ՄԻԹԵ ՔԱՂԱՔԱՊԵՏԱՐԱՆԻ ԱՇԽԱՏԱԿԱԶՄՈՒՄ ԾՊՏՅԱԼ ԱՂԱՆԴԱՎՈՐ ԿԱ...

ՄԻԹԵ ՔԱՂԱՔԱՊԵՏԱՐԱՆԻ ԱՇԽԱՏԱԿԱԶՄՈՒՄ ԾՊՏՅԱԼ ԱՂԱՆԴԱՎՈՐ ԿԱ...

ՙԻրավունքի՚ երեկվա համարում ներկայացրել էինք այն, որ ՙՄիացյալ երիտասարդական լիգա՚ կազմակերպությունը, հուլիսի 25-ին ցանկանալով հանրահավաք կազմակերպել Հայաստանում աղանդավորական շարժման դեմ, որի համար դիմել էին քաղաքապետարան հուլիսի 19-ին, ստացել է մերժողական պատասխան: Նախ` սկզբում քաղաքապետարանը տվել է իր համաձայնությունը, որպեսզի հանրահավաքն անցկացնեն Ազատության հրապարակի փոխարեն Վարդան Մամիկոնյանի արձանի հարեւանությամբ, իսկ այնուհետ երկու օր առաջ զանգահարել են վերը նշված կազմակերպության անդամներին եւ հայտնել, որ ընդհանրապես թույլ չեն տալիս, որ այդ հանրահավաքն անցկացվի որեւէ տեղ` պատճառաբանելով, որ դիմումը ուշ են ներկայացրել, այն էլ այն դեպքում, որ դիմումը ընդունել են եւ ասել, որ դիմումին ընթացք կտրվի: Երեկ, երբ դիմեցինք քաղաքապետարան կոնկրետ պատճառը իմանալու համար, հասարակայնության հետ կապերի վարչության պետ ԱՐԹՈՒՐ ԳԵՎՈՐԳՅԱՆԸ մեր հարցից ՙզարմացած՚ պատասխանեց. ՙԴե ուրեմն ինչ-որ խնդիր կա, որ թույլ չեն տվել: Ես դրանից ոչ մի տեղեկություն չունեմ, հետեւաբար ոչ մի պատասխան չեմ կարող տալ, բայց կարծում եմ, ներկայացված հիմքերը բավարար չեն եղել: Դուք գրավոր դիմեք եւ ձեզ գրավոր կպատասխանի այն բաժինը, ով տալիս է հանրահավաքի թույլտվությունը: Ես չեմ այդ որոշումներ կայացնողը, որ հիմա պատասխան տամ, դրա համար գրավոր դիմեք օրենքով սահմանված կարգով` կստանաք պատասխանը: Այդ կազմակերպությունը դիմել է քաղաքապետարանի աշխատակազմին՚:
Դե հա իհարկե, հիմա էլ քաղաքապետարանը մի 5 օրում, լավագույն դեպքում կփորձի մի բան մտածել ու հետին թվով գրավոր պատասխանել մեզ, մինչեւ կանցնի հուլիսի 25-ը, իսկ հետո էլ անմեղ դեմքով կփորձի արդարանալ, թե իրենք գործում են օրենքի սահմաններում: Լավ, տեսնես քաղաքապետարանի աշխատակազմի անդամներից ո±ւմ դուր չի եկել, կամ ո±ւմ կրոնական համոզմունքներն է ոտնահարվում այս հակաաղանդավորական հանրահավաքի գաղափարը, որ միամիտ պատկերացրել է, թե ինչ կարող է տեղի ունենալ հանրահավաքից հետո: Այս ամենը պարզ կդառնա առաջիկայում, եւ մենք հետեւողական կլինենք:

ԱՐՄԵՆՈՒՀԻ ՀԱԿՈԲՅԱՆ