ՀԱՄԱՏԵՂ ՀԱՎԱՔՆԵՐԸ 100 ՏՈԿՈՍԱՆՈՑ ԱՐԴՅՈՒՆՔ ԵՆ ԱՊԱՀՈՎՈՒՄ

Արխիվ 12-16 1 Ապրիլ, 2014 20:00

ՀԱՄԱՏԵՂ ՀԱՎԱՔՆԵՐԸ 100 ՏՈԿՈՍԱՆՈՑ ԱՐԴՅՈՒՆՔ ԵՆ ԱՊԱՀՈՎՈՒՄ

Օրեր առաջ կայացավ հունահռոմեական ոճի ըմբշամարտի Հայաստանի երիտասարդական առաջնությունը, որին մասնակցեցին մոտ 140 ըմբիշներ: Ոսկե մեդալակիրներ դարձան Մուրադ Հարությունյանը (50 կգ), Արթուր Սիմոնյանը (55 կգ), Գեւորգ Ղարիբյանը (60 կգ), Հրանտ Կալաչյանը (66 կգ), Արմեն Հակոբյանը (74 կգ), Վարուժան Գրիգորյանը (84 կգ), Կարեն Աբգարյանը (96 կգ) եւ Էդգար Խաչատրյանը (120 կգ): Թիմը շուտով կսկսի նախապատրաստվել Մոսկվայում կայանալիք միջազգային մրցաշարին: Թիմի մարզավիճակի, առաջնության արդյունքների եւ Եվրոպայի առաջնությանը նախորդող շրջանի մասին ՙԻրավունքի՚ հետ խոսեց հունահռոմեական ոճի ըմբշամարտի Հայաստանի երիտասարդական հավաքականի ավագ մարզիչ ԱՐՄԵՆ ԲԱԲԱԼԱՐՅԱՆԸ:

-Պարոն Բաբալարյան, ամփոփեք ներքին առաջնության արդյունքները, անակնկալներ չեղան, իսկ բացահայտումնե՞ր:
- Բացահայտումներ իհարկե եղան, բայց, դե գիտեք, երիտասարդական հավաքականը փոփոխվում է, մարզիկները գալիս ու գնում են: Որոշ քաշային կարգերում փոփոխություններ եղան: Կային քաշային կարգեր, որտեղ հաղթեցին պատանեկան տարիքից երիտասարդական տարիք մտած ըմբիշները: 55 կգ քաշային կարգում պատանիներից երիտասարդական տեղափոխված մարզիկը դարձավ հաղթող, 60 կգ քաշային կարգի, ինչպես նաեւ 74 կգ քաշային կարգի առաջին եւ երկրորդ մարզիկներն էին ուժեղ...
- Իսկ Մոսկվայում կայանալիք միջազգային մրցաշարից ի՞նչ սպասելիքներ կան:
- Ես մրցաշարից առաջ սպասելիքների մասին ճիշտ չեմ համարում խոսել, սպասելիքներ միշտ եւ բոլորից էլ կան: Այս մրցաշարը մեծահասակների մրցաշար է, բայց ես ուզում եմ, որ երիտասարդները հիմա արդեն սկսեն ուժերը չափել եւ պայքարել մեծերի հետ, որպեսզի հետո իրենց համար հեշտ լինի: Իսկ հենց երիտասարդական առաջնության մասնակցելու համար կմեկնենք Իրան, որտեղ նույնպես միջազգային մրցաշար է նախատեսված:
- Այս պահին ինչպե՞ս կգնահատեք թիմի մարզավիճակը:
- Թիմը ընդհանուր առմամբ լավ վիճակում է: Այս օրերին նրանց հանգիստ եմ տվել, քանի որ արդեն մրցումային տրամադրություն է...
- Մինչ Եվրոպայի առաջնությունը, թիմը կունենա համատեղ հավաք` մեծահասակների հավաքականի հետ, որքանո՞վ են այս հավաքները կարեւոր եւ արդյունավետ:
- 100 տոկոսանոց արդյունք են ապահովում: Դրանք շատ կարեւոր եւ օգտակար հավաքներ են: Տեղի է ունենում փորձի փոխանակում: Եթե այսօր մեր 96 կգ քաշային կարգի մարզիկը Արթուր Ալեքսանյանի հետ չմարզվի ու փորձ ձեռք չբերի նրա հետ պայքարելու, կամ 74 կգ քաշային կարգի մարզիկը չփորձի ուժերը Լեւոն Ջուլֆալակյանի հետ, հետո շատ դժվար կլինի այդ հավաքականում տեղ ունենալը:

ՔՐԻՍՏԻՆԵ ՊԵՏՐՈՍՅԱՆ