ՙՙՙՙՔԱՂԱՔԱՊԵՏԸ ՄԵՆԱԿ ԻՐ ՓՈՂՈՑՆ Է ԱՍՖԱԼՏԱՊԱՏԵԼ՚

ՙՙՔԱՂԱՔԱՊԵՏԸ ՄԵՆԱԿ ԻՐ ՓՈՂՈՑՆ Է ԱՍՖԱԼՏԱՊԱՏԵԼ՚

Հեռու չեն մեր հանրապետության տարբեր բնակավայրերում սպասվող ՏԻՄ ընտրությունները, եւ նույնիսկ որոշ քաղաքներում ակտիվ պայքար է սկսվել: Սեպտեմբերի 9-ին Սիսիան քաղաքում եւս տեղի կունենան քաղաքապետի ընտրություններ: Նախնական տվյալներով այստեղ մտադիր են թեկնածություն առաջադրել գործող քաղաքապետ Աղասի Հակոբջանյանը, ՀՀԿ-ի կողմից` Սամվել Թանգյանը եւ կրկին ՀՀԿ-ական, Սիսիանում քարի արտադրամասի տնօրեն եւ քաղաքի առաջին քաղաքապետ Գառնիկ Հովակիմյանը:
Ըստ մեր ունեցած տեղեկությունների, Սյունյաց մարզպետ Սուրեն Խաչատրյանն ասել է իր ծանր ու մեծ խոսքը, որ անպայման պետք է ընտրվի ՀՀԿ-ի կողմից առաջադրվող Ս. Թանգյանը, եւ որ ՙդրա դեմ խաղ չկա՚: Այնուամենայնիվ նախորդ շաբաթ գտնվելով Սիսիանում եւ զրուցելով քաղաքացիների հետ` եկանք այն եզրակացության, որ շարքային ընտրողնեն այս պահին, թեեւ տեղյակ են սպասվող ընտրությունների մասին, սակայն պատկերացում էլ չունեն, թե ովքեր են առաջադրվելու իրենց քաղաքի կարեւորագույն պաշտոնին...
Չնայած որ մեր խոսակցությունները սիսիանցիների հետ ոչ պակաս կարեւոր, այլ հարցերի շուրջ էր. քաղաքի եւ նրա խնդիրների: Առանց հարցնելու էլ ակնհայտ էր, որ Սիսիանի ճանապարհների բավականին անմխիթար, ավելի շատ հետպատերազմական վիճակում են, եւ բնակիչների հիմնականում դժգոհություններից մեկն էլ հենց դա էր: Քիչ չէին բողոքները նաեւ լուսավորությունից, աղբահանումից եւ, որ ամենակարեւորն է, աշխատատեղերից. ՙԱրմինե ջան, Դուք Ձեր աչքով տեսնում եք մեր քաղաքի անմխիթար վիճակը, էլ ինչի մասին պատմենք: Իսկ գործող քաղաքապետը մենակ իր փողոցն է ասֆալտապատել, ու, որ հարցնում ենք, թե ինչո±ւ մնացած փողոցներն էլ չեք ասֆալտապատում ասում է, թե բյուջեում փող չկա՚:
Եվ իրոք. երբ փորձեցինք քայլել Սիսիանի փողոցներում մնացինք զարմացած այն փաստից, որ այն` Հ. Որոտնեցի փողոցը, որտեղ ապրում է ներկայիս քաղաքապետ Աղասի Հակոբջանյանը, փայլում էր իր թե° մաքրությամբ եւ թե° հարթ ասֆալտապատմամբ: Իսկ քաղաքապետի բնակության փողոցից կես սանտիմետր այն կողմ սկսվում են դարուփոսերը, որոնց մասին նույնիսկ մի քանի ավտոմեքենա ունեցողներ ասացին. ՙԷս փողոցների դարդից մեքենաներս փչացած կանգնած է դռան առաջ ու հիմա ոտքով ենք ման գալիս՚:
Ավելացնենք, որ կրկին քաղաքապետի պաշտոնում հայտնվելու ակնկալիքով Գառնիկ Հովակիմյանը արդեն իսկ սկսել է հետաքրքրվել քաղաքի անցուդարձով, որպեսզի ավելի պարզ լինի իր անելիքը: Այսինքն` ընտրությունների թեման այդպես էլ հնարավոր չեղավ շրջանցել: Երբ հնչեցնում էինք հավանական թեկնածուների անունները, սիսիանցիները ճանաչում էին նրանց հիշելով անցյալում նրանց արածների ու չարածների մասին. ՙԴե բոլորն էլ ե°ւ լավն են արել, ե°ւ վատը, տեսնենք, կմտածենք, թե ում տանք մեր ձայնը: Գառնիկ Հովակիմյանը մեր առաջին քաղաքապետն է եղել, հիմա էլ քարի արտադամաս ունի, աշխատատեղեր է ստեղծել: Բայց, որ ասենք Սիսիանը իր օրոք փայլել է` սխալ կլինի: Իսկ գործող քաղաքապետը մենակ մտածում է իր ու իր հարազատների մասին, դե մնացածին էլ կճանաչենք ու կմտածենք ում ձայն տանք՚:

ԱՐՄԵՆՈՒՀԻ ՀԱԿՈԲՅԱՆ