ՙՙՎԵՐՋԻՆ ՏԻՐՈՒՀՈՒ՚ ՆՈՐ ՀԱՆՑԱԳՈՐԾՈՒԹՅՈՒՆՆԵՐԸ

ՙՎԵՐՋԻՆ ՏԻՐՈՒՀՈՒ՚ ՆՈՐ ՀԱՆՑԱԳՈՐԾՈՒԹՅՈՒՆՆԵՐԸ

Հայտնի կավատ` ՙՎերջին տիրուհի՚ մականունով 45-ամյա Գոհար Կիրակոսյանը, ՀՀ իրավապահների կողմից հետախուզվում է դեռեւս 2008թ.-ից: Նա կասկածվում է հայ աղջիկներին Թուրքիա տեղափոխելու եւ նրանց պոռնկությամբ զբաղվելու մեջ ներգրավելու համար: Նա ամուսնացել է Թուրքիայի քաղաքացու հետ, ապա ձեռք է բերել այդ երկրի քաղաքացիություն եւ ստացել Գոհար Կիլինչ ազգանունը: Ինչը եւ ոչ միայն փաստացիորեն զրկել է ՀՀ իրավապահ մարմիններին նրան Հայաստան բերման ենթարկելու հնարավորությունից, այլեւ նրա համար ստեղծվել են նպաստավոր պայմաններ մի շարք հայ կանանց եւ աղջիկների սեռական շահագործման ենթարկելու համար` հաճախ կյանքի համար վտանգավոր բռնություն գործադրելու միջոցով:
Հարկ է նկատել, որ վերջերս Թուրքիայում նրա գործողություններից տուժած երկու աղջիկների հաջողվել է փախչել եւ հասնել Հայաստան: Իսկ թե ինչի մեջ է այս անգամ ներքաշել իր հերթական զոհերին Գոհար Կիլինչը, փորձեցինք պարզել Կազմակերպված հանցավորության դեմ պայքարի գլխավոր վարչության Թրաֆիքինգի դեմ պայքարի բաժնի պետ ՌՈԲԵՐՏ ԳՐԻԳՈՐՅԱՆԻՑ:
- ՀՀ ոստիկանության ԿՀԴՊԳՎ ծառայողների կողմից ձեռնարկված միջոցառումների շնորհիվ պարզվել է, որ 2011թ. հունվար-մարտ ամիսներին 1992թ. ծնված Մ-ին ծանոթը նախ` առաջարկել, այնուհետեւ համոզել է մեկնել Թուրքիա` վերջինիս ծանոթ ոմն Գոգայի մոտ բարձր աշխատավարձով որպես պարուհի աշխատելու համար:
Մ-ն Թուրքիա մեկնելու մտադրության մասին պատմել է իր ընկերուհուն` 1990թ. ծնված Հ-ին, ով նույնպես ցանկություն է հայտնել մեկնել Թուրքիա` աշխատելու:
2011թ. ապրիլին Մ-ն եւ Հ-ն ավտոբուսով մեկնել են Թուրքիա:
Թուրքիայի Անկարա քաղաքում Գոգան, նույն ինքը` Գոհար Շահենի Կիրակոսյանը (ներկայումս` նաեւ Թուրքիայի քաղաքացի Գոհար Կիլինչը), վերցնելով վերջիններիս անձնագրերը, նրանց ստիպել է զբաղվել մարմնավաճառությամբ` տիրանալով վաստակած գումարներին:
Նախապատրաստված նյութերով հարուցվել է քրեական գործ ՀՀ քր. օր-ի 132 հոդվածի 2-րդ մասի հատկանիշներով: Կատարվում է նախաքննություն:
Նշեմ նաեւ, որ մինչ այս դեպքը, Գոհարի կողմից կատարված հանցագործությունների փաստով քննչական գործողություններ են կատարվել նաեւ Թուրքիայում, քանի որ նա փաստացի Թուրքիայի քաղաքացի է:

ԻԼՈՆԱ ԱԶԱՐՅԱՆ