ՙԱՆԺԵԼԱՆ ԱՅԼԵՎՍ ՈՐԵՎԷ ՄԵԿՆԱԲԱՆՈՒԹՅՈՒՆ ՉԻ ՊԱՏՐԱՍՏՎՈՒՄ ՏԱԼ՚

ՙԱՆԺԵԼԱՆ ԱՅԼԵՎՍ ՈՐԵՎԷ ՄԵԿՆԱԲԱՆՈՒԹՅՈՒՆ
ՉԻ ՊԱՏՐԱՍՏՎՈՒՄ ՏԱԼ՚

Դերասանուհի Անժելա Սարգսյանի պոռնկագրական բնույթի սկանդալային լուսանկարները տարածելու եւ նրա ընտանեկան գաղտնիքը բացահայտելու մեջ մեղադրվող Կարեն Արայանը, ինչպես հայտնի է, հուլիսի 18-ի առավոտյան ՙՆուբարաշեն՚ ՔԿՀ-ում կարել է բերանը եւ հայտարարել անժամկետ հացադուլ:
Մինչ հացադուլի անցնելը Կարեն Արայանը Հայաստանի նախագահին, Գլխավոր դատախազին, Մարդու իրավունքների պաշտպանին, Արդարադատության նախարարին եւ ԱԺ նախագահին ուղղված բաց նամակ է ուղարկել բանտից, պնդելով, թե. ՙԵս` Կարեն Արայանս, անհիմն մեղադրվում եմ դերասանուհի Անժելա Սարգսյանի պոռնկագրական բնույթի սկանդալային լուսանկարը տարածելու եւ նրա ընտանեկան գաղտնիքը բացահայտելու մեջ, այսինքն` ՀՀ Քրեական օրենսգրքի 263-րդ հոդվածի 1-ին մասով եւ 144-րդ հոդվածով: Ողջ մեղադրանքը հիմնված է շինծու ապացույցների եւ դերասանուհու ոչ ճիշտ որակած փաստերի վրա: Ես պնդում եմ, որ այդ արարքը կատարել է հենց ինքը` Անժելա Սարգսյանը, սակայն մինչ այսօր չի ստուգվել նույնիսկ նրա համակարգիչը… Ես ինձ մեղավոր չեմ ճանաչել ու չեմ ճանաչում, քանի որ ես ոչ մի պոռնկագրական բնույթի լուսանկար ոչ մեկին, ոչ մի կերպ չեմ փոխանցել ու չեմ ցուցադրել՚:
Սա նշանակում է, որ մի կողմից Կ. Արայանը հենց Անժելային է մեղադրում այն հանցագործության մեջ, որի համար իրեն ամիսներ շարունակ ՙփակել՚ են: Մյուս կողմից էլ, ըստ էության, քննությունը դիտավորյալ սխալ ուղղությամբ տանելու մեղադրանքներ է հասցեագրված նախաքննական մարմիններին: Հասկանալի է, այս մեղադրանքների պարագայում կրկին առաջ է գալիս Անժելա Սարգսյանի պարզաբանումները լսելու անհրաժեշտություն: Սակայն մեր հեռախոսազանգին պատասխանեց մի կին, ով չցանկացավ ներկայանալ, միայն բարկացած ասաց. ՙԱնժելան այլեւս որեւէ մեկնաբանություն չի պատրաստվում տալ, հանգիստ թողեք նրան՚:
Վերոնշյալի հետ կապված փորձեցինք կապվել Անժելայի ՙտղամարդու՚ մոր` Մարինա Արայանի հետ: Նա, սակայն, ասելով, որ գտնվում է հոգեպես ճնշված վիճակում, միայն մեկ նախադասություն հավելեց.
- Արդարություն է ուզում Կարենս, ուրիշ ոչինչ, էլ չենք դիմանում էս կեղծիքին:
Իսկ արդեն օրվա վերջում ՀՀ ԱՆ ՔԿՎ հանրային կապերի բաժնի պետի ժամանակավոր պաշտոնակատար ԳՈՌ ՂԱԼԵՉՅԱՆԻՑ տեղեկացանք. ՙԿարեն Արայանը շարունակում է գտնվել հացադուլի մեջ, միայն բերանի կարերն է  քանդել: Առողջական վիճակը նորմալ է, գտնվում է բժիշկների հսկողության տակ` առանձին խցում: Ընդհանուր առմամբ Կարենը իրեն նորմալ է դրսեւորում կալանավայրում, որեւէ ագրեսիա չի նկատվել վերջինիս կողմից՚:

ԻԼՈՆԱ ԱԶԱՐՅԱՆ