ՙՄԵԶ ՀԱՄԱՐ ԲՆԱՎ ԷԼ ՆՈՐՈՒԹՅՈՒՆ ՉԷ, ՈՐ ՀՌԱՀ-Ը ԱԶԳԱՅԻՆ ՉԷ՚

ՙՄԵԶ ՀԱՄԱՐ ԲՆԱՎ ԷԼ ՆՈՐՈՒԹՅՈՒՆ ՉԷ, ՈՐ ՀՌԱՀ-Ը ԱԶԳԱՅԻՆ ՉԷ՚

Օրեր առաջ ժուռնալիստների ՙԱսպարեզ՚ ակումբի խորհրդի նախագահ Լեւոն Բարսեղյանը կրկին հանդես եկավ զեկույցով, որը վերաբերում էր Հայաստանի համապետական հեռարձակմամբ 6 հեռուստաալիքների հաղորդումներում գովազդային ծավալների եւ գովազդի զետեղման օրենսդրության համապատասխանությանը:
ՙ
ԳՈՎԱԶԴԱԽԵՂԴ՚ ԵՆ ԱՐԵԼ

Համաձայն զեկույցի` նախորդ տարվա դեկտեմբերի 27-30-ը Հ1-ում գովազդի ծավալը 7 տոկոսով գերազանցել է օրենքով սահմանված չափը: Հունվարի 1-ին ու 2-ին հեռարձակված գովազդի ծավալը եղել է օրենքով սահմանված նորմերի շրջանակներում: ՙԻսկ 2013-ի օգոստոսին դիտարկված իրավիճակն ակնհայտորեն առաջընթաց էր Հանրային հեռուստաընկերության հեռարձակման գործում, դեկտեմբերյան 4 օրերին դիտարկված խախտումները եւ դրանց ծավալը ցույց են տալիս, որ ակնհայտ նահանջել են օգոստոսյան առաջընթացից՚,- ներկայացրեց Լեւոն Բարսեղյանը` ընդգծելով, որ տարիներ շարունակ Հանրայինը կռիվ է տվել վարկանիշի համար, սակայն եթե Հանրայինը ջանքեր ներդնի հանրայնանալու, հնարավոր է, որ միայն բյուջետային գումարների վրա հույսը չդնի:
Հաշվետվության մեջ ներկայացվող 7 օրերի հաղորդումների վերծանումները ցույց են տալիս, որ ՙՀ2՚ ՙԱրմենիա՚ եւ ՙԵրկիր մեդիա՚ հեռուստաալիքները չեն խախտել օրենքով սահմանված առավելագույն նորմը, ըստ որի` մեկ ժամում արգելվում է 14 րոպեից ավելի գովազդ հեռարձակել: Այդ հեռուստաալիքների հաղորդումների` դիտարկված 7 օրերի բոլոր 24 ժամերի ընթացքում գովազդը եղել է 14-ից պակաս րոպե:
Դիտարկման նախորդ ժամանակահատվածում (15-21 օգոստոս, 2013) օրենքի այդ պահանջը չէին խախտել միայն ՙՀ1՚-ն ու ՙՀ2՚-ը, իսկ օգոստոսին օրենքի այդ պահանջի խախտում արձանագրվել էր ՙԱրմենիա՚ (1 դեպք), ՙԵրկիր մեդիա՚ (3 դեպք), ՙԿենտրոն՚ (6 դեպք) եւ ՙՇանթ՚ (20 դեպք) հեռուստաընկերությունների եթերաժամերում:
Մինչդեռ Հեռուստատեսության եւ ռադիոյի ազգային հանձնաժողովը պնդում է, որ կատարված մոնիտորինգի (15-21 օգոստոս, 2013) արդյունքների մասին իրենց տեղյակ չեն պահել, հավելելով, որ հանձնաժողովը եւս այդ ընթացքում հետազոտություններ է արել, եւ ոչ մի խախտում չի հայտնաբերել: Իսկ ժուռնալիստների ՙԱսպարեզ՚ ակումբի խորհրդի նախագահ Լեւոն Բարսեղյանը հայտարարեց, որ եթե ՀՌԱՀ-ը հայտարարում է, թե իրենք հաշվետվության ծանուցագիր չեն ստացել. ՙԵս պնդում եմ, որ ստացել են, եւ կարող եմ դա ապացուցել՚:

ԾԱՆՈՒՑՄԱՆ ԿՏՐՈՆԸ ՙԱՍՆԱՎԱՆԻ՚ ՉԷ

Իրավիճակը հասկանալու համար մենք կապ հաստատեցինք Հեռուստատեսության եւ ռադիոյի ազգային հանձնաժողովի նախագահ ԳԱԳԻԿ ԲՈՒՆԻԱԹՅԱՆԻ հետ.
- Մենք նրանցից կատարված ուսումնասիրությունների ոչ մի արդյունքներ էլ չենք ստացել: Մենք աշխատում ենք եւ հետեւապես եզրակացություններ անում ենք մեր արդյունքների հիման վրա:
- Մեզ հետ զրույցում պարոն Բարսեղյանը նշեց, որ իրենք կարող են ապացուցել, որ կատարված ուսումնասիրությունների արդյունքները ՀՌԱՀ-ն ստացել է: Նրանք ունեն ստորագրված ծանուցման կտրոններ, որոնք հաստատում են, որ արդյունքների մասին իրենք տեղեկացրել են ՀՌԱՀ-ին:
- Մենք նրանցից ոչ մի բան չենք ստացել, սա մեր պաշտոնական պատասխանն է:
- Լավ, իսկ առհասարակ ինչպե±ս եք վերաբերվում այդ ուսումնասիրություններին:
- Դա նրանց կատարած աշխատանքն է, մենք ի±նչ վերաբերմունք պետք է ունենանք: Նրանք հայտարարում են 2013թ. օգոստոսին կատարած ուսումնասիրությունների արդյունքները: Իսկ ո±ւր էին նրանք այսքան ժամանակ:
- Բացի նախորդից` նրանք նոր ուսումնասիրություններ էլ են անցկացրել:
- Շատ լավ է, մենք էլ ենք աշխատում եւ նման խախտումներ չենք հայտնաբերել: Ես կոչ եմ անում բոլորին, որ կարող են գալ մեզ հետ համագործակցել, բայց կատարված աշխատանքները պետք է լուսաբանվեն ուսումնասիրություններից անմիջապես հետո, որպեսզի դրանք արժեք ունենան:
- ՀՌԱՀ-ը հայտարարում է, որ օգոստոսի 15-21-ի ընթացքում հետազոտություններ է արել, եւ ոչ մի խախտում չի հայտնաբերել: Դուք կասկածի տա±կ եք դնում ՙԱսպարեզ՚ ակումբի կատարած աշխատանքի արդյունքները:
- Մենք խնդիր չունենք իրենց աշխատանքը գնահատելու: Ես ենթադրում եմ, որ նրանք ինչ-որ պատվեր են կատարում: Ես ցանկություն չունեմ, ոչ իրենց կատարած աշխատանքը գնահատելու, ոչ էլ վերահսկելու:
- Փաստացի ստացվում է, որ նրանք մատնանշում են այն սխալները, որոնք դուք չեք հայտնաբերում:
- Ի±նչն է խանգարում իրենց, որ գան, մի սեղանի շուրջ նստենք եւ մարդավարի զրուցենք, իրենց հուզող խնդիրները բարձրացնեն, մենք էլ պարտավոր կլինենք դրանց պատասխանել: Իրենք չեն կարող մեր աշխատանքը կատարել, նրանք իրենց գործն են անում, երեւի թե գիտեն` ինչի համար: Իրենց գործունեությանը էապես ծանոթ չեմ, ու ցանկություն էլ չունեմ ծանոթանալու:
- Օրեր առաջ լրագրողների հետ հանդիպման ժամանակ պարոն Բարսեղյանը նշեց, որ իրենք ՀՌԱՀ-ից էլ էին ներկայացուցիչ հրավիրել, ով սակայն բացակայում էր: Ինչո±ւ:
- Եթե ներկայացուցիչը բացակաել է, ուրեմն դրա համար պատճառներ կան: Մենք ցանկություն չենք ունեցել մասնակցելու եւ գտնում ենք, որ եթե մարդ ցանկություն ունի ոլորտը վերափոխելու, տվյալ պարագայում առաջին հերթին պետք է մեզ հետ կապ հաստատի: Այլ ոչ թե իրենք ինչ-որ աշխատանքներ կատարեն, ինչ-որ չափորոշիչներով, արդյունքները հրապարակեն մի քանի ամիս հետո: Մենք չենք կարող այդ խախտումները արձանագրել, հետեւապես չենք կարող օպերատիվ արձագանքել: Մեզ էլ հասկացեք, մենք մեր տիրույթում ունենք մոտավորապես 100 սուբյեկտ, որոնց վերահսկում ենք: Ֆիզիկապես հնարավոր չէ, օրը 24 ժամ բոլորին հսկել: Այդ ամենը կատարվում է ժամանակացույցով եւ ընտրովի: Իսկ նրանք ի±նչ են անում. վերցնում են մի քանի հեռուստաընկերություններ եւ հետեւում են, որպեսզի 1 ժամում գովազդը չգերազանցի օրենքով սահմանված 14 րոպեն: Դա այնքան հեշտ է վերահսկել, որ դուք էլ կարող եք: Այդ 14 րոպեի խախտումն այսօր ոչ մի հեռուստաընկերություն չի անում: Կարող է մի օր տեխնիկական խնդիր լինի, այդ դրույթը մի քանի վայրկյանով չպահպանվի, բայց ես նորից եմ կրկնում, որ մեր հեռուստաընկերություններն այդ օրենքը չեն խախտում: Ես ուզում եմ` բոլորը հասկանան, որ մեր միակ խնդիրը այդ 14 րոպեի վերահսկումը չէ, մենք կարգավորող մարմին ենք եւ ունենք բազմաթիվ գործառույթներ: Ես նորից եմ կրկնում, մենք բաց ենք բոլորի հետ համագործակցելու համար:

ՙԲՈԼՈՐԸ ՍՏԱՑԵԼ ԵՆ ՄԵՐ
ՄՈՆԻՏՈՐԻՆԳԻ ԱՐԴՅՈՒՆՔՆԵՐԸ՚

Եթե մինչ այս պարոն Լեւոն Բարսեղյանը պնդում էր. ՙԱռայժմ ոչ ոք չի վիճարկել, կասկածի տակ չի առել մեր արդյունքները՚,- ապա հիմա ավելի քան մեղադրանքները շատ են: Ինչպես ակնհայտ դարձավ հարցազրույցում, ՀՌԱՀ-ը կրկին պնդում է, որ իրենք մինչ օրս Լ. Բարսեղյանից ոչ մի մոնիտորինգի արդյունք էլ չեն ստացել: Մենք զրույց ունեցանք պարոն Բարսեղյանի հետ եւ խնդրեցինք, որ եթե իրենք ունեն ապացույց խնդրի հետ կապված, մեզ ներկայացնեն: Ի սկզբանե պարոն Բարսեղյանը բնավ էլ չզարմացավ ՀՌԱՀ-ի նման հայտարարությունից. ՙՄեր հայտարարությունները միշտ էլ հրապարակային են եւ պատասխանատու, այն իմաստով, որ մենք միշտ խոսում ենք փաստերով: Երբեւէ չպատկերացնեք, թե մենք կարող ենք առանց ապացույցների հայտարարություններ անել: Մեզ հետ աշխատող մարդիկ ահռելի աշխատանք են կատարում, որպեսզի վայրկյան առ վայրկյան ուսումնասիրություն կատարեն եւ արդյունքները մեզ ներկայացնեն: Որեւիցե հեռուստատեսության տնօրեն, գովազդային մենեջեր, Հեռուստատեսության եւ ռադիոյի ազգային հանձնաժողով, ով կկամենա, մենք գնում ենք իրենց հետ նույն սեղանի շուրջ նստում եւ քննարկում խնդիրը: Մեզ համար բնավ էլ նորություն չէ, որ ՀՌԱՀ-ը վաղուց ազգային չէ` ապազգային է` Գրիգոր Ամալյանի ժամանակներից սկսած:  
Մենք մեր վերջին մոնիտորինգի արդյունքները կրկին ծանուցումով կուղարկենք 10 անձնավորությունների` ՀՌԱՀ-ի նախագահին, 6 հեռուստատեսությունների տնօրեններին, Հանրային հեռուստառադիոընկերության խորհրդի նախագահին եւ ԱԺ մշտական հանձնաժողովների 2 անդամներին: Մեզ համար կարեւորը հանրությանն իրազեկելն է: Եթե մեր աշխատանքը ՀՌԱՀ-ին չի հետաքրքրում, դա իրենց գործն է, բայց օրենքը նախատեսում է, որ իրենք պետք է հետաքրքրված լինեն, եւ իսկապես վերահսկողություն իրականացնեն: Եթե իրենք ասում են, որ խախտումներ չեն հայտնաբերել, մենք ասում ենք` հայտնաբերել ենք, եւ կարող ենք մեր ծանր տեղից հասնել Երեւան եւ հերթով բացատրել, թե ինչ հետազոտություններ ենք կատարել, ինչ ենք հայտնաբերել, եւ ապացուցել, որ այսինչ տեղում, այս խախտումն ենք հայտնաբերել: Էլ ի±նչ են մեզնից ուզում: Փաստ է, որ մենք բացահայտում ենք այնպիսի բաներ, որոնք իրենք կամ չեն ուզում, կամ էլ չեն կարողանում բացահայտել: Ինձ միայն մնում է այն կտրոնները հրապարակել, որոնք փաստում են, որ բոլորն անխտիր ստացել են մեր կատարած մոնիտորինգի արդյունքները: Թող ասեն, որ մենք զրպարտում ենք իրենց, ինչ-որ հանցավոր ընկերակցություն ենք (ժպտում է), թող ասեն` չեն ասում, որովհետեւ գիտեն, որ մենք ճիշտ ենք՚:
Նշենք, որ ժուռնալիստների ՙԱսպարեզ՚ ակումբի ուսումնասիրությունը կատարվել է ՙՔաունթերփարթ ինթերնեյշնլի՚ հայաստանյան ներկայացուցչության կողմից իրականացվող ՙՔաղաքացիական հասարակության եւ տեղական ինքնակառավարման աջակցություն՚ ծրագրի եւ ԱՄՆ հարկատուի աջակցության շնորհիվ` ԱՄՆ միջազգային զարգացման գործակալության գործընկերային պայմանագրի շրջանակներում:

ԱՍՏՂԻԿ ՍՈՒՔԻԱՍՅԱՆ