՅՆՊԵՍ ԷԼ ՝ ՊԵՏՔ Է ԴՐԱ ԴԵՄՆ ԱՌՆԵԼ ԵՐԱԺՇՏՈՒԹՅԱՄԲ»

Ամիսներ առաջ կոմպոզիտոր ՄԱՐՏԻՆ ՎԱՐԴԱԶԱՐՅԱՆԸ նոր օրինագիծ էր մշակել, որով վերջ կդրվեր ռաբիսին: «Իրավունքի» հետ զրույցում, Մ. Վարդազարյանը նշել էր. «Ոչ թե վերջ կդրվի ռաբիսին, այլ կդրվի իր տեղը, որովհետեւ վերջ դնելով մի բանին` արգելքով երբեք ոչ մի առաջընթաց չի լինի: Իսկ ամեն երաժշտական դրսեւորում, որ իր տեղը, դերն ու նշանակությունն ունենա, չխանգարելով մնացածներին, այդ դեպքում, երեւի թե, ավելի մեծ կլինի ձայնապնակը, եթե համեմատենք ներկապնակի հետ: Իսկ այդ դեպքում ընկալման ճաշակային տուրքը չի լինի գլխավորող»:

Ամիսներ անց «Իրավունքի» հետ զրույցում Կոմպոզիտորների միության նախագահ ԱՐԱՄ ՍԱԹՅԱՆԸ նշեց, որ ռաբիսը զոռով՝ մկրատով կտրել չի լինի. «Ինչպես ռաբիսը մտավ մեր կյանք, այնպես էլ՝ պետք է դրա դեմն առնել երաժշտությամբ: Թող մեր կոմպոզիտորները ավելի շատ գրեն երգեր ու ֆինանսավորվեն ոչ թե ռաբիսները, այլ` պրոֆեսիոնալները: Ցավոք, մեզ մոտ այսօր ֆինանսավորումը գնում է դեպի սիրողական արվեստ, դեպի այն, ինչն այսօր կոչում ենք ռաբիս: Ամեն ինչը սիրողականի վրա է հիմնված, իսկ սիրողականով հեռու չես կարող գնալ: Դրա համար պետք է մեր կոմպոզիտորները շարունակեն աշխատել եւ գտնենք ճիշտ ֆինանսավորման ձեւեր ,այլ ոչ թե՝ մի մյուզիքլի, որը չգիտեմ ինչ հեղինակ է գրել, ծախսեն զարմանալի գումարներ, իսկ պրոֆեսիոնալ կոմպոզիտորի ստեղծագորության վրա՝ կոպեկներ: Դա պատիվ չի բերում ընդհանրապես ո՛չ մեր միությանը, ո՛չ Մշակույթի նախարարությանը, ո՛չ մեր պետությանը»:

ԼԻԼԻԹ ԵՂԻԱԶԱՐՅԱՆ