ՙՄԱՀՃԱԿԱԼՆ ԻՆՉ Է, ԴԱ ԷԼ ՉԿԱ՚

ՙՄԱՀՃԱԿԱԼՆ ԻՆՉ Է, ԴԱ ԷԼ ՉԿԱ՚

Վերջերս Արդարադատության նախարար Հրայր Թովմասյանը անընդհատ հանդես է գալիս ասուլիսներով եւ հայտարարում, որ անցնում են հերթական դատաիրավական բարեփոխումների փուլին եւ, սկսած քրեական օրենսգրքից, բոլոր օրենսգրքերում լուրջ փոփոխություններ են կատարվելու: Բայց մինչ տրվում են մեկը մյուսից ճոխ ՙբարեփոխիչ՚ խոստումներ, համակարգում այդպես էլ չի լուծվում մեկ չափազանց կնճռոտ խնդիր: Այդ մասին հերթական անգամ ահազանգեցին անազատության մեջ գտնվողների հարազատներից: Բողոքները այն մասին են, որ մեկուսարանում գտնվող կալանավորների կենսապայմանները, ինչպես իրենք են նշում` ՙանտանելի վիճակում՚ են:
Ներկայացնենք այդ բողոքներից մի քանիսը. ՙՏղաս նախնական կալանքի տակ է: Կատարել է հանցանք ու պետք է պատասխան տա: Բայց որտե±ղ է գրված, որ կալանավորը հասարակ սանիտարահիգիենիկ պայմաններ չունենա: Քնելու մահճակալն ի±նչ է, դա էլ չկա, պետքարանից օգտվելու համար ժամերով պետք է սպասեն՚:
Իսկ մեկ ուրիշը` տիկին Մարիամը, այսպես նկարագրեց. ՙԱմուսինս գտնվում է ՙՆուբարաշեն՚ ՔԿՀ-ում: Պատմում է, որ մեկ ժամ մահճակալի վրա քնելու համար զառ են քցում, կարտ խաղում, ով կրեց, նա էլ մի ժամ կարող է մարդավարի քնել: Եթե խցում օրենքով 7-8  հոգի պետք է մնան, մոտ 10-13 հոգի են` իրար գլխի լցված: Հիգիենիկ պայմանների մասին էլ չեմ խոսում, անտանելի են՚:
Զրուցակիցներիս պատմածների ճշմարտացիության մեջ համոզվելու համար դիմեցինք ՀՀ ԱՆ ՔԿՎ հանրային կապերի բաժնի պետի ժամանակավոր պաշտոնակատար ԳՈՌ ՂԼԵՉՅԱՆԻՆ:
- Պարո°ն Ղլեչյան, ներկա դրությամբ ՀՀ-ում քանի± մարդ կա անազատության մեջ:
- Անազատության մեջ գտնվող մարդկանց թիվը ստույգ չեմ կարող ասել, քանի որ այն օր-օրի, ժամ առ ժամ կարող է ավելանալ կամ` հակառակը: Հուլիսի 14-ի դրությամբ կալանավորների եւ դատապարտյալների թիվը 4684 էր:
- Ասում են` մեկուսարաններն այսօր գտնվում են գերծանրաբեռնված վիճակում, խցերում բանտարկյալների թիվը շատ ավելին է, քան նախատեսված է օրենքով սահմանված կարգով: Արդյոք դա այդպե±ս է, եթե այո, ապա ի±նչն է դրա պատճառը, եւ ի±նչ է արվում այդ ուղղությամբ:
- Այո°, իրոք այսօր մեկուսարանները գտնվում են ծանրաբեռնված վիճակում, հատկապես ՙՆուբարաշեն՚ ՔԿՀ-ի մասին է խոսքը: Իրոք խնդիր կա կալանավորների տեղավորման մեջ: Բայց այդ ամենը շտկելու համար աշխատանքներ, անկասկած, տարվում են: Կառուցվում է ՙԱրմավիր՚ ՔԿՀ-ն, որտեղ ներկայումս կատարվում են շինարարական աշխատանքներ: Նախատեսվում է, որ կառուցվող ՔԿՀ-ն շահագործման կհանձնվի 2014թ.-ին, որից հետո նման խնդիրներ այլեւս չենք ունենա, եթե, իհարկե, հանցագործները էլ ավելի չշատանան:
Փաստորեն, իրոք խնդիրն առկա է, որի մասին չխուսափեց բարձրաձայնել նաեւ համապատասխան վարչությունը: Բայց, կարծես թե, դա շատ բնականոն են համարել մեր պետական այրերը: Այո°, խնդիր կա, եւ այն խոստանում են լուծել միայն 2014թ.-ին, իսկ իրականում կլուծեն, թե չէ, դեռ հարց է: Լավ, ասենք 2014թ.-ին իրոք կկառուցեն նոր կալանավայր: Բայց չէ± որ առջեւում դեռ երկու տարի կա, եւ մահճակալ չունեցող կալանավորներն այդ ընթացքում ոտքի վրա± պետք է քնեն: Եվ մի±թե մարդուն դատարանը կոնկրետ ժամանակահատված կալանավայրում չի մեկուսացրել, այլ ոչ թե դատապարտել է նաեւ այդ ժամանակահատվածն առանց նորմալ քնելու անցկացնել: Ընդ որում կալանավայրում քնելու կոնկրետ ժամանակահատվածը սահմանված է նաեւ ներքին ռեժիմով, ինչը խախտելը համարվում է պատժելի արարք: Իսկ դա նշանակում է, որ խցերի գերբեռնվածությունը նաեւ մի շարք նորմերի խախտում է նշանակում: Ուրեմն այդ ո±ր իրավունքով է, որ արդարադատության նախարարի գիտությամբ ՔԿՀ-ն կալանավորներ է ընդունում, երբ նախապես գիտեն, որ տվյալ հիմնարկում նույնիսկ քնելու տեղ չեն ապահովելու կալանավորների համար:

ԻԼՈՆԱ ԱԶԱՐՅԱՆ