ՙԴԱՇՆԱԿՑԱԿԱՆԻ ՍԵՐԸ ԳԱՂՏՆԻ ԹՈՂ ՄՆԱ...

ԴԱՇՆԱԿՑԱԿԱՆԻ ՍԵՐԸ ԳԱՂՏՆԻ ԹՈՂ ՄՆԱ...

ՀՅԴ-ն որքան էլ փորձում է իր ներքին խոհանոցը հեռու պահել մամուլից եւ հանրությունից, բայց, այնուամենայնիվ, չի հաջողվում: Երեկ լրատվական կայքերից մեկը` վկայակոչելով իր հավաստի աղբյուրներին, տեղեկություն էր տարածել` նշելով. ՙՀՅԴ Արցախում գործող յոթ կոմիտեներից չորսը որոշում էին կայացրել նախագահական ընտրություններում աջակցել Վիտալի Բալասանյանին: Իսկ երեքը ընդունել էին չեզոք դիրք: Սակայն ՀՅԴ Արցախի Կենտրոնական կոմիտեն Հրանտ Մարգարյանի ճնշումների տակ ընդունել է տեղական մարմինների կամքին հակառակ որոշում: Արցախի ՀՅԴ ԿԿ որոշումից հետո Ստեփանակերտի քաղաքային եւ Մարտակերտի շրջանային կոմիտեները որոշում են կայացրել պաշտպանել Վիտալի Բալասանյանին եւ անվստահություն են հայտնել ՀՅԴ Արցախի Կենտրոնական կոմիտեին: Մյուս կոմիտեներում քննարկումները շարունակվում են՚:
Հետեւողական լինելով ՀՅԴ ներքին զարգացումներին` ՙԻրավունք՚-ը պարզեց, որ ՀՅԴ հայաստանյան ներկայացուցիչները այդքան էլ տեղյակ չեն արցախյան գործընկերներից: ՙԱնհնազանդ՚ կոմիտեների նման վարքագծի մասին ՀՅԴ բյուրոյի անդամ, ԱԺ պատգամավոր ՎԱՀԱՆ ՀՈՎՀԱՆՆԻՍՅԱՆԸ նշեց. ՙԱռաջին անգամ ձեզանից եմ լսում, դրա համար ոչինչ չեմ կարող մեկնաբանել: Եթե մամուլը դրա մասին ավելի շուտ է իմանում, քան ՀՅԴ բյուրոյի անդամները, ուրեմն` ինչ-որ բան այն չէ, պետք է նախ ստուգեմ՚:
Հուսալով, որ գոնե արցախյան ՀՅԴ-ականները տեղեկություն կունենան ստեղծված իրավիճակի մասին, դիմեցինք Արցախի ՀՅԴ կենտրոնական կոմիտեի ներկայացուցիչ ԴԱՎԻԹ ԻՇԽԱՆՅԱՆԻՆ.
- Այդ լրատվությունը իրականությանը չի համապատասխանում, այն ապատեղեկատվություն է: Մարտակերտի կամ մյուս կոմիտեներից որեւէ կառույց անվստահություն չի ներկայացրել Արցախի ՀՅԴ ԿԿ-ի նկատմամբ: Կա Դաշնակցության մեջ մեկ որոշում, եւ այդ որոշումը հրապարակվել է հուլիսի 7-ին` պաշտպանել Բակո Սահակյանի թեկնածությունը, մնացած ամեն ինչն արդեն ապատեղեկատվություն է: Տարբեր  անձերից, գուցե նաեւ այլ կենտրոններից տարածված լուրեր են, որոնք կարելի է համարել պարզ ցանկություններ, երազանքներ այդ իրավիճակը ի հայտ բերելու համար:
- Պարոն Իշխանյան, այնուամենայնիվ, Ստեփանակերտի քաղաքային եւ Մարտակերտի շրջանային կոմիտեները Վիտալի Բալասանյանին պաշտպանելու մտադրություն ունե±ն:
- Մենք կուսակցական կառույց ենք, եւ յուրաքանչյուրս ունենք մեր ներքին խնդիրը: Իսկ կուսակցության մեջ ամեն մի ներքին խնդիր ունի իր հրապարակման չափը եւ չհրապարակման բաժինը: Այս պարագայում, թույլ տվեք, չպատասխանել, որովհետեւ սրանք զուտ կազմակերպչական հարցեր են, որոնց միայն կուսակցության կառույցի մեջ կարելի է անդրադառնալ:
Այնպես որ, ախորժակներիդ քացախ, ԼՂՀ նախագահական ընտրություններում Վիտալի Բալասանյանին պաշտպանող արցախյան ՀՅԴ կոմիտեներ, Ձեր որոշումները ե°ւ Երեւանում, ե°ւ Ստեփանակերտում ՙավագ կուսակցական ընկերների՚ կողմից ընկալվում են լոկ չիրականացող երազանքներ: Իսկ որ ՀՅԴ-ն իր ներսում լուրջ խնդիրներ ունի, դա անհերքելի փաստ է:

ՀՐԱՆՏ ՍԱՐԱՖՅԱՆ