ՙՙՙԱՆՁԸ ԸՆԴԱՄԵՆԸ ԴԻՄԵԼ Է ԱՆՀՐԱԺԵՇՏ ՊԱՇՏՊԱՆՈՒԹՅԱՆ...՚

ՙԱՆՁԸ ԸՆԴԱՄԵՆԸ ԴԻՄԵԼ Է
ԱՆՀՐԱԺԵՇՏ ՊԱՇՏՊԱՆՈՒԹՅԱՆ...՚

2010թ.-ի հոկտեմբերի 16-ին Լոռու մարզի ՙԱլավերդի բժշկական կենտրոն՚ ՓԲԸ է տեղափոխվել Ալավերդու բնակիչ Ռոբերտ Մոսինյանը` կրծքավանդակի հրազենային թափանցող վնասվածքով: Տեղափոխվելուց երեք ժամ հետո վերջինս մահացել է: Դեպքի առթիվ 2010թ. հոկտեմբերի 17-ին ՀՀ քրեական օրենսգրքի 104-րդ հոդվածի 1-ին մասով նախատեսված հանցագործությունների հատկանիշներով հարուցվել է քրեական գործ: Հետաքննության ընթացքում պարզվել էր, որ հանցագործությունը կատարվել է Ալավերդու Սայաթ-Նովա 4/25 տան բնակիչ Կամո Շահվերդյանի կողմից: Նրան մեղադրանք է առաջադրվել ՙայն բանում, որ նա ապօրինի զենք է կրել եւ ապօրինաբար կյանքից զրկել Ռ. Մոսինյանին...՚:
Այժմ Լոռու մարզի Ընդհանուր իրավասության դատարանում լսվում է վերոնշյալ քրեական գործը: Ավելին` դատավարությունը հասել է գրեթե վերջնական փուլին: Հունիսի 22-ին մեղադրական ճառով հանդես եկավ Լոռու մարզի դատախազ Ա. Շիրինյանը: Իսկ թե ինչպես է ընթացել դատավարությունը, եւ ինչ է կատարվել իրականում հարցերի պատասխանները ստանալու համար դատավարությանը մասնակցեցինք նաեւ մենք:
Մեղադրյալ Կ. Շահվերդյանի իրավունքները դատարանում պաշտպանում է շահերի պաշտպան ՀՈՎԻԿ ԱՐՍԵՆՅԱՆԸ, ումից էլ տեղեկացանք.
- Այո°, պաշտպանյալս սպանությունը կատարել է, եւ դա նա չի հերքել: Բայց` ոչ դիտավորությամբ կամ նախապես պլանավորելով, ինչպես դա փորձում է ներկայացնել մեղադրող կողմը: Քրեական գործի նյութերում չի հիմնավորվել եւ իսպառ բացակայում է Կ. Շահվերդյանի կողմից դիտավորությամբ սպանելու որեւէ ապացույց, ընդհակառակը, ակներեւ է, որ հանցավոր խմբի կողմից ոտնձգություն է կատարվել պաշտպանյալիս սեփականության, նրա կյանքի եւ առողջության նկատմամբ, եւ անձը ընդամենը դիմել է անհրաժեշտ պաշտպանության: Ուստի միջնորդել եմ, որ Կ. Շահվերդյանի արարքը վերաորակավորվի եւ գնահատվի անհրաժեշտ պաշտպանության սահմանազանցման շրջանակներում:
Իսկ թե ի±նչ է կատարվել իրականում, փորձեցինք պարզել այդ օրը դեպքի վայրում գտնվող վկաներից.
- Կամոյի որդուª Զորայր Շահվերդյանի եւ Ռոբերտ Մոսինյանի միջեւ եղել է անբարյացակամ վերաբերմունք: Այդ օրը Մոսինյանը հարբած զանգել է Կամոյին եւ հարցեր լուծելու համար կանչել ՙբազարի՚: Կամոն ասել է, որ ինքը զբաղված է, եթե ունեն չպարզաբանված հարցեր, կարող են գալ արտադրամաս, հանգիստ զրուցեն: Մոսինյանը ընկերների հետ` զինված, հարբած վիճակում եկել է քարի վերամշակման արտադրամաս: Հասնելուն պես, դեռ մեքենայից չիջած` սկսել են խուլիգանական արտահայտություններ անել, հայհոյել, բանը հասել է նույնիսկ կրակոցներ արձակելուն: Կամոն էլ պաշտպանվելու համար իր որսորդական հրացանից մի անգամ կրակել է` նրանց վախեցնելու համար: Հրացանից արձակված գնդակը, կոշտ առարկայի բախվելով, ռեկաշետ (անդրադարձ) է եղել եւ մխրճվել Ռ. Մոսինյանի մարմնի մեջ: Դատաբժշկական փորձաքննությունով էլ է դա ապացուցվել: Անմիջապես հիվանդանոց են հասցրել, բայց երեք ժամ հետո մահացել է:
Իսկ թե ինչ վարքի տեր մարդիկ են մեղադրյալ Կամո Շահվերդյանը եւ Մոսինյան եղբայրները, հատկապես` Ռ. Մոսինյանը, ճշտեցինք Ալավերդու բնակիչներից.
- Կամոն հումանիստ, ընկերասեր, նեղին հասնող մարդ է:
- Ընտանիքին նվիրված, կամեցող, իր գործով ապրող անձնավորություն է, բարի, համերաշխություն սիրող:
Մոսինյանների մասին հետեւյալ կարծիքները լսեցինք.
- Խուլիգան, սանձարձակ, մեծաբերան տղերք են, հարգանք-բան չունեն:
- Ամբողջ օրը հարբած մեքենաներով մի ծերից մյուսն են գնում:
- Իրանց լավ տղա են զգում, բայց հո լավ տղան հայհոյելով ու հարբելով չի± որոշվում:
Դատախազ Ա. Շիրինյանը իր մեղադրական ճառի ավարտին միջնորդեց Կ. Շահվերդյանին 11 տարի ազատազրկման ենթարկելուն: Նշենք, որ պարոն Շիրինյանը դատավարության ընթացքում որեւէ ապացույց չգտավ, որը խոսում էր դիտավոր սպանության մասին, ավելին` նա հենվեց ինչ-որ վկաների ցուցմունքի վրա, բայց դատարանում նման վկայություն տվող վկաների չլսեցինք: Կասկածից վեր է, որ Ռ. Մոսինյանը եւ նրա եղբայրները հանցավոր ոտնձգություն են կատարել Շահվերդյանի եւ նրա սեփականության նկատմամբ եւ, անկախ նրանից` Շահվերդյանն  է, թե մեկ այլ ՀՀ քաղաքացի, նա իրավունք ունի հանցավոր ոտնձգությունից անհրաժեշտ պաշտպանության միջոցների դիմելու: Բայց արի ու տես, որ վարույթն իրականացնող մարմնի կողմից արհամարհվել է իրավունքի այդ նորմը, եւ այդ հարթությունում չի դիտարկվել Կ. Շահվերդյանի գործողությունները, այն չի դիտվել որպես անհրաժեշտ պաշտպանություն, ծայրահեղ դեպքում անհրաժեշտ պաշտպանության սահմանազանցում, նույնիսկ անտրամաբանական` անզգույշ սպանություն:
Դատախազ Ա. Շիրինյանի գործելակերպը, կարծում ենք, ոչ մեկի զարմանքը չի կարող առաջացնել, քանի որ սա առաջին դեպքը չէ, երբ դատախազն ամեն կերպ փորձել է առաջ տանել քրեական վարույթն իրականացնող մարմնի ապօրինի գործողությունները եւ այդ գործողությունների արդյունքում ներկայացված մեղադրանքները: Այս առումով բավականին հետաքրքիր է ներկայանում Նորիկ Սեդրակի Պողոսյանի վերաբերյալ քրեական գործը: Վերջինիս մեղադրանք էր առաջադրվել նրա այն ցուցմունքի հիման վրա, որոնք ակնհայտ կասկածյալից կորզել էին, երբ նա փաստացի հանդիսացել էր որպես վկա: Այսինքն, պարոն Շիրինյանը, քրեադատավարական նորմերի կոպիտ խախտումներով վարույթն իրականացրած քննիչին պատասխանատվության ենթարկելու փոխարեն, փորձել է դատարանին ՙներշնչել՚, որ անձի իրավունքների խախտումները դատախազական եւ քննչական համակարգերում սովորական գործառույթ է: Հուսով ենք, որ առաջիկա դատավարությանը, երբ կհրապարակվի վճիռը, դատավորը հաշվի կառնի այն փաստերը, որոնք պարոն Շիրինյանը, չգիտես ինչու, փորձեց շրջանցել:

ԻԼՈՆԱ ԱԶԱՐՅԱՆ