ՙԱՐՄԵՆԱԼ՚-ՈՒՄ ԷԼԻ ԿՐՔԵՐԸ ԹԵԺԱՆՈՒՄ ԵՆ

ՙԱՐՄԵՆԱԼ՚-ՈՒՄ ԷԼԻ ԿՐՔԵՐԸ ԹԵԺԱՆՈՒՄ ԵՆ

ՙԻրավունք՚-ը բազմիցս անդրադարձել է Երեւանի ալյումինի ՙԱրմենալ՚, գործարանում տեղի ունեցող խժդժություններին: Հիշեցնենք, որ անցյալ տարի վերը նշված գործարանը գտնվում էր դատական վիճաբանության մեջ իր իսկ աշխատակիցների հետ, իսկ հայցի պահանջն էր վնասակարության դիմաց հասանելիք գումարների չվճարելը գործարանի բանվորներին:
Այդ կապակցությամբ ՙԼեւ գրուպ՚ իրավաբանական ընկերությանն էին դիմել 117 բանվորներ եւ միայն դատական վիճաբանության արդյունքում կողմերը եկան հաշտության: Սակայն պարզվում է, որ գործարանի շուրջ 107 այլ բանվորներ, կրկին անգամ, նույն պահանջով դիմել են վերը նշված իրավաբանական ընկերությանը, որպեսզի պաշտպանեն իրենց իրավունքները: Հիշեցնենք նաեւ, որ ՙԱրմենալ՚-ը պատկանում է ՌԴ-ին եւ գործարանի տնօրինությունը չի ընդունում այն հայցը, ինչով իրենց բանվորները դիմել են դատարան: Այս կապակցությամբ ՙԼեւ գրուպ՚ իրավաբանական ընկերության տնօրեն ԼԵՎՈՆ ԲԱՂԴԱՍԱՐՅԱՆԸ մեզ փոխանցեց հետեւյալը.
- Նիստը տեղի է ունեցել 2012 թվականի հունիսի 15-ին, իսկ դա նախնական նիստն էր, եւ, ի տարբերություն նախորդ նախնական նիստերի, այդ նիստին արդեն ՙԱրմենալի՚ կողմից մասնակցություն ունեցավ ոչ միայն տեղի փաստաբանը, այլեւ Մոսկվայից ժամանած ներկայացուցիչը: Ըստ էության նախնական նիստերն ավարտվեցին եւ դատարանը նշանակեց դատաքննության օր, որը տեղի կունենա 2012թ. հուլիսի 26-ին ժամը 14:00-ին: Դատական նիստի ընթացքում մեկ անգամ եւս ֆիքսվեց, որ իմ վստահորդները բոլորովին կաշկանդված չեն եւ պատրաստ են ցանկացած ժամի նստել սեղանի շուրջ եւ կատարել հաշտության բանաձեւ, որի մասին ես իմ վստահորդների անունից հայտնեցի գործատուին: Այս պահի դրությամբ կողմը ոչ մի առաջարկով հանդես չի եկել: Նշեմ, որ գործարանի տնօրինությունը պատասխանել է մեր հայցին, որտեղ նրանք առարկում են եւ կարծում, որ մեր պահանջը անհիմն է եւ վնասակարության հետ կապված գործառույթներ չի իրականացվում բանվորների կողմից: Իսկ մենք այլ կարծիքի ենք եւ հայցադիմումի մեջ նշել ենք, որ մեր վստահորդները նաեւ շուտ են թոշակավորվում, ըստ օրենքի ուժի, քանի որ վնասակար են աշխատում, որի դիմաց հավելավճար պետք է կատարվի` 100 տոկոսի չափով:

ԱՐՄԵՆՈՒՀԻ ՀԱԿՈԲՅԱՆ