ՙՙՙԻՆՔՆԱՍՊԱՆՈՒԹՅՈՒՆ` ՊԱՐՏՔԵՐԻ ՊԱՏՃԱՌՈՎ

ԻՆՔՆԱՍՊԱՆՈՒԹՅՈՒՆ` ՊԱՐՏՔԵՐԻ ՊԱՏՃԱՌՈՎ

Ինքնասպանության վերջին դեպքերից մեկը ցնցեց այս հարցում արդեն շատ բան տեսած մեր հանրությանը: Հունիսի 26-ի առավոտյան ժամը 8:20-ի սահմաններում Ոստիկանության Էրեբունիի բաժին ահազանգ է ստացվել, որ Այվազովսկի-68 տանը ինքնասպանություն են գործել հայր ու որդի: Պարզվել է` առանձնատան ամրանից մետաղյա ճոպանով կախվելու միջոցով ինքնասպան են եղել 62-ամյա Պետրոս Գալուստովը եւ նրա որդին` 30-ամյա Արթուր Գալուստյանը: Երկուսն էլ ինքնասպանություն են գործել մետաղյա ճոպանով կախվելու միջոցով:
Արդեն հայտնի է նաեւ, որ Արթուր Գալուստյանը մի քանի օր առաջ է ազատվել ՙՆուբարաշեն՚ քրեակատարողական հիմնարկից. նա մեկ այլ անձի հետ 2011թ. նոյեմբերին Արշակունյաց պողոտայի վրա կայանված ՙԻնֆինիթի՚ մակնիշի ավտոմեքենայի ապակին կոտրելու միջոցով հափշտակել էր ավտոմեքենայում եղած առանձնապես խոշոր (56 մլն դրամ) գումար, որը պատկանում էր ՙՄանանա Գրեյն՚ ՍՊԸ-ին, եւ այդ գումարը նշված ՍՊԸ-ի աշխատակիցը պետք է տեղափոխեր բանկ: Նշված գողության փաստով Ոստիկանությունում  հարուցվել էր քրեական գործ` Քրեական օրենսգրքի 177 հոդվածի 3-րդ մասի հատկանիշներով:
Տեղի հարեւաններից փորձեցինք պարզել նրանց ապրելակերպի եւ վարքի մասին, որոնք էլ հետեւյալ կարծիքներն արտահայտեցին.
- Հանգիստ, գլուխը կախ մարդ էր, այստեղ-այնտեղ մասնավոր գործ էր անում, իր հալալ քրտինքով ապրում էր: Արթուրն էլ, որ ասեմ` վատ տղա էր, վատը չէր, դե, առանց մոր ապրող էրեխեն հարյուր տոկոսանոց չէր կարա լինի:
Իսկ մեկ ուրիշն էլ, թե`
- Չեմ կարող ասել ինչը կարար նրանց այդ քայլին դրդել, բայց համոզված եմ, շատ լուրջ բան պետք է եղած լիներ, որ ինքնասպանության հասցրեց նրանց: Որովհետեւ իրենք միշտ էլ ծանր կյանքով են ապրել, ու որ շատերը ասում են` սոցիալական վիճակից են նման քայլի դիմել` դժվարանում եմ հավատալ:
Ոստիկանության լրատվականից տեղեկացանք, որ փաստի շուրջ հարուցվել է քրեական գործ` Քրեական օրենսգրքի 110 հոդվածի 1-ին մասով (ինքնասպանության հասցնելու հատկանիշներով): Կատարվում է դատաբժշկական փորձաքննություն, նախաքննությունը շարունակվում է:  
Իսկ ահա մեր որոշ աղբյուրներ առաջ են տանում այն վարկածը, որ հիշատակված գողության եւ կալանավայրային որոշ պատմությունների պատճառով Արթուրը հայտնվել էր, այսպես ասենք, բավականին լուրջ ֆինանսական պատմությունների մեջ: Լուծում չգտնելով` նա ստիպված էր դիմել ինքնասպանության, համոզված լինելով, որ հակառակ դեպքում նրան շատ ավելի վատ վախճան է սպասվում: Մեր նույն աղբյուրներն ասում են նաեւ, որ Արթուրի հայրը` Պետրոսը եւս որդու այդ վճռի հետ ստիպված էր համաձայնվել... Եվ որոշել է միանալ որդուն:

ԻԼՈՆԱ ԱԶԱՐՅԱՆ