ՄԻԱՅՆ ԵՐԿՈՒ ՄԱՐԶԻԿ Է ՊԱՏՐԱՍՏ ՄԵԴԱԼՆԵՐԻ

ՄԻԱՅՆ ԵՐԿՈՒ ՄԱՐԶԻԿ Է ՊԱՏՐԱՍՏ ՄԵԴԱԼՆԵՐԻ

Ապրիլի 23-ից 28-ը Հայաստանի ձյուդոյի հավաքականը կմասնակցի Եվրոպայի առաջնությանը: Թե ինչպես է թիմը պատրաստվել առաջնությանը եւ ինչ կազմով է մասնակցելու ՙԻրավունքը՚ պարզեց Հայաստանի ձյուդոյի հավաքականի գլխավոր մարզիչ ՏԻԳՐԱՆ ԲԱԲԱՅԱՆԻՑ:

-Առաջիկայում թիմը մասնակցելու է Եվրոպայի առաջնությանը, ի՞նչ ակնկալիքներ կան: Ի՞նչ կազմով է թիմը ներկայանալու:
- Թիմից, այս պահի դրությամբ, երկու հոգի են լիարժեք պատրաստ մրցումների` Դավթյան Հովհաննեսը եւ Չափարյան Անդրանիկը, որոնցից ես մեդալների ակնկալիք ունեմ: Չնայած, ես կուզեի ավելի մեծ թվով մասնակիցներ ունենայինք, հատկապես, որ մեր մարզաձեւը թույլ է տալիս ամեն քաշային կարգից երկու մասնակից ունենալ:

Բայց մրցումները ցույց տվեցին, որ այս երկու մարզիկներն են քիչ թե շատ պատրաստ են մեդալների համար պայքարելու:
- Իսկ ի՞նչ ընթացք է ունեցել նախապատրաստական փուլը:
- Անցած տարվա դեկտեմբեր ամսից ենք նախապատրաստական աշխատանքները սկսել, ֆիզիկական պատրաստվածության ուսումնամարզական հավաք ենք անցկացրել Աբովյանում: Որից հետո Հովհաննես Դավթյանն Ավստրիայում ուսումնամարզական հավաքի է մասնակցել: Այնուհետեւ մասնակցել ենք Եվրոպայի բաց միջազգային մրցաշարի. Դավթյանը 3-րդ տեղն է գրավել, իսկ Չափարյանը` 7-րդ: Ուսումնամարզական հավաք ենք անցկացրել նաեւ Գորիում, երիտասարդական հավաքականի հետ: Դրանից բացի, թիմը եւս մեկ ուսումնամարզական հավաք է անցկացրել, իսկ Անդրանիկն ու Հովհաննեսը առանձին մասնակցել են նաեւ միջազգային ուսումնամարզական հավաքի` Չեխիայում: Երկու գրան-պրի մրցաշար եղավ եւ այդ մրցաշարերի արդյունքների հիման վրա պարզ դարձավ, թե որ մարզիկներն են Եվրոպայի առաջնությանը մասնակցելու:
- Խոշոր մրցաշարերից առաջ միջազգային տարբեր մրցաշարերում Ձեր սաների մասնակցությունը ի՞նչ նպատակ է հետապնդել եւ ի՞նչ արդյունք է տվել:
- Հիմա թիմում մեծ մասը երիտասարդական հավաքականից նոր տեղափոխված տղաներ են, եւ գլխավոր նպատակը եղել է մրցակցային փորձ ձեռք բերելը: Եվրոպայի առաջնությունից առաջ եւս մեկ ուսումնամարզական հավաք պետք է անցկացնենք, սակայն դեռ պարզ չէ, թե` որտեղ: Նախատեսել էինք անցկացնել Մոսկվայում, բայց դեռ պարզ չէ Մոսկվայում, թե այստեղ կանցկացնենք: Այս մի քանի օրվա ընթացքում այդ հարցը կլուծվի:

ՔՐԻՍՏԻՆԵ ՊԵՏՐՈՍՅԱՆ