ՙՙՍԻՍԻԱՆՈՒՄ ԹԵԺ ԸՆՏՐԱՊԱՅՔԱՐ Է ԼԻՆԵԼՈՒ

ՍԻՍԻԱՆՈՒՄ ԹԵԺ ԸՆՏՐԱՊԱՅՔԱՐ Է ԼԻՆԵԼՈՒ

Թերեւս բազմիցս ենք ՙԻրավունքի՚ էջերում անդրադարձել Սիսիանի ԲՀԿ-ական քաղաքապետ Աղասի Հակոբջանյանի չորս տարիների չարածներին:
Ինչեւէ, օրերս Սիսիան քաղաքում էր Սյունիքի մարզպետ Սուրեն Խաչատրյանը: Եկել էր անձամբ տեսնելու, թե ինչպես են ընթանում շինարարական աշխատանքները տարիներով քարուքանդ արած Սիսիանի փողոցներում: Տողերիս հեղինակը մեծ զարմանք ապրեց, երբ Սյունիքի մարզպետից իմացավ, որ այս փոշոտ, անդուր քարուքանդ փողոցների շինարարական աշխատանքները կատարում է ոչ թե քաղաքապետարանը, այլ մարզպետարանը: Իսկ զավեշտալին այն էր, երբ իմ այն հարցին, թե այս պահին ինչո±ւ քաղաքապետը այստեղ չէ, փողոցի բնակիչներից մեկը կեսկատակ-կեսլուրջ ասաց, որ մեր քաղաքապետի աչքերը հրապարակից էն կողմ չի տեսնում: Իսկ այսօր դրա վառ ապացույցն այն է, որ երբեմնի գեղեցիկ Սիսիան քաղաքը վեր է ածվել մի գյուղաքաղաքի, որտեղ քաղաքապետարանից 200-300 մետր հեռավորության վրա գոմաղբի կույտեր են թափված` իրենց ատրիբուտներով: Մի±թե քաղաքապետի աչքերը, իրոք, մինչեւ հրապարակն է տեսնում:
Մինչդեռ սիսիանցիները այսօր էլ կարոտով հիշում են Սիսիանի շրջկոմի առաջին քարտուղար Շչորս Դավթյանին, թե ինչպիսի մեծ ջանքերով է Սիսիանը դարձրել հանրապետության գեղեցիկ քաղաքներից մեկը. իր մաքուր ասֆալտապատ մայթերով, շատրվաններով, ցայտաղբյուրներով ու փողոցներով` գրավելով այնպիսի մարդկանց ուշադրությունը, ինչպիսին են եղել Սոս Սարգսյանը, Համո Սահյանը, Հրանտ Մաթեւոսյանը, Վահագն Դավթյանը եւ այլոք:
Իսկ ներկայիս քաղաքապետը 2008 թվականի հոկտեմբերին իր տված հարցազրույցում հիշեցնում էր, որ Սիսիանը ջլատված է, այն պետք է գրավիչ դարձնել, ոչ թե վանել ոչ բարեկիրթ պահվածքով, եւ ինքը` որպես քաղաքապետ, այդ դերը չի նսեմացնի, չի արժեզրկի եւ կփորձի իր պահվածքով ու լավ աշխատանքով վերականգնել այն` մոռանալով յուրայիններ-օտարներ հասկացողությունը: Սրանք խոստումներ էին` արված 2008 թվականին, որ չկատարվեցին: Սակայն ցավը նրանում է, որ այսքանից հետո էլ դեռ ախորժակ ունի նորից վերընտրվելու քաղաքապետի պաշտոնում: Բայց մի քանի հոգի արդեն իսկ հայտարարել են քաղաքապետի թեկնածու առաջադրվելու իրենց մտադրությունը: Դրանք են` ՀՀԿ Սիսիանի կառույցի ղեկավար Սամվել Թանգյանը, Սիսիանի առաջին քաղաքապետ Գառնիկ Հովակիմյանը (ԱԺ պատգամավոր Վահե Հակոբյանի աները), Սիսիանի նախկին քաղաքապետ Լ. Սարգսյանը եւ Աշոտ Մինասյանը (շրջանառվող լուրերի համաձայն): Հենց այս թեկնածուներն էին, որոնց օգնությամբ ԲՀԿ անդամ Աղասի Հակոբջանյանը 2008-ին երկրորդ փուլի արդյունքներով ընտրվեց քաղաքապետ: Իսկ այդ ժամանակ Ա. Հակոբջանյանի հակառակորդը դաշնակցական Տիգրան Պողոսյանն:
Դե ինչ, առաջիկա ՏԻՄ ընտրությունները Սիսիանում (սեպտեմբերի 9-ին) անցնելու են անզիջում պայքարում եւ նրանք, ովքեր ժամանակին սատարել են գործող քաղաքապետին, այս անգամ , չեն սատարելու, եւ Ա. Հակոբջանյանի հիմնական հենարանը քաղաքապետարանի  աշխատողները կլինեն, թեեւ խոշոր հաշվով այլ թեկնածուի հաղթանակի դեպքում նրանք կշարունակեն աշխատել: Ինչեւէ, սպասենք աշնանը...

ՍԱՄՎԵԼ ՄԱՆՈՒՉԱՐՅԱՆ
Սիսիան-Երեւան