ՙՙԱՐԺԵՔ ՆԵՐԿԱՅԱՑՆՈՂ ՀՈՒՇԱՐՁԱՆԸ ՇԱՐՈՒՆԱԿՈՒՄ Է ՄՆԱԼ ԹԱԼԱՆՎԱԾ

ԱՐԺԵՔ ՆԵՐԿԱՅԱՑՆՈՂ ՀՈՒՇԱՐՁԱՆԸ ՇԱՐՈՒՆԱԿՈՒՄ Է ՄՆԱԼ ԹԱԼԱՆՎԱԾ

Դեռեւս շարունակում է թալանվել ու կողոպտվել Երեւան-Սեւան մայրուղու վրա գտնվող, 1975 թվականին պատրաստված եւ տեղադրված, ճանապարհաշինարարներին նվիրված մոնումենտալ հուշարձանը:
Արդեն տեղեկացրել ենք, որ կենդանության օրոք քանդակագործ ԴԱՎԻԹ ԲԵՋԱՆՅԱՆԸ, դիմելով պետական եւ հասարակական գործիչներին, այդպես էլ չկարողացավ ստեղծագործությունը պաշտպանել հանցագործներից: Երբ ՙԻրավունքը՚ հետաքրքրվեց, թե ինչ ճակատագիր է սպասվում հուշարձանին, ՀՀ  Մշակույթի նախարարության` հուշարձանների պահպանության խնդրով զբաղվող փոխնախարար ԱՐԵՎ ՍԱՄՈՒԵԼՅԱՆԸ ասաց հետեւյալը. ՙՎերոնշյալ արձանը չի գտնվում հուշարձանների պետական ցուցակում, այն հուշարձանների պահպանության ոլորտից դուրս է մնում: Այդ արձանը ինքնին արժեք է ներկայացնում, ու դեռեւս 2005 թվականից, այսինքնª ավելի վաղ, քան ես եմ աշխատել, այդ հարցով Մշակույթի նախարարությունը դիմել է տարբեր մարմինների: Ժամանակին այն ճանապարհաշինարարական մի կազմակերպության է պատկանել, որը լուծարվել է, եւ իրավահաջորդ, հավանաբար, կարող է լինել, բայց դա դեռ պարզվում է, օրինակ, Կապի եւ տրանսպորտի նախարարությունը: Այսինքն` ե°ւ նամակներ կան գրված, ե°ւ բազմիցս անհանգստություն կա արտահայտված դեռեւս 2005 թվականից թե° Կոտայքի մարզպետարան, թե° հարակից համայնքներ: Կա կազմված աշխատանքների նախահաշիվ, որը դեռեւս 2009 թվականին նորից վերանայվել է հեղինակի կողմից: Այդ կապակցությամբ հարուցվել է քրեական գործ մեր մարզային ծառայության ահազանգով, եւ 3 մարդ պատժամիջոց է կրում՚:
Ա. Սամուելյանը հավելեց նաեւ, որ մեկ ամիս առաջ նախարարությունը հավաքագրել է հանրապետության բոլոր նմանատիպ հուշարձանները. ՙԱնկախ նրանից` հուշարձանների ցուցակում չկար այդ արձանը, այն մեզ համար արժեք է ներկայացնում, եւ մենք հնարավորինս ամեն ինչ պետք  է անենք, որպեսզի ինչ-որ ելք գտնվի: Պետական միջոցներով  պլանավորվում է հրատապ ամրակայում անել, բարեկարգել եւ վերականգնել հանրապետական նշանակության հուշարձանները, ասենք, Սանահինը: Ինձ համար մեծ արժեք ունի Դավիթ Բեջանյանի արձանը, բայց այսօր` հենց այս պահին, չունենք այդ հնարավորությունը` պետական միջոցներով վերականգնելու, բայց փոխարենը մենք մոտ մեկ ամիս առաջ հավաքագրեցինք բոլոր նմանատիպ խնդիրներ ունեցող հուշարձանները, կազմվելու է ծրագիր, եւ փաթեթային լուծումներ են առաջարկվելու՚:
ՙԻրավունք՚-ը նշեց, թե Բեջանյանն իր կենդանության օրոք, դիմելով տարբեր հաստատությունների, ստացել է նույն պատասխանները, թե դա իրենց ենթակայության տակ չի գտնվում: ՙՄենք ասել ենք, որ այն մեր ենթակայության տակ չի, համենայնդեպս, մենք այդ ամբողջ ծավալը վերցնում ենք մեզ վրա եւ փորձում լուծում գտնել: Ես ցավում եմ, որ այժմ հեղինակը մեզ հետ չէ, բայց, համենայնդեպս, իր այրին նույնպես անհանգստությունը շարունակում է: Անկախ իրենց անհանգստությունից, հարցը նույնպես մեր օրակարգում է՚,- կրկնեց փոխնախարարը:

ԼԻԼԻԹ ԵՂԻԱԶԱՐՅԱՆ