ԱՅԴՊԻՍԻ ՀԱՆԳԱՄԱՆՔԸ ՈՍՏԻԿԱՆԸ ՉՊԵՏՔ Է ՊԱՐԶԻ

ԱՅԴՊԻՍԻ ՀԱՆԳԱՄԱՆՔԸ
ՈՍՏԻԿԱՆԸ ՉՊԵՏՔ Է ՊԱՐԶԻ

Հյուսիսային պողոտայում գտնվող ՙThat place՚ ակումբում, հուլիսի 23-ին տեղի էր ունեցել հերթական գիշերային ծեծկռտուքը, որն ավարտվել էր համեմատաբար բարեհաջող. պատերազմողներից մեկը թեեւ հայտնվել էր հիվանդանոցում, սակայն նրա կյանքին սպառնացող վտանգ չկա: Ըստ շրջանառվող, նաեւ` տարածված լուրերի տղաների միջեւ կռիվը ծագել էր ՙաղջկա պատճառով՚: Հուսով ենք, որ այս դեպքում տեղի է ունեցել լեզվի սայթաքում, եւ կռվող տղաներից գոնե մեկի համար կռվի պատճառը աղջիկը չէր, այլ, օրինակ, աղջկա պատիվը պահելը: Ոստիկանությունը, անշուշտ, կպարզի միջադեպի հանգամանքները, սակայն որքանո±վ հանրությունն ու լրագրողները պետք է ապավինեն մարդկային պարզ հարաբերությունների իրավական գնահատականին:


ԱՊԱԿԱՆԵԼ ԷՐ ՓՈՂՈՑԸ

ՀՀ ոստիկանությունը լուր է տարածել, որ հուլիսի 22-ին, ժամը 00:30-ին, ոստիկանության ծառայողները Երեւանի Գյուրջյան փողոցից բերման են ենթարկել տաքսի ծառայություններից մեկի վարորդ` 1972թ. ծնված Սուրեն Ա.-ին` ՙBYD՚ մակնիշի տաքսի ավտոմեքենայով: Վերջինս ոստիկանության ծառայողներին նկատելով` ստվարաթղթե փաթեթ է նետել մեքենայի պատուհանից: Փաթեթի մեջ հայտնաբերվել է մոտ… 0,001 գ դեղնականաչավուն կանեփանման զանգված, որը ոստիկանության ծառայողների կողմից ներկայացվել է բաժին:


ՀԻՆԳԵՐՈՐԴ`
ՉԱՐԱԲԱՍՏԻԿ ՍԵՂԱՆԻԿԸ

Հուլիսի 21-ին, ժամը 16:30-ին, ոստիկանության ծառայողները գողություն կատարելու կասկածանքով, Երեւանի Արամի փողոցին հարակից ՙՎերնիսաժ՚ տոնավաճառից բերման էին ենթարկել 1962թ. ծնված Արտաշես Ն.-ին, որի մոտ հայտնաբերվել է արծաթյա 6 մատանի, 2 զույգ ականջօղ եւ փայտյա զարդատուփ: ՙԿասկածանքով՚ որակումը, կարծես թե, տեղին չէ, քանի որ տոնավաճառի 4 վաճառասեղանների մոտ ՙհյուրընկալվելուց՚ հետո, Արտաշեսը 5-րդ սեղանից գողություն կատարելու ժամանակ բռնվել էր:


ԿԼԵՊՏՈՄԱՆԻԱ

Ոստիկանության Գյումրիի բաժնի 2-րդ բաժանմունքի ծառայողները կասկածամտությամբ չեն տառապում: Նրանց համար արդեն իսկ պարզից պարզ է, որ իրենց կողմից հետախուզվող 1975թ. ծնված Արմինեն վերջին մեկ ամսում հյուրընկալվել էր երեք ծանոթների տներում եւ այդ տեղերից գողացել... կանացի կոշիկներ, թեյի սպասք, ափսեներ եւ բաժակներ:

Ա. ԱԲԳԱՐՅԱՆ