ՙՓՐԿԵԼ ՉԷՐ ՀԱՋՈՂՎԵԼ

ՓՐԿԵԼ ՉԷՐ ՀԱՋՈՂՎԵԼ

Հուլիսի 10-ին ջրափրկարարները Սեւանա լճի ՙԾովինար՚ լողափի հատվածում նկատել էին խեղդվող պատանու: Արարատի մարզի Ազատավան գյուղի բնակիչ` 16-ամյա Նարեկին ջրից դուրս էին բերել եւ ցուցաբերել առաջին բուժօգնություն: Ցավոք, Սեւան քաղաքի բժշկական կենտրոնում Նարեկը մահացել էր:


ՄԱՐՄՆԱՎԱՃԱՌՆ ԷԼ Է ԴԱՆԱԿ ՔԱՇՈՒՄ

Երեւանյան լճի մարմնավաճառուհիների վճռական լինելու մասին հանրությունը տեղեկանում է գործնական օրինակով: Օրերս, մայրաքաղաքի ոչ այնքան հրապուրիչ այդ վայրում ՙտխամարդավարի՚ վիճաբանել էին մարմնավաճառները: Տեղական աշխատանքային ՙպատերազմական՚ գործողություններին մասնակցել էին 3 ՙգիշերային թիթեռնիկ՚: Նրանցից մեկը դանակահարել էր գործընկերուհուն: Տղամարդիկ կարող են հպարտանալ, քանի որ աղջիկները ՙդանակ էին քաշել՚ նրանց ՙնվաճելու՚ համար:


ԶԵՆՔՆ ԷԼ ՀՈ ՓՈՂ ՉԻ, ՈՐ ՉՈՒՆԵՆԱՆՔ

Սամվելը տոկոսով գումար էր տվել Բաբկենին եւ տվել էր ամսական 10 տոկոս հավելավճարով: Մայիսին Սամվելը պահանջել էր վերադարձնել պարտքն ու, հավանաբար, հավելյալ գումարը: Պահանջը ՙհիմնավորվել՚ էր ծալովի դանակով եւ սպանելու սպառնալիքներով: Փող չտալու իր ՙօսնովանիները՚ Բաբկենը ներկայացրել էր ՙԲայկալ՚ օդամղիչ ատրճանակով…
Երկու ամիս անց, հուլիսի 7-ին Սամվելը մտափոխվել էր եւ որոշել էր փողերը վերադարձնել ոչ գողական օրենքով. նա հաղորդում էր տվել ոստիկանությանը, թե Բաբկենը ապրիլին, իր վստահությունը չարաշահելով, խաբեությամբ իրենից վերցրել էր 250.000 դրամ, փոխարենը թողնելով իր ՙՎԱԶ-2106՚ մակնիշի ավտոմեքենան…
Այսպես են ՙզինվորավարկային՚ հարաբերությունների զարգացումները ներկայացվել ոստիկանության կողմից, որոնք` տղամարդկանց կողմից միմյանց տված սպառնալիքները որակել են որպես իրական: Մեր կարծիքով այս դեպքում եւ այս պահին իրական է միայն վաշխառությունը, քանի որ ՙսպանվողները՚ խաղաղ ձեւով հայտնվել են իրավապահների հուսալի ձեռքերում:

ՀԱՄ ԷԼ ՍՈՒՏ ՎԿԱՅՈՒԹՅՈՒՆ ՉԻ ՏԱ...

Գյուղերում տեղի ունեցող մարտական եւ ոչ այնքան ընդհարումների ժամանակ վերջերս առաջնահերթ վկաներ էին դառնում գյուղապետերը: Արմավիր մարզի Մրգաշատ համայնքի ղեկավարը խուսափեց այդ ՙառաքինությունից՚: Հուլիսի 8-ին այդ բնակավայրում տեղի էին ունեցել ընտրություններ, որում հաղթել էր գործող գյուղապետ Գեւորգ Դանիելյանը: Նրա պարտված հակառակորդի կողմնակիցները ընտրությունների արդյունքները ՙնշել՚ էին` կոտրելով գյուղի ակումբի դռները, պատուհանները եւ ջարդուփշուր անելով ընտրատեղամասը, իսկ հաջորդ օրը ծեծվել էր մի գյուղացի:
Գյուղում ստեղծված իրավիճակից ժողովուրդը վախեցած է ու երեխաներին նույնիսկ մանկապարտեզ չեն ուղարկում, իսկ հաղթանակած գյուղապետը տանից դուրս չի գալիս:


ԱՐԱՐԱՏԻ ՈՍՏԻԿԱՆՆԵՐԸ ԳՈՐԾԻՑ ՀԱՍԿԱՆՈՒՄ ԵՆ

Հուլիսի 8-ի կեսգիշերին, Երասխ գյուղի մոտ դանակահարվել էր Իրանի Իսլամական Հանրապետության մի քաղաքացի: Իրավապահները հաջորդ իսկ օրը պարզել էին, որ դանակահարությունը տեղի էր ունեցել վիճաբանության ընթացքում եւ իրանցու հետ վեճի էին բռնվել 3 երիտասարդ: Ձեռնարկվում են միջոցառումներ տուժածին մարմնական վնասվածքը պատճառող անձին պարզելու ուղղությամբ: Վերջին հանգամանքը հուսադրելի է նրանով, որ երեքն էլ չեն մեղադրվի մեկի արածի համար:

Ա. ԱԲԳԱՐՅԱՆ