ԱՄԵՐԻԿԱԹՈՒՐՔԱԿԱՆ ՍԻՐԱԽԱՂ ՔԵՍԱԲԱՀԱՅԵՐԻ ՕՋԱԽՆԵՐՈՒՄ

ԱՄԵՐԻԿԱԹՈՒՐՔԱԿԱՆ ՍԻՐԱԽԱՂ ՔԵՍԱԲԱՀԱՅԵՐԻ ՕՋԱԽՆԵՐՈՒՄ

Այսօր ՀՀ-ում ԱՄՆ դեսպանատան դիմաց մի խումբ երիտասարդներ իրենց բողոքի խոսքն էին հայտնում ԱՄՆ-ի միջամտությամբ Սիրիայում տեղի ունեցող ավերածությունների եւ հատկապես քեսաբահայության խնդրի հետ կապված: Մասնակիցներից Ալեքս Հարությունյանը մեծ մտահոգություն հայտնեց թուրք-ամերիկյանն դիվանագիտության վերաբերյալ. «Մենք այսօր հավաքվել ենք այստեղ, որպեսզի մեր բողոքի ձայնը հնչեցնենք ԱՄՆ-ի քաղաքական գործիչներին եւ Թուրքիային, որոնք մի քանի դար է ինչ խոչընդոտում են հայերի բնական իրավունքների ընթացքին: Վերջիններիս կողմից հայերը մշտապես խոշտանգվում են, նրանց հիմնական նպատակն է գրավել այն, ինչը հայկական է կամ հայերինն է, կլինեն քաղաքներ, գյուղեր թե ունեցվածք: Այստեղ ենք հավաքվել ի լուր աշխարհի հայտնելու այն մասին, որ մենք` հայերս, չենք պատրաստվում ներել կամ հանդուրժել Թուրքիայի կամ Ամերիկյան նման քայլերը: Թող իմանան, որ այսօրվա դրությամբ Հայաստանից դուրս բնակվող հայերի եւ ՀՀ քաղաքացիների միջեւ մեծ կապ կա, եւ մենք պատրաստ ենք աջակցել նրանց, ինչպես ժամանակին մեզ էին աջակցում»:

Դե իսկ ակցիայի կազմակերպիչներից Լեւոն Հովհաննիսյանն էլ անդրադարձավ Թուրքիայի վարած այսօրվա քաղաքականությանը եւ վերջինիս ԱՄՆ-ի հետ ունեցած սերտ կապերին. «Ինչպես նկատում եք հավաքվել են մոտ  30 քաղաքացիներ: Հարկ է նկատել, որ հավաքված մարդկանց մեջ կան նաեւ Քեսաբի բնակիչներ, որոնք ժամանակին լքելով իրենց տունը եկել են Հայաստան:

Ոմանք կարծում են, որ սա ինչ-որ ռուսական ուղղվածության ակցիա է, սակայն պետք է վհատեցնեմ նման կարծիքներ ունեցողներին ու նշեմ, որ եթե ամբողջությամբ պատկերացնեք հարցի լրջությունը, չեմ կասկածում, որ կանգնած չեք լինի մեր կողքին: Վերջին հաշվով, պետք է հասկանալ, որ Սիրիայի հայկական համայնքը, մեր քրիստոնյա ժողովուրդը ունի մեծ խնդիրներ, որոնք լուծում են պահանջում, մենք այստեղ են Սիրիայի շահերը պաշտպանելու համար: Վստահ ենք, որ ԱՄՆ-ն կարող է մեծ ճնշում գործադրել Թուրքիայի  վրա, որն այսօրվա դրությամբ տեղահանում է խաղաղ ժողովրդի: Շատերի մոտ հարց կառաջանա, թե ինչու ենք բողոքի ակցիա անցկացնում հենց ԱՄՆ-ի դեսպանատան առաջ, պատասխանս կլինի լակոնիկ եւ բոլորի համար հասանելի, նախ Թուրքիան ՆԱՏՕ-ի անդամ է եւ երկրորդ` Թուրքիան եւ ԱՄՆ-ն շատ սերտ գործընկերներ են»:

Չանտեսելով դեսպանատան դիմաց կազմակերպված ակցիայի մասնակիցներին ԱՄՆ փոխդեսպանը պատասխան քայլ կատարեց, մոտենալով հավաքված երիտասարդներին լսեց նրանց պահանջը, առանձին խոսեց նաև քեսաբահայ մասնակիցներից մեկի հետ, ով ներկայացրեց իրական  դրությունը Քեսաբում։

Փոխդեսպանը նշեց, որ հետևում են իրադարձություններին և ԱՄՆ պետդեպարտամենտն արդեն իսկ հայտարարություն է արել և իր մտահոգությունը հայտնել։

Այն հարցին, թե ինչո՞ւ է ԱՄՆ-ն միայն մտահոգություն հայտնում և ոչ թե դատապարտում նման քայլերը, փոխդեսպանը պատասխանեց, որ Պետդեպի հայտարարությունից ավելին չի կարող ասել։

Նա խոստացավ քեսաբահայի մտավախություններն ու իրավիճակը ներկայացնել ԱՄՆ դեսպանին։

ՍՈՍԵ ՉԱՆԴՈՅԱՆ