ՙՙՙԵՎ ԻՆՉՈՒ ԿՅԱՆՔՈՎ ԼԵՑՈՒՆ, ԺՊՏԵՐԵՍԻԿ ԱՂՋԻԿԸ ԴԻՄԵՑ ԻՆՔՆԱՍՊԱՆՈՒԹՅԱՆ

ԵՎ ԻՆՉՈՒ ԿՅԱՆՔՈՎ ԼԵՑՈՒՆ, ԺՊՏԵՐԵՍԻԿ ԱՂՋԻԿԸ ԴԻՄԵՑ ԻՆՔՆԱՍՊԱՆՈՒԹՅԱՆ

Մեր օրերում ակնհայտորեն շատացել են ինքնասպանություն գուժող լուրերը: Գրեթե ամեն օր կարդում ենք` ՙերիտասարդ աղջիկը ցած է նետվել կամրջից եւ…՚, ՙհայր ու տղա իրենց տանը կախվել են…՚, ՙմահվան պատճառն ինքնասպանությունն է…՚:  Եվ շատ ավելի մտահոգիչ է, որ գնալով ավելի ու ավելի շատ են արձանագրվում անչափահասների ինքնասպանության  փաստեր:
Բազմաթիվ սոցիալական, հոգեբանական, բժշկական, պատմական հետազոտությունների արդյունքում պարզ է դարձել, որ ինքնասպանության հիմքում ընկած է անելանելիության զգացումն ու հուսալքությունը: Անգամ այն դեպքերում, երբ որպես ինքնասպանության պատճառª արձանագրվում են տարբեր հանգամանքներ, օրինակ` անպատասխան սերը, բողոքը որեւէ երեւույթի դեմ, միեւնույն է, հիմնական պատճառը անելանելիությունն ու անհուսության գիտակցումն է, երբ թվում էª ստեղծված իրավիճակից դուրս գալու որեւէ հույս չկա… Բայց ինչը կարող էր 14-ամյա դեռահասին հասցնել ինքնասպանությանª անհասկանալի է շատերիս համար:
Արդեն առիթ ունեցել ենք ներկայացնել ամենաթարմ փաստը եւս. հուլիսի 3-ին, ժամը 12-ի սահմաններում Էրեբունի փողոցի 14 հարկանի թիվ 21 շենքի մուտքի մոտ աղջկա դիակ էր հայտնաբերվել: Հետագայում պարզվել է, որ աղջիկը Էրեբունի վարչական շրջանի Դիմիտրովի 78 շենքի բնակչուհի է եղել:
Նախնական տվյալներով հայտնի էր միայն բուն` դիակի հայտնաբերման փաստը, իսկ մանկահասակ աղջկա մահվան պատճառների մասին խոսակցությունները հակասական էին: Ուստիեւ մեր նախորդ հրապարակման մեջ ձեռնպահ էինք մնացել եղած լուրերը ներկայացնելուց` հաշվի առնելով, որ խոսքը գործնականում երեխայի մասին է: Եվ ահա դեպքից մեկ օր անց Ոստիկանությունն արդեն պաշտոնապես հաստատեց, որ փաստի առթիվ հարուցվել է քրեական գործ ինքնասպանության հասցնելու հատկանիշներով, եւ, որ կատարվում է դատաբժշկական փորձաքննություն:
Նախկինում եղած խոսակցություններն էլ հենց այդ ուղղությամբ էին, որ աղջիկն ինքնասպանության է դիմել սիրո հողի վրա: Ըստ նույն լուրերի` դեպքից առաջ աղջիկը նույնիսկ հեռախոսազրույց է ունեցել ընկերոջ հետ, հայտնել նրան իր նպատակի մասին: Սա վարկածներից մեկն է: Մեկ այլ վարկածով գույներն իրականում շատ ավելի մռայլ են եւ կարող են լուրջ քրեական հետապնդումներ առաջացնել: Ուստիեւ կրկին հաշվի առնելով, որ խոսքն անչափահասի մասին է, կրկին զերծ մնանք այն ներկայացնելուց` սպասելով դիահերձման պաշտոնական եզրակացությանը:
Մինչ այդ մենք զրուցեցինք հարեւանների հետ:
- Ջուլին շատ կենսուրախ, կյանքով լեցուն, ժպտերեսիկ աղջնակ էր: Մեր հիշողություններում նա միշտ այդպիսին կմնա` ժիր ու կայտառ: Ապշած ենք, որ նա նման քայլի է գնացել:   

ԻԼՈՆԱ ԱԶԱՐՅԱՆ