ՙՔԱՂԱՔԱԿԱՆ ՇԱՀԱՐԿՈՒՄՆԵՐ ՄԱՐԴԿԱՆՑ ՃԱԿԱՏԱԳՐԵՐԻ ՀԱՇՎԻՆ

ՔԱՂԱՔԱԿԱՆ ՇԱՀԱՐԿՈՒՄՆԵՐ
ՄԱՐԴԿԱՆՑ ՃԱԿԱՏԱԳՐԵՐԻ ՀԱՇՎԻՆ

Վերջին օրերին, մի շարք թերթեր փորձում են շահարկել գարնանը տեղի ունեցած մի դժբախտ պատահարը, երբ Արարատի մարզի Մխչյան գյուղում վթարի էր ենթարկվել երեքամյա Ալեն Սիմոնյանը, որը, ցավոք, հիվանդանոցում մահացավ: Ինչպես պարզել է քննությունը, երեխան մտել է կանգնած մեքենայի տակ, եւ ղեկին նստած երիտասարդ աղջիկը, մեքենան տեղից շարժելիս չէր կարող ենթադրել, որ մեքենայի տակ երեխա կա: Քննությունը եկավ այն եզրակացության, որ մեքենայի վարորդի գործողություններում հանցակազմ չկա, եւ գործը կարճվել է: Ընդ որում, նույն կարծիքին են նաեւ երեխայի ծնողները, ովքեր այդ որոշումը չեն բողոքարկում: Սակայն արի ու տես, որ որոշ թերթերին վերոհիշյալ գործի տրամաբանական կարճումը հիսթերիայի աստիճանի բորբոքել է, սակայն մտածել, որ իրենց խնդիրը երեխան է, ճիշտ չէր լինի, այստեղ հարցը կրկին քաղաքականության մեջ է: Բանն այն է, որ երիտասարդ վարորդուհին բարեկամական կապ ունի ՀՀ ԱԺ նախագահ Հովիկ Աբրահամյանի հետ եւ որոշ ուժերի կողմից այս դժբախտությունը փորձում են օգտագործել Հովիկ Աբրահամյանի հեղինակությանը վնաս հասցնելու համար: Ամենազարմանալին այն է, որ Հ. Աբրահամյանի վրա պատվերը իջեցվում է իշխանական որոշ շրջանակներին մոտ կանգնած լրատվամիջոցներին, թե ինչ է դա նշանակում, կարելի է միայն ենթադրել: Արդյոք վերադառնում է այն իրավիճակը, երբ իշխանության մեջ ձեւավորվել էին որոշակի թեւեր: Կարծես թե ԱԺ ընտրությունների ժամանակ իշխանական թեւերի բաժանվածությունը հաջողվել էր վերացնել, սակայն ինչպես երեւում է` ՙզինադադարը՚ երկար չտեւեց:
Այս քաղաքական շահարկումների ամենատհաճ կողմը, իհարկե, մարդկային զգացմունքների վրա խաղալն է, չէ± որ ինչպես երեխայի հարազատները, այնպես էլ երիտասարդ վարորդ աղջիկը դեռեւս գտնվում են շատ ծանր հոգեբանական վիճակում, եւ վերոհիշյալ շահարկումները միայն խորացնում են նրանց դժբախտությունը: Սակայն, հավանաբար, քաղաքական նպատակների համար ոմանք կարող են թքած ունենալ մարդկանց զգացմունքների եւ ճակատագրերի վրա:

ԱՐՄԵՆՈՒՀԻ ՀԱԿՈԲՅԱՆ