ՊՆ-Ի ՀԱՄԱՐ ՄԻԵՎՆՈՒՅՆ Է, ԹԵ ՈՎ Է ՔՆՆՈՒՄ

ՊՆ-Ի ՀԱՄԱՐ ՄԻԵՎՆՈՒՅՆ Է, ԹԵ ՈՎ Է ՔՆՆՈՒՄ

Օրերս ՀՀ ԱԺ պատգամավոր Ռուբեն Հայրապետյանի ՙՀարսնաքար՚ ռեստորանից անվտանգության աշխատակիցների ՙթեթեւ՚ ձեռքով գանգուղեղային ծանր վնասվածքներով հիվանդանոց է տեղափոխվել ՀՀ պաշտպանության նախարարության Երեւանի կայազորի հոսպիտալի Ուռոլոգիայի բաժնի պետ , մայոր Վահե Ավետյանը եւ միկրովիրաբույժ, կապիտան Արտակ Բայադյանը, ավելի ուշ պարզվեց, որ կա եւս մեկ տուժած ռազմական բժիշկ` Գարիկ Սողոմոնյան: ՀՀ քրեական օրենսգրքի 112 հոդվածի 1-ին մասի հատկանիշներով հարուցվել է քրեական գործ: Այս ամենի մեջ հետաքրքրական էր այն փաստը, որ ի սկզբանե ոստիկանությունը քրեական գործընթացը փոխանցել  էր ՊՆ քննչական վարչությանը, բայց այժմ Գլխավոր դատախազությունը վարույթը վերցրել է ՊՆ-ի քննչականից եւ փոխանցել ոստիկանության Երեւանի վարչությանը:
Թե ինչո±ւ է քրեական գործընթացը ձեռքից ձեռք անցնում, եւ ինչպես է դրան վերաբերվում ՊՆ-ն, փորձեցինք պարզել ՀՀ ՊՆ լրատվական ծառայության ղեկավար Մուշեղ Աղեկյանից.
- Դա արդեն իրավաբանների խնդիրն է: Ի±նչ տարբերություն, թե որ իրավական մարմինն է իրականացնում գործընթացը: Դուք ի±նչ գիտեք, թե դա Պաշտպանության նախարարության քննչական ծառայության վարույթի ենթակա, թե± քաղաքացիական ոստիկանության վարույթի գործ է: Որեւէ խնդիր չկա, որ գործով զբաղվում է ոստիկանությունը:
- Բայց, չէ± որ ծեծի է ենթարկվել բարձրաստիճան սպա:
- Ամեն դեպքում ծեծի ենթարկողները քաղաքացիական անձիք են, չէ±:
- Փաստորեն, այդպիսի±ն է Պաշտպանության նախարարության դիրքորոշումը:
- Դա Պաշտպանության նախարարության դիրքորոշումը չէ, այլ ես բացատրում եմ օրենքը, կարգը:
Իսկ թե, իրոք, քրեական գործընթացը կոծկելու մտադրություններ կան կամ չկան, ցույց կտա առաջիկա ընթացքը ու մեղավորների պատժելիության աստիճանը:

ՀՐԱՆՏ ՍԱՐԱՖՅԱՆ
Հ.Գ.-Ուշ երեկոյան ոստիկանությունը տարածել է հայտարարություն, ուր մասնավորապես ասված է. ՙՙՀարսնաքար՚ ռեստորանային համալիրի տարածքում տեղի ունեցած միջադեպի կապակցությամբ հարուցված քրեական գործի նախաքննությունը հունվարի 19-ից շարունակվում է ոստիկանության քննչական գլխավոր վարչությունում՚: Տարածվեցին նաեւ խոսակցություններ, որ արդեն կան ձերբակալվածներ:



ՙԽՈՐԱՆԻ՚ ԱՂԱՆԴԱՊԵՏԸ ՁԵՐԲԱԿԱԼՎԵԼ Է

Ըստ մեր ունեցած տեղեկությունների, Իսպանիայի Կուլերա քաղաքում գործող ՙԽորան՚ աղանդի հոգեւոր հովիվ Հրաչյա Խաչատրյանին ձերբակալել են Իսպանիայի ոստիկանները: Մեր աղբյուրները տեղեկացնում են, որ Հ. Խաչատրյանին ձերբակալել են այն պահին, երբ վերջինս ցանկացել է Իսպանիայից Հայաստան տեղափոխել 1,5 կիլոգրամ ոսկյա զարդեր: Նույն լուրերի համաձայն, Հայաստանում գործող ՙՄիացյալ երիտասարդական լիգայի՚ մի ներկայացուցչից, որը այս պահին ապրում է Իսպանիայում, որոշ ժամանակ առաջ վերջիններիս բնակարանից գողություն էր տեղի ունեցել եւ այն գողոնը, որը հայտնաբերել են ՙԽորան՚ աղանդի հովվի մոտից, դրանց մեջ է եղել նաեւ նրանց ոսկյա զարդերը: Փաստորեն այն լուրերը, որ ՙԽորան՚ աղանդի միջոցով Իսպանիայից Հայաստան է գալիս գողացված ոսկեղեն, որը վաճառվում է Երեւանի ոսկու շուկաներից մեկումª հաստատվեցին: Դե ինչ, հույս ունենանք, որ նման աղտոտ կազմակերպության պարագլխին ձերբակալելուց հետո կդադարի հոգեւոր ու ֆինանսական թալանը Իսպանիայում հայերի նկատմամբ:

ԱՐՄԵՆՈՒՀԻ ՀԱԿՈԲՅԱՆ