Աչքներս լույս. վաղուց չէր երեւացել...

Աչքներս լույս. վաղուց չէր երեւացել ԼՏՊ-ի գլխավոր խորհրդական ԺԻՐԱՅՐ ԼԻՊԱՐԻՏՅԱՆԸ: Երեւաց` Բաքվում, եւ ինչեր խոսեց. ՙՀայաստանի ղեկավարությունը պարտավոր է հիմա հասկանալ, որ անկախությունը պահպանելու համար անհրաժեշտ է հավասարակշռված տարածաշրջանային քաղաքականություն վարել: Դա կարող է ազդակ լինել երկրի կործանվող տնտեսության համար: Կարծում եմ` հանուն Հարավային Կովկասի ապագայի ու զարգացման, Ադրբեջանի ու Վրաստանի իշխանությունները պետք է միավորվեն եւ քննարկեն տարածաշրջանային հակամարտությունների կարգավորման ուղղությամբ հետագա գործունեությունը՚: Դե ինչ, պատահական չէ, որ ադրբեջանական կայքերը հիանում են այս թափթփուկով եւ հաճույքով ցիտում նրան, եւ զարմանալի չէ: Զարմանալին այն է, որ հենց այսպիսին էր երկար տարիներ ՀՀ առաջին նախագահի գլխավոր խորհրդականը, եւ էլ ավելի զարմանալի է, որ այդ խորհուրդների հետեւանքով մեր երկիրը, այնուամենայնիվ, վերջնական չկործանվեց , այլ դիմացավ մինչեւ այն օրը, երբ ԼՏՊ-ին` վզակոթին տալով վռնդեցին:
Մեզ անզարմանք չթողեց ՙՂարաբաղ՚ կոմիտեի անդամ, թաքնագիտական տեսությունների մեծ սիրահար ԱՇՈՏ ՄԱՆՈՒՉԱՐՅԱՆԸ: Ըստ նրա` Հայաստանում չի որոշվելու, թե ինչ դիրքորոշում է ունենալու ԲՀԿ-ն առաջիկա նախագահական ընտրություններին. ՙԱյդ հարցերը հիմնականում կախված են արտաքին ընտրությունից, այսինքն` թե ինչպես կորոշի արտաքին աշխարհը: Կարծում եմ, որ որոշումը կայացվելու է բազմազանությունը ապահովելու տեսանկյունից: Դրա համար, կարծում եմ, ԲՀԿ-ն կունենա սեփական թեկնածու՚: Չէ, զարմանալիորեն շոգերը ազդել են պարոն Մանուչարյանի վրա: Եթե նրան լսենք, ապա կստացվի, որ ԲՀԿ-ում գործակալը գործակալի վրա նստած գործակալին չոշ է անում: Անշուշտ, չենք կարող կիսել այդպիսի կարծիք, ու, առավել եւս, չենք հավատում այն տեսություններին, որ մեր երկրում նույնիսկ ճանճի տզզալն է որոշվում գերտերությունների համապատասխան մարմիններում:
ՀԱԿ-իստները, մասնավորապես` Լեւոն Զուրաբյանը, շատ են ուրախացել, որ ԵԱՀԿ/ԺՀՄԻԳ զեկույցում վատ բաներ կան մեր երկրի մասին: Այնքան էր ուրախացել, որ թռչկոտելով քիչ էր մնում գլուխն առաստաղին զարկեր: Հենց այդպիսինների վերաբերյալ ԱԺ պատգամավոր ԱՐՏԱԿ ԴԱՎԹՅԱՆԸ դիպուկ նշում է. ՙԳիտեք, որեւէ նմանատիպ զեկույց հենց այնպես չի արվում: Այդ զեկույցները ներկայացվում են այն մարդկանց կամ կառույցներին, որոնք որոշումներ են կայացնում, եւ այդ կառույցների ձեռքերն ազատում են ցանկացած տիպի որոշում կայացնելու, այդ թվում` նաեւ խոստումներից հետ կանգնելու, տարբեր պահանջներ առաջ քաշելու, ինչու չէ` ինչ-ինչ հարցերում մեզ ավելի զիջողամիտ դարձնելու համար: Մեր վայ-հայրենասերներն էլ հաճույքով ջուր են լցնում այդ ջրաղացին` դարձյալ կոնկրետ շահեր հետապնդելով՚: Զարմանալով հանդերձ` նշենք, որ պարոն Դավթյանի ասած ՙվայ-հայրենասեր՚ բնորոշումը շատ մեղմ է: Ախր, ՙվայ-հայրենասերը՚ նա է, ով Հայաստանը եւ հայ ազգը սիրում է, բայց այնպիսի չգիտակցված ապուշ քայլեր է անում, որ վնասում է: Իսկ մեր ՙնարնջագույն՚ ընդդիմադիրները ու, մասնավորապես` ՀԱԿ-իստները, միտումնավոր են վնաս հասցնում եւ պարզապես սպասարկում են մեր բարի չկամեցողների շահերը:
Ինչ վերաբերում է ՀԱԿ-ին, ապա սույն կառույցի գործերը հաստատ վատ են, զի ԼՏՊ-ի նախկին շտաբի պետ ԱԼԻԿ ԱՐԶՈՒՄԱՆՅԱՆԸ արձանագրում է. ՙՀԱԿ-ը, որ ամենալայն միավորում է ընդդիմադիր դաշտում, կորուստներ է կրում եւ, ըստ որոշ հայտարարությունների, այդ կորուստները դեռ կարող են շարունակվել՚: Դե ինչ, 2008-ին էլ, դրանից առաջ էլ Արզումանյանը հաստատ լավ է սովորել ճիշտ ընկալելու ԼՏՊ-ի ամեն մի խոսքը, շարժումը, ձայնի ելեւէջը: Կարելի է ասել, որ փորձագիտական մակարդակով գիտի ՀԱԿ առաջնորդին: Եվ եթե կենացասեր Արզումանյանը չի կարողանում ՀԱԿ-ի համար գեթ մեկ կենաց գտնել, ուրեմն զարմանալիորեն վայն իրոք եկել, ՀԱԿ-ին տարել է:
Մեզ հերթական անգամ զարմացրեց եւ տարատեսակ թափթփուկներին սատար կանգնող ՙՀրապարակ՚ թերթը` այս անգամ էլ ամբիոն տրամադրելով տարօրինակաբար դատարանում ՙՄեկ ազգ՚ կազմակերպությունների դաշինքին հաղթած սատանիստ ԲԱՅԱՆԴՈՒՐ ՊՈՂՈՍՅԱՆԻՆ: Զարմանալի է` այդ ինչպե±ս չեն ձանձրանում որոնելու եւ գտնելու տարատեսակ թափոններին: Տարակուսելի եւ զարմանալի է նաեւ դատարանի կեցվածքը, որ կարող է սատանիստի հայցը բավարարել, երբ դրանով կասկածի տակ է դրվում արդարադատությունը` որպես այդպիսին: Հիշեցնենք, որ սատանիստը ՙՄեկ ազգին՚ դատի էր տվել ՙգաղափարական վիժվածք՚ արտահայտության համար: Բայց ախր տվյալ պարագայում ՙգաղափարական վիժվածք՚-ը, ինչպես կասեր Օստապ Բենդերը, սոսկ բժշկական ճշմարտություն է:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ