ՙՏՂԱՅԻ ԻՆՔՆԱՍՊԱՆՈՒԹՅՈՒՆԻՑ ՀԵՏՈ ՅՈՒՐԻԿԸ ԼՐԻՎ ԻՐԵՆ ԿՈՐՑՐԵԼ ԷՐ՚

ՙՏՂԱՅԻ ԻՆՔՆԱՍՊԱՆՈՒԹՅՈՒՆԻՑ ՀԵՏՈ ՅՈՒՐԻԿԸ ԼՐԻՎ ԻՐԵՆ ԿՈՐՑՐԵԼ ԷՐ՚

Երեկ` հուլիսի 3-ին, Վայոց ձորի Աղավնաձոր գյուղում հերթական ոճրագործությունը տեղի ունեցավ: Այս դեպքում եւս սպանությունը ընտանեկան բնույթի էր.  50-ամյա Յուրիկ Բաբայանը սպանել է կնոջը` 50-ամյա Անահիտ Բաբայանին: Ըստ շրջանառվող լուրերի` Յուրիկ Բաբայանը եղել է հարբեցող, առավոտյան գնացել է խաշ ուտելու, օգտագործել է ալկոհոլի մեծ քանակություն, վերադարձել է տուն եւ դաժանորեն ծեծել կնոջը, ջարդել գլուխը:
Թե իրականում ի±նչ է կատարվել, եւ հարբեցո±ղ է արդյոք Յուրիկ Բաբայանը` հարցով դիմեցինք Աղավնաձորի գյուղապետ ԱՇՈՏ ԳԱԼՍՏՅԱՆԸ.
- Բաբայանների ընտանիքը հանգիստ ընտանիք էր: Բայց վերջին ժամանակներում վեճը նրանց տնից անպակաս էր: Տղայի ինքնասպանությունից հետո Յուրիկը լրիվ իրեն կորցրել էր: Հա, խմում էր, բայց ոչ այն աստիճան, որ հարբեր, իրեն կորցներ: Չեմ կարող ասել` ինչից նա այդ քայլին գնաց: Ախր, որ ասեմ` Անոն լեզվանի էր, մեկին երկուս էր պատասխանում, էդ էլ չկա: Ամբողջ գյուղն ուղղակի ցնցված է:
- Իսկ ե±րբ եւ ի±նչ պայմաններում է տղան ինքնասպանություն գործել:
- Ոնց որ հիմա հոր պարագայում, այնպես էլ տղայի պարագայում, ոչ մեկս էլ չհասկացանք ինքնասպանության բուն պատճառը: Խելոք երեխա էր, գնաց բանակ, եկավ, մի քանի ամիս էլ Ռուսաստան գնաց: Այնտեղից գալուց հետո մի տեսակ ինքնամփոփ ու մենակյաց էր դարձել, ոչ տնից դուրս էր գալիս, ոչ ընկերների հետ էր շփվում: Դե, մտածում էինք` 22 տարեկան տղա է, կարող ա սիրահարված ա, մտքերի մեջ ա: Մի օր էլ առավոտ վեր կացանք, լսեցինք, որ Յուրայի տղան գոմում կախվել ա: Տղու կորուստը էդ ընտանիքին շատ խեղճացրեց:
Ոստիկանության լրատվական ծառայությունից տեղեկացանք, որ Յուրիկ Բաբայանը ձերբակալվել է, հարուցվել է քրեական գործ քրեական օրենսգրքի 104 հոդվածի հատկանիշներով (սպանություն): Ոստիկանության Վայոց ձորի մարզային քննչական բաժնում նյութեր են նախապատրաստվում:

ԻԼՈՆԱ ԱԶԱՐՅԱՆ