ՙՙԶԻՆՎՈՐԱԿԱՆ ԹԱՆԳԱՐԱՆԸ ՙՎԵՐԱԶԻՆՎՈՒՄ՚ Է

ԶԻՆՎՈՐԱԿԱՆ ԹԱՆԳԱՐԱՆԸ ՙՎԵՐԱԶԻՆՎՈՒՄ՚ Է

ՙՄայր Հայաստան՚ զինվորական թանգարանը բացվել է 1973 թվականին: Թանգարանի ֆոնդերում պահվում են մոտ 30 հազար ցուցանմուշներ, որոնցից 10 հազարը ցուցադրված է: Թանգարանում գործում է երեք բաժին` նվիրված 1918-1920թթ. ՀՀ Զինված ուժերին, Հայրենական մեծ պատերազմին եւ Արցախյան հերոսամարտին: Թանգարանում են գտնվում Արցախյան ազատամարտի հերոսների անձնական որոշ իրեր, լուսնկարներ, նամակներ: 1995 թվականից թանգարանը ՀՀ մշակույթի նախարարությունից անցել է ՀՀ պաշտպանության նախարարության ենթակայությանը: Այստեղ պարբերաբար կազմակերպվում է տարբեր միջոցառումներ` բաց դասեր, հանդիպումներ, համերգներ: ՙՄայր Հայաստան՚ զինվորական թանգարանի այսօրվա խնդիրների, ձեռքբերումների, ինչպես նաեւ համալրման աշխատանքների մասին ՙԻրավունքը՚ զրուցեց թանգարանի տնօրեն ԱՎԱԳ ՀԱՐՈՒԹՅՈՒՆՅԱՆԻ հետ:

-Ինչպես բոլոր, այնպես էլ մեր թանգարանի համար համալրման աշխատանքները առաջնահերթ խնդիրներից են: Ընդ որում այդ աշխատանքները ե°ւ կարեւոր են, ե°ւ դժվարին: Դժվարին են այն առումով, որ եթե Հայրենական մեծ պատերազմի հետ կապված համալրման գրեթե անելիքներ չունենք` հասկանալի է 50-60 տարիների ընթացքում արդեն նյութերի հիմնական մասը հավաքված է, ապա` մեր գլխավոր խնդիրը Արցախյան ազատամարտի հետ կապված համալրման աշխատանքներն են: Նախ` մեր այն հերոսները, ովքեր պատերազմում զոհվել են, նրանց հարազատները, ընտանիքները շատ դժվարությամբ են հերոսներին պատկանող իրերից հրաժարվում: Սա հասկանալի է, քանի որ հարազատները ցանկանում են այդ իրերը, որպես հիշատակ իրենց մոտ պահել: Իսկ ովքեր, փառք Աստծո, ողջ են, նույնպես իրենց իրերը հիշատակ են պահում` թոռներին ցույց տալու համար: Այս ամենով հանդերձ` 90-ական թվականներից սկսած մինչեւ այժմ, մեր թանգարանի կողմից իրականացրած համալրման աշխատանքների շնորհիվ հնարավոր եղավ մի ամբողջ սրահ, մի ամբողջ հարկ նվիրել բացառապես Արցախյան ազատամարտին եւ ԶՈՒ-ի տարբեր զորատեսակների: Սա լավ առիթ է, որպեսզի դիմեմ բոլոր ազատամարտիկներին, նրանց հարազատներին եւ ընտանիքներին` իրենց ունեցած ցուցանմուշները պետական պահպանության հանձնեն ՊՆ թանգարանին: Մի բան է, որ այդ իրերը տեսնեն միայն նրանց հարազատները, մեկ այլ բան, որ դրանք տեսնի նաեւ ողջ հասարակությունը:

ՙՑՈՒՑԱՆՄՈՒՇՆԵՐԻ ՀԱՄԱԼՐՈՒՄԸ ԱՄԵՆՕՐՅԱ ԱՇԽԱՏԱՆՔ Է՚

-Վերջին մեկ տարվա ընթացքում քանի նմուշով է համալրվել թանգարանը:
- Թանգարանի ցուցանմուշների համալրումը ամենօրյա աշխատանք է, այս առումով կապ ենք պահպանում գրեթե բոլոր հասարակական կազմակերպությունների եւ անհատների հետ: Այս հարցում ծուլանալ մեզ արգելված է, պետք է հետեւողական լինենք: Օրինակ` այս ուրբաթ օրը Հայրենական պատերազմի մասնակցի թոռնիկը թանգարան բերեց նկարներ: Մոսկվայից մեզ այցելել էր լրագրող Դմիտրի Պիսարենկոն, ով որպես լրագրող մասնակցել էր Արցախյան պատերազմին եւ իր անձնական իրերը նվիրեց թանգարանին:

ՙՀԱՍԱՐԱԿՈՒԹՅՈՒՆԸ ՇԱՏ Է ՀԵՏԱՔՐՔՐՎԱԾ ՄԵՐ ԹԱՆԳԱՐԱՆՈՎ՚

-Իսկ հասարակության հետաքրքրությունը ինչպիսի±ն է թանգարանի նկատմամբ:
- Հասարակությունը շատ է հետաքրքրված մեր թանգարանով, յուրաքանչյուր տարի շուրջ 70 օտար պետությունից այցելու ենք ունենում, որոնց թիվը կազմում է 60 հազար: Սրան նպաստում է նաեւ այն, որ շնորհիվ ՊՆ-ի եւ մեր պետության` թանգարանի մուտքը անվճար է ի տարբերություն ԱՊՀ-ում եւ այլուր գործող նմանատիպ ռազմական թանգարանների: Այցելուների առումով մենք թանգարանի ռազմահայրենասիրական քարոզչական հիմնական շեշտը դնում ենք պատանիների եւ երիտասարդների վրա: Ուրախալի է, որ այցելուների գերակշիռ մասը դպրոցականներ են, Զինված ուժերի զորամասերի զինծառայողներ եւ ուսանողներ, թե° քաղաքացիական, թե° ռազմական բուհերից: Ռազմահայրենասիրական քարոզչությունը ավելի շատ տարածելու համար թանգարանը արդեն ստեղծել է իր պաշտոնական կայքը, որն ունի մոտ 80 պետության այցելուներ, ովքեր այս տարբերակով են ծանոթանում թանգարանին, թանգարանի գործունեությանը եւ պատմությանը: Ռազմահայրենասիրական բոլոր թանգարանների հետ մենք սիրով համագործակցում ենք, ցուցաբերում մեթոդական աջակցություն դպրոցների փառքի սրահների եւ թանգարանների ստեղծմանը: Մայիսին Ազատան գյուղում նախատեսված է թանգարանի ստեղծում, որին բոլոր առումներով կցուցաբերենք մեր աջակցությունը: Համագործակցում եւ մեթոդական աջակցություն ենք ցուցաբերում նաեւ ԼՂՀ Ստեփանակերտի թանգարանին:

ՙՀԱՂԹՈՂԻ ԿԵՐՊԱՐԸ ՊԱՐՏԱՎՈՐ ԵՆՔ ԱՎԵԼԻ ԱՄՐԱՊՆԴԵԼ՚

Ըստ Ավագ Հարությունյանի` թանգարանն սկսել է կարեւոր փաստաթղթերի եւ ցուցանմուշների թվայնացման աշխատանքները, ճիշտ է, այստեղ դեռ մեծ ՙնվաճումներ՚ չկան, սակայն աշխատանքերը շարունակվում են եւ շուտով դրանց արդյունքը տեսանելի կլինի: Ավագ Հարությունյանի խոսքով` յուրաքանչյուր տարի մայիսյան հաղթական տոների հետ կապված ամենամեծ, համաժողովրդական միջոցառումը տեղի է ունենում հենց ՙՄայր Հայաստան՚ զինվորական թանգարանում: Թանգարանի ցուցանմուշները պարբերաբար թարմացվում են. ՙՀաշվի առնելով թե° արտաքին, թե° ներքին երեւույթները, նաեւ այն հանգամանքը, որ Արցախյան պատերազմում մենք հաղթել ենք, ապա հաղթողի կերպարը պարտավոր ենք ավելի ամրապնդել սպասվելիք արհավիրքներին դիմագրավելու համար: Անհրաժեշտ է ռազմահայրենասիրական դաստիարակությանը տալ համակարգված բնույթ: Որպեսզի բոլոր ուսումնական հաստատությունները պետության համապատասխան հրահանգով պարտադիր կարգով ծանոթանային թանգարանների ցուցանմուշներին, ինչը նրանց շրջանում կնպաստեր ռազմահայրենասիրական դաստիարակության բարձրացմանը՚,- վերջում հորդորեց Ավագ Հարությունյանը:

ԶՎԱՐԹ
ԽԱՉԱՏՐՅԱՆ