ՙՙԴԻԱԿ` ԵՐԵՎԱՆՅԱՆ ԼՃՈՒՄ

ԴԻԱԿ` ԵՐԵՎԱՆՅԱՆ ԼՃՈՒՄ

Հուլիսի 15-ին, ժամը 19:40-ին, ոստիկանության Շենգավիթի բաժնում  հաղորդում էր ստացվել, որ Երեւանյան լճում տղամարդու դիակ կա: Ահազանգով մեկնած օպերատիվ խումբը ՙԼճափ՚ բենզալցակայանի հետնամասում` Երեւանյան լճի ափամերձ հատվածում, հայտնաբերել էին մոտ 50-60 տարեկան, անձը չպարզված, արական սեռի կիսաքայքայված դիակ, որի հագին եղել է մուգ կապույտ վանդակավոր վերնաշապիկ, շագանակագույն տաբատ եւ սեւ կոշիկներ:
Արտաքին զննությամբ` դիակի վրա բռնության հետքեր չեն հայտնաբերվել:
Նշանակվել է դատաբժշկական փորձաքննություն:


ԿԱՅԾԱԿՆԱՅԻՆ ԲԱՑԱՀԱՅՏՈՒՄ

Հուլիսի 13-ի լուսադեմին ոստիկանության Սպիտակի բաժին ահազանգ էր ստացվել, որ ՙԱրմենՏել՚ ՓԲ ընկերության Սպիտակի կապի հանգույցի վրա կատարվել է ավազակային հարձակում: Երկու դիմակավորված անձինք բաց պատուհանից  մտել էին ընկերության գրասենյակ եւ դանակով ու պտուտակահանով սպառնալովª կպչուն ժապավենով աստիճանավանդակին կապել անվտանգության  աշխատակցին, ապա վաճառասրահի պահարաններից հափշտակել բջջային հեռախոսներ եւ  նոթբուք համակարգիչ:
Ոստիկանության Լոռու մարզային վարչության եւ Սպիտակի բաժնի աշխատակիցների ձեռնարկած միջոցառումների շնորհիվ դեպքից ժամեր անց ավազակային հարձակումը բացահայտվեց: Հանցագործությունը կատարելու  կասկածանքով ոստիկանության Սպիտակի բաժին բերման էր ենթարկվել Սպիտակի 22-ամյա մի բնակիչ: Խոստովանելով հանցանքն, այդ անձը հրաժարվել էր մատնանշել ընկերոջը: Սակայն ժամեր անց, հանցագործությունը պարտակելու կասկածանքով, ոստիկանություն բերման ենթարկվեց սպիտակցի 23-ամյա երիտասարդ, ում բնակարանում էին թաքցվել հեռախոսներն ու համակարգիչը:
Պարզվեց նաեւ անհայտ հանցակցի ինքնությունը. բացատրական աշխատանքների շնորհիվ նա հուլիսի 15-ին կամավոր ներկայացել էր  ոստիկանության Սպիտակի բաժին:

Ա. ԱԲԳԱՐՅԱՆ