ՙՇԵՐԻՖՆ՚ ԱՆԽՈՑԵԼԻ Է

ՙՇԵՐԻՖՆ՚ ԱՆԽՈՑԵԼԻ Է

Երեկ Երեւանի ՙՈւլիսը՚ նորամուտը նշեց Չեմպիոնների լիգայում` 0:1 հաշվով պարտվելով մոլդովական ՙՇերիֆին՚: Պատասխան հանդիպումը կկայանա հուլիսի 24-ին:
իշեցնենք, որ եվրոպական գավաթների մրցաշարերում հայկական ակումբներին 5-րդ անգամ հարկ եղավ մրցել մոլդովական թիմերի հետ: Հետաքրքիր է, որ նախորդ խաղարկություններում մեր ակումբների մրցակիցները եղել են տիրասպոլյան թիմերը, եւ վիճակահանությամբ 3-րդ անգամ են հատվում մեր ակումբների ճանապարհները Մոլդովայի բազմակի չեմպիոն ՙՇերիֆի՚ հետ: ՙՇերիֆն՚ առաջին անգամ Հայաստան է ժամանել 2001թ., երբ Չեմպիոնների լիգայի որակավորման առաջին փուլում ՀՀ չեմպիոն Արարատի ՙԱրաքսի՚ մրցակիցն էր: ՙԱրաքսը՚ մրցաշրջանի սկզբում փոխել էր գրանցումը` դառնալով երեւանյան թիմ (առաջնության 2-րդ շրջանի շեմին թիմը վերանվանվեց ՙՍպարտակ՚), եւ առաջին խաղում Վարուժան Սուքիասյանի սաներին այդպես էլ չհաջողվեց գտնել մրցակցի դարպասի բանալին: Իսկ հյուրերը 61-րդ րոպեին խփած միակ գոլի շնորհիվ հաղթեցին: Մեկ շաբաթ անց Տիրասպոլում կայացած պատասխան խաղում ՙՇերիֆը՚ հաղթեց 2:0 հաշվով:
5 տարի անց ՙՇերիֆը՚ ՙՀանրապետական՚ մարզադաշտում նորից կարողացավ անառիկ պահել իր դարպասը` 0:0 ավարտելով հանդիպումը Սամվել Պետրոսյանի գլխավորած ՙՓյունիկի՚ հետ: Սեփական հարկի տակ ՙՇերիֆը՚ կրկին հաղթեց 2:0 հաշվով: Ինչպես տեսնում ենք, մինչ երեկ հայկական ակումբներն անհաջող էին խաղացել ՙՇերիֆի՚ դեմ` 4 հանդիպումներում չկարողանալով գտնել մրցակցի դարպասի բանալին:
Ինչպես հայտնի է, թիմի կազմն ուժեղացնելու նպատակով ՙՈւլիսում՚ ընդգրկվել են ՙՄիկայի՚ փորձառու դարպասապահ Գեւորգ Կասպարովն ու կիսապաշտպան Աղվան Մկրտչյանը, որոնք երկուսն էլ վնասվածքի պատճառով չկարողացան մասնակցել հանդիպմանը: Նորայր Սահակյանն ՙՈւլիսի՚ ներկայիս ֆուտբոլիստներից բոլորից շատ` 14 խաղ է անցկացրել եվրագավաթներում: 12 խաղի մասնակից է Արտյոմ Ադամյանը, 11` Դավիթ Գրիգորյանը:
Հիշեցնենք, որ Եվրոպա լիգայում Գյումրիի ՙՇիրակը՚ հաղթահարեց առաջին արգելքը եւ հուլիսի 19-ին մրցելու է Իսրայելի ՙԲնեյ-Եհուդայի՚ հետ: Խոսելով մրցակցի մասին` գյումրեցիների գլխավոր մարզիչ ՎԱՐԴԱՆ ԲԻՉԱԽՉՅԱՆԸ նշել է, որ իր տրամադրության տակ ունի ՙԲնեյ Եհուդայի՚ մի քանի հանդիպման տեսագրություն. ՙԻ տարբերություն ՙՌուդարի՚, ՙԲնեյ Եհուդայի՚ կազմում կան անհատապես ուժեղ ֆուտբոլիստներ: Մասնավորապես, խոսքը Դինո Նդլովուի ու Պեդրո Գալվանի մասին է՚:
Հայաստանի հավաքականի ամենաարդյունավետ խաղացող ԱՐԹՈՒՐ ՊԵՏՐՈՍՅԱՆԸ վերջին տարիներին աշխատում է շվեյցարական ՙՑյուրիխում՚` մարզելով այդ ակումբի մինչեւ 18 տարեկանների թիմը: Պետրոսյանը լավ է ծանոթ շվեյցարական ՙՍերվետին՚, որը Կապանի ՙԳանձասարի՚ մրցակիցն է Եվրոպա լիգայի որակավորման 2-րդ փուլում. ՙԹիմը ֆինանսական խնդիրներ ուներ ու սնանկացման եզրին էր, սակայն վերջին պահին փրկեցին: ՙՍերվետը՚ վատ հանդես չեկավ Շվեյցարիայի նախորդ առաջնությունում` գրավելով 4-րդ տեղը: Թիմն ունի լավ հարձակվողներ, որոնցից շատ վտանգավոր է Գորան Կարանովիչը: ՙՍերվետի՚ պաշտպանությունն էլ հայտնի է ուժեղ խաղով: Ստանդարտների ժամանակ էլ շատ վտանգավոր են գործում՚:
Գյումրեցի մասնագետը կարծում է, որ հուլիսի 19-ին Ժնեւում կայանալիք հանդիպմանը տրիբունաները լեփ-լեցուն չեն լինի. ՙԺնեւում ֆուտբոլասերներն ակտիվ չեն: Առաջիկա խաղին 3-9 հազար ֆուտբոլասեր ներկա կլինի՚:  

Պատրաստեց Ռ. ԹԱԹՈՅԱՆԸ