ԻՆՔՆԱՍՊԱՆՈՒԹՅՈՒՆ, ԹԵ...

ԻՆՔՆԱՍՊԱՆՈՒԹՅՈՒՆ, ԹԵ...

Հուլիսի 12-ին, Կոտայքի մարզի Առինջ գյուղում հերթական ինքնասպանության դեպքն է գրանցվել: Այս մասին հայտնել են ոստիկանության լրատվական ծառայությունից: 21-ամյա Մարո Գուլոյանը ինքնասպանություն է գործել կախվելու միջոցով:
Ըստ տարածված տեղեկությունների` Մարոն ունի 2 տարեկան մեկ դուստր, 4 ամսական հղի էր: Հարազատները պատմել են, որ մահվանից 20 րոպե առաջ Մարոն զանգահարել է իր զույգ եղբորը` Մհեր Թովմասյանին, կանչել եւ ասել, որ ուզում է բաժանվել ամուսնուց: Խնդրել է երեկոյան ծնողների հետ գալ իր եւ երեխայի հետեւից: Եղբոր գնալուց 20 րոպե հետո հարազատներին տեղեկացրել են, որ Մարոն ինքնասպանության փորձ է արել, եւ նրան տեղափոխել են հիվանդանոց, որտեղ աղջիկը մահացել է:
Հայտնի է, որ Մարոյի ամուսինը ԱԺ պատգամավոր Մուրադ Գուլոյանի ազգականն է: Աղջկա հարազատները չեն հավատում ինքնասպանության վարկածին, կասկածում են, որ Մարոյին խեղդել է ամուսինը: Բանն այն է, որ շրջանառվում են նաեւ խոսակցություններ, որ աղջկա ամուսինը կտրուկ դեմ էր ամուսնալուծվելուն` համարելով, թե դա պատվի խնդիր է: Չնայած, որ իրադարձությունների հետ որոշ առնչություն ունեցողներ ուշադրություն են հրավիրում նաեւ այն հանգամանքի վրա, թե ինչպե±ս ստացվեց, որ Մարոն եղբոր հետ միասին չգնաց, այլ նրան խնդրեց իր ետեւից գալ երեկոյան` ծնողների հետ: Այսինքնª ծնողներին սպասող աղջիկն  ինչո±ւ պետք է իր վրա ձեռք բարձրացներ, եթե գտել էր իր խնդիրների լուծման ելքը` ամուսնալուծությունը...
Ոստիկանության լրատվության եւ հասարակայնության հետ կապերի վարչությունից տեղեկացանք, որ դեպքի առթիվ Կոտայքի մարզի քննչական բաժնում հարուցվել է քրեական գործ` 110 հոդվածի առաջին մասի հատկանիշներով (ինքնասպանության հասցնելը): Այդ հոդվածի առաջին մասով սահմանվում է սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը, այն պատժվում է ազատազրկմամբ` առավելագույնը երեք տարի ժամկետով: Փաստի առթիվ նշանակվել է դատաբժշկական փորձաքննություն, կատարվում է նախաքննություն:
Վերոնշյալ ընտանիքի մասին կարծիք իմանալու ակնկալիքով դիմեցինք Առինջի գյուղապետ ԳԱԳԻԿ ՍԱՐԳՍՅԱՆԻՆ, ով անհասկանալի վրդովված տոնով ասաց. ՙԵս ի±նչ իմանամ` ինչ է եղել, բանուգործ չունե±ք, նստել եք, մարդկանց դժբախտության մանրամասներն եք փորփրում: Նորմալ, աշխատող ընտանիք է, երբեք նրանցից բողոք չենք լսել, ղալմաղալներ չեն արել: Ընտանիքը մութ անտառ է, ոչ մեկը Ձեզ ստույգ ոչինչ չի կարող ասել, որովհետեւ շատ փակբերան ընտանիք էր: Եթե ես գյուղապետ եմ, դա չի նշանակում, որ բոլոր ընտանիքների կոնֆլիկտների պատճառները պետք է իմանամ՚:
Իսկ մեր այն հարցին, թե ամուսինը կնոջը կարո±ղ էր հասցնել ինքնասպանության կամ ինքը սպաներ, համայնքապետն այսպես պատասխանեց. ՙԷլ Ձեր ոչ մի հարցին չեմ պատասխանելու, դրա համար կա ոստիկանություն՚:
Մանրամասներ իմանալու դեպքում կտեղեկացնենք ընթերցողներին:

ԻԼՈՆԱ ԱԶԱՐՅԱՆ