ՈՉ ԼԵԳԻՏԻՄ ԸՆԴԴԻՄՈՒԹՅՈՒՆ ԷԼ ՈՒՆԵՑԱՆՔ

ՙՈՉ ԼԵԳԻՏԻՄ ԸՆԴԴԻՄՈՒԹՅՈՒՆ ԷԼ ՈՒՆԵՑԱՆՔ

Հակառակ նրան, որ ՀԱԿ անդամ, ՀՀՇ վարչության նախագահ Արամ Մանուկյանը հայտարարել էր, թե իրենց խնդիրն է ՀՀԿ-ից մարդիկ բերել իրենց կուսակցություն, այսօր ՀԱԿ ընկերները կամաց-կամաց նոսրացնում են սեփական կուսակցության շարքերը: Նույնիսկ մի կողմ դնելով ՀԱԿ-ի հետ ծանոթ-բարեկամ, փեսա-աներ կապերը` ՀԱԿ-ից պաշտոնապես դուրս է եկել Ազգային անվտանգության նախկին նախարար, մինչեւ վերջերս ՀԱԿ անդամ ԴԱՎԻԹ ՇԱՀՆԱԶԱՐՅԱՆԸ: Վերջինս մի քանի օրվա մեջ ասաց սրտում կուտակված ամեն ինչ կեղծ ընդդիմության մասին, իսկ այժմ որոշել է առժամանակ լռել: Այս մասին Դ.Շահնազարյանը ՙԻրավունք՚-ի հետ զրույցում նշեց. ՙԵս այսօր հարցազրույց եմ տվել եւ մի քանի օր մամուլում չեմ ուզում որեւէ բան ասել, թողեք դրանից հետո: Եկեք հետաձգենք բոլոր հարցերը՚:
Փաստորեն, ՀԱԿ խմբակցության անդամների հայտարարությունը հակառակ ՙէֆեկտն՚ ունեցավ, թեպետ այսպես որ շարունակվի, շատ շուտով նաեւ Ամենայն հայոց բանաստեղծ Հովհաննես Թումանյանի եւ մեծն կոմպոզիտոր Ալեքսանդր Սպենդիարյանի արձաններն էլ կփախչեն ՀԱԿ-ից ու ՀԱԿ-ի թատերաբեմ դարձած Օպերայից:

ՀՐԱՆՏ ՍԱՐԱՖՅԱՆ


ՍԱՀԱԿԱՇՎԻԼՈՒ ՙՇԵՆԻ ԴԵԴԱ...՚-Ն`
ԱՄԵՆ ՎՐԱՑՈՒ ԲՋՋԱՅԻՆՈՒՄ

Վերջերս նախ վրացական ՙՌուսթավի-2՚ հեռուստաալիքով, ապա ողջ համացանցով մեկ շրջանառվում է Վրաստանի նախագահ Միխայիլ Սահակաշվիլու եւ նորընտիր վարչապետ Վանո Մերաբիշվիլու հայհոյանքներով համեմված երկխոսությունը, որը վերածվել է իսկական սկանդալի:
Պարզ է վրացական ընդդիմության համար սա սկուտեղի վրա մատուցված ՙչալաղաջ՚ էր, բայց թե ի±նչ հետեւանքներ կարող է ունենալ երկրի առաջին դեմքերի խայտառակությունը` ՙԻրավունք՚-ը պարզեց ՙՋավախք՚ հայրենակցական միության նախագահ եւ ԱԺ պատգամավոր ՇԻՐԱԿ ԹՈՐՈՍՅԱՆԻՑ.
- Տեղյակ եմ եւ դիտել եմ, ճիշտն ասած, այդ տեսահոլովակը: Վրաց ընդդիմությունը շատ լուրջ քննադատության է ենթարկել այդ երկխոսությունը, հատկապես Վրաստանի նախագահի կողմից հայհոյախառն արտահայտությունները ընդդիմության հասցեին: Կարծում եմ, ընդհանրապես, որեւէ լուրջ հետեւանքներ դա չի ունենա, եթե վրացական ընդդիմությունը շարունակաբար դա չօգտագործի: Բայց, եթե կարողանա միջադեպը լավ օգտագործել, ապա գուցե իրենց իմիջի բարձրացման եւ նախագահի վարկանիշի անկման պատճառ կդառնա:
Քաղաքականությունը քաղաքականություն, բայց հաստատ վրաց հանրության մեջ ձեւավորվել է նման կարգախոս. ՙԻսկական վրացու բջջայինի մեջ անպայման պետք է լինի Սահակաշվիլի-Մերաբիշվիլի քլնգոցը՚:

ՀՐԱՆՏ ՍԱՐԱՖՅԱՆ