ԱՐՅՈՒՆՈՏ ԺԱՌԱՆԳՈՒԹՅՈՒՆ

ԱՐՅՈՒՆՈՏ ԺԱՌԱՆԳՈՒԹՅՈՒՆ

- Շատերիս հիշողության մեջ վառ է մնացել 90-ականների այն ծանր տարիներին մեր ընտանիքում կատարված դեպքը, երբ եղբայրս նավթավառի մեջի նավթը շուռ էր տվել մորս վրա եւ ցանկացել էր այրել, սակայն վերջում փոշմանել էր եւ ի կատար չէր ածել: Մայրս այդ ժամանակ ոչ մեկին չդիմեց, դեպքն էլ մնաց միայն մեր` հարազատներիս մեջ:
Մեկ շաբաթ առաջ մայրս մահացավ: Պարզվում է, որ իբր մահանալուց մեկ տարի առաջ մայրս իր ողջ ունեցվածքը, այդ թվում նաեւ երեք սենյականոց բնակարանը, կտակել է եղբորս: Չեմ ցանկանա տպավորություն թողնել, որ եղբորս ժառանգության զանգվածի վրա աչք ունեմ, բայց եւ չեմ ցանկանա զրկվել իմ հասանելիք բաժնից, իսկ մայրասպանության փորձ կատարողն էլ տիրանա արյունոտ ժառանգությանը: Միթե ես զրկված եմ ժառանգության իմ բաժինը ստանալուց:
Անժելա ք. Վանաձոր
ՀՀ քաղ. Օր-ի 1191 հոդվածի ուժով անարժան ժառանգներին ժառանգությունից մեկուսացնում են: Դրանք են.
1. Ժառանգատուի վերջին կամքի իրականացմանը դիտավորյալ խոչընդոտողները:
2. Ժառանգատուին կյանքից դիտավորյալ զրկողները:
3. Հնարավոր ժառանգներից որեւէ մեկին կյանքից դիտավորյալ զրկողները:
4. Վերջիններիս նկատմամբ մահափորձ կատարողները:
Այս իրավանորմը կյանքի կոչելու համար պարտադիր պայման է օրինական ուժ ստացած դատական ակտը (վճիռ կամ դատավճիռ): Ընդ որում, դատարան դիմելու իրավունք ունեն այն անձինք, որոնց համար նման մեկուսացումն առաջացնում է ժառանգության հետ կապված գույքային հետեւանքներ:
Կոնկրետ այս գործով Անժելային պետք է հիասթափեցնեմ, որովհետեւ եթե պայմանականորեն ընդունենք, որ 90-ականներին մահափորձ է տեղի ունեցել, սակայն տարիներ անց ժառանգատուն իր ողջ գույքը կտակել է իրեն մահափորձ կատարողի վրա, ուստի օրենքի ուժով արգելվում է տվյալ անձին զրկել ժառանգությունը ստանալուց, քանի որ ժառանգատուն կտակը կազմել է մահափորձ կատարելուց հետո, իսկ տվյալ պարագայում օրենսդիրը կտակարարի ցանկությունը դիտում է իրավաչափ եւ ենթակա պարտադիր կատարման:
Հարկավոր է իմանալ.
Քաղաքացին իրավունք ունի իր հայեցողությամբ սեփականության իրավունքով իրեն պատկանող ցանկացած գույք կտակել ցանկացած անձի, ցանկացած ձեւով որոշել ժառանգությունում ժառանգների բաժինները, զրկել ժառանգությունից մնացած ժառանգներին:
Ինչ վերաբերում է Անժելայի ժառանգություն ստանալ-չստանալուն, ապա վերջինս եթե չի օգտվում պարտադիր բաժնի իրավունքից, այն է .
1. Անչափահաս չէ:
2. Հաշմանդամ չէ:
3. Անգործունակ չի ճանաչվել:
4. 60 տարին չի լրացել, ապա զրկվում է ժառագություն ստանալու իրավունքից, քանի որ առկա է կտակ այլ անձի վրա:

ԼԵՎՈՆ ՍՈԽԱԿԻ ԲԱՂԴԱՍԱՐՅԱՆ
ՙԼեվ Գրուպ՚ փաստաբանական գրասենյակի հիմնադիր նախագահ
www.levgroup.am
Խմբագրության կողմից. հաջորդ թեման վերաբերելու է կտակի ձեւին, այն վերացնելուն, փոփոխելուն, կտակը կատարելուն: