ԻՍՊԱՆԻԱՆ ԻՐ ԼԱՎԱԳՈՒՅՆ ԽԱՂԸ ԽԱՂԱՑ ԵԶՐԱՓԱԿՉՈՒՄ

ԻՍՊԱՆԻԱՆ ԻՐ ԼԱՎԱԳՈՒՅՆ ԽԱՂԸ ԽԱՂԱՑ ԵԶՐԱՓԱԿՉՈՒՄ

Ավարտվեց Եվրոպայի 2012 թվականի առաջնությունը, երկրորդ անգամ անընդմեջ մայրցամաքի չեմպիոն հռչակվեց աշխարհի գործող չեմպիոն Իսպանիայի հավաքականը: Եվրոպայի առաջնության եւ մեր հավաքականի մրցակիցների խաղի մասին խնդրեցինք կարծիք հայտնել ՙՖուտբոլ 365՚ թերթի գլխավոր խմբագիր ԳԵՎՈՐԳ ԲՈՒՌՆՈՒՉՅԱՆԻՆ:
-Եվրոպայի առաջնությունը Ձեր, ֆուտբոլասերների սպասելիքներն արդարացրե±ց:
- Հետաքրքրության առումով կարող եմ ասել, որ հաստատ բոլորի մոտ արդարացրեց սպասելիքները. առաջնությունը շատ հետաքրքիր էր: Եթե չեմ սխալվում, միայն 18-րդ խաղում գրանցվեց առաջին 0:0 արդյունքը, իսկ դա արդեն նշանակում է, որ գրավիչ խաղեր են ընթացել: Սպասելիքների առումով, ինձ թվում է, բոլորի համար էլ գլխավոր ֆավորիտներից մեկը Իսպանիան էր, որն էլ հռչակվեց չեմպիոն: Նշվում էր նաեւ Գերմանիայի անունը, բայց նա չկարողացավ դիմադրել Իտալիային:
- Իսպանիան 4 տարի առաջ էլ էր դարձել Եվրոպայի չեմպիոն, խաղամակարդակում ինչ-որ բան փոխվե±լ էր, թե±... Եվ ընդհանրապես Եվրոպայի երկու առաջնությունները միմյանցից տարբերվո±ւմ էին տեխնիկայի, տակտիկայի, արագության եւ այլ առումներով:
- 2008 թվականին Իսպանիայի հավաքականի գլխավոր մարզիչը Արագոնեսն էր, եւ այս հավաքականը մի քիչ տարբերվում է այն հավաքականից: Չմոռանանք, որ Դել Բոսկեն 2010-ին աշխարհի առաջնությունն էր հաղթել, կարելի է ասել, նույն կազմով, ընդամենը մի քանի նոր անուններ էին: Գլխավոր առանձնահատկությունն այն էր, որ եթե 2008-ին` Տորեսը, 2010-ին` Վիլյան էին հարձակվողները, ապա այս անգամ տարբեր խաղերում հարձակման գծում տարբեր մոտեցումներ ցույց տրվեց` Ֆաբրեգաս, Տորես, Նեգրեդո: Այսինքն` մինչեւ վերջ էլ, այսպես ասած, Դել Բոսկեն փնտրում էր, բայց արդյունքը ցույց տվեց, որ նա մեծագույն մարզիչ է, եւ այսօր պատմության մեջ լավագույն թիմերից մեկի խաղն ենք տեսնում:
- Դառնանք Իսպանիա-Իտալիա եզրափակչին: Եթե իտալացիները չմնային 10 խաղացողով, կարո±ղ էին դիմադրել:
- Մինչ այդ արդեն իսպանացիները 2 գնդակի առավելություն ունեին, իսկ իտալացիները ֆիզիկապես ահավոր հոգնած էին հասել եզրափակչին, եւ դա զգացվեց մինչեւ նրանց խաղացողի վնասվածքը: Չմոռանանք ասել, որ այդ վնասվածքներն էլ հենց հոգնածության արդյունք են: Եթե իսպանացիներն իրենց խաղաոճով շատ էներգիա չեն ծախսում, ապա իտալացիները գերլարումով էին խաղում, եւ չմոռանանք, որ վերջիններս շատ ավելի խիստ գրաֆիկով խաղացին, մոտեցան եզրափակչին:  
- Ինձ ու շատերին թվաց, որ Իսպանիան դեռ ավելացնելու շատ տեղ ուներ:
- Իսպանիան իր լավագույն խաղը խաղաց եզրափակչում, իսկ մինչեւ եզրափակիչը մնացած խաղերում բավականին, այսպես ասած, հարցեր էին առաջանում թե° տակտիկական, թե° այլ առումներով: Բայց առաջին հերթին մնացած խաղերում երեւում էր, որ մեծ ներուժ չի օգտագործվում, բայց եզրափակչում... Մի քիչ դժվար է ասել` մի թիմ, որ 4:0 հաշվով հաղթում է, իր լրիվ ներուժը չի օգտագործում:
- Մեր հավաքականի մրցակիցների մասին ի±նչ կարծիք կազմեցիք:
- Բոլորն էլ բավականին լավ ֆուտբոլ խաղացին: Չնայած Դանիան դուրս չեկավ խմբից, բայց միայն այն փաստը, որ Հոլանդիային գերազանցեց իր խմբում, արդեն մեծ բանի մասին է խոսում: Կարող եմ այսպես ասել` մեր երեք մրցակիցների հետ կարող ենք խաղալ առանձին վերցրած խաղ թե° ներսում, թե° դրսում, բայց ուրիշ բան է, որ իրենց հետ շատ դժվար կլինի պայքարել երկար տեւող մրցաշարում. չմոռանանք, որ մեր մրցակիցներն արդեն մեզ լուրջ են մոտենալու: Բայց, անկախ ամեն ինչից, Չեխիան արդեն սերնդափոխություն է սկսել, այդ ճանապարհին է, եւ մենք պետք է օգտվենք այդ վիճակից: Օրինակ, հիմա շատ լավ ժամանակ է Հայաստան-Իտալիա խաղի համար, որովհետեւ սովորաբար թիմերը, որոնք Եվրոպայի, աշխարհի առաջնություններում հաջողության են հասնում` հասնում են եզրափակիչ կամ չեմպիոն են դառնում, հաջորդ ընտրական փուլը բավականին ծանր են սկսում: Չնայած մեզ համար դա երրորդ խաղն է լինելու, եթե չեմ սխալվում, իրենց համար` երկրորդ, եւ մենք պետք է օգտվենք այդ հանգամանքից ու չմոռանանք, որ առնվազն 50 հազար հանդիսական կլինի ՙՀրազդան՚ մարզադաշտում:

Զրույցը` ՌՈՒՍԼԱՆ ԹԱԹՈՅԱՆԻ