ՍՈՎԵՏԱԿԱՆ ՀԱՅԱՍՏԱՆՈՒՄ ԳՈՄԻԿՆԵՐԻ ԱԿՈՒՄԲՆԵՐ ՉԷԻՆ ԲԱՑՈՒՄ

ՍՈՎԵՏԱԿԱՆ ՀԱՅԱՍՏԱՆՈՒՄ ԳՈՄԻԿՆԵՐԻ ԱԿՈՒՄԲՆԵՐ ՉԷԻՆ ԲԱՑՈՒՄ

ՙԵրբեւիցե փորձել եք հասկանալ ձեր հայրիկներին, պապիկներին: Նրանց սիրտը պայթում է, ձեռքները ճար չկա, իսկ սովետական ժամանակ այսպես չէր՚,- հուլիսի 19-ին կայացած ասուլիսի ժամանակ նշել է Հայաստանի Կոմունիստական կուսակցության կենտկոմի առաջին քարտուղար ՌՈՒԲԵՆ ԹՈՎՄԱՍՅԱՆԸ:

Նա մի քանի անգամ հայտարարել է այն մասին, որ մեր երկրի այսօրվա վիճակը չի կարող համեմատվել այն ամենի հետ ինչ կար առաջ. ՙՉկային աղքատներ, չկար գործազրկություն, երեխաներին մանկուց դաստիարակում էին բարոյական նորմերին համաձայն, այլ ոչ թե բացում էին ակումբներ համասեռամոլների համար՚: Ռուբեն Թովմասյանն կոմունիսներին չի համարում ընդդիմություն նշելով. ՙՄենք ընդդիմություն ենք, բայց ընդդիմությանն էլ ենք ընդդիմություն, քանի որ նրանք չունեն սոցիալիստական հիմունքներ: Մեզ ձախ են ասում, բայց մեր գործը աջ է: Կոմունիստական սոցիալիստական համակարգը չէր հանդուրժի, որ մեկն ունենար չորս դղյակ, իսկ մյուսը մինչեւ օրս ապրեր վագոնում՚:
ՀԿԿ-ի միակ ցանկությունն է վերադառնալ Սովետական Հայաստան, ժողովրդին տալով աշխատանք եւ արդարություն, արմատախիլ անելով օլիգարխներին, վերականգնելով սովետական դատարանը` եվրոպականին դիմելու փոխարեն: ՀԿԿ նախագահը խոսեց նաեւ այն մասին, թե ինչպես է կոմունիստական համակարգն արդեն մեկ անգամ ոտքի հանել Հայաստանը, ցանկանալով, որ այս անգամ կատարվի նույնը. ՙՍոցիալիստական երկրներն ամբողջ աշհարհում այսօր շատ լավ են ապրում, եւ մենք նույնպես պետք է վերացնենք աղքատության ցուցանիշը, որը կազմում է 30-40 տոկոս՚,- կոմունիստներին հատուկ համառությամբ հայտարարեց ընկեր Թովմասյանը:
ՙԻրավունքի՚ այն հարցին, թե ինչ սպասելիքներ ունեն նախագահական ընտրություններից, եթե առաջադրվեն, Ռ. Թովմասյանը հայտարարեց. ՙԵթե թույլ տան, ապա կհաղթեմ՚:

ԼՈՒՍԻՆԵ ՇԱՐԲԱԹՅԱՆ