ՑԱՆԿԱՆՈՒՄ ԵՄ` ԻՍՊԱՆԻԱՆ ՉԵՄՊԻՈՆ ԴԱՌՆԱ՚

ՙՑԱՆԿԱՆՈՒՄ ԵՄ` ԻՍՊԱՆԻԱՆ ՉԵՄՊԻՈՆ ԴԱՌՆԱ՚

Լեհաստանում եւ Ուկրաինայում ընթացող ֆուտբոլի Եվրոպայի 2012 թվականի առաջնության եզրափակիչ փուլում այսօր կկայանա D խմբի երկրորդ տուրի երկու հանդիպում` Ուկրաինա-Ֆրանսիա եւ Շվեդիա-Անգլիա: Իսկ արդեն վաղը A խմբում կկայանան երրորդ տուրի Չեխիա-Լեհաստան եւ Հունաստան-Ռուսաստան հանդիպումները:
Մենք տեղեկացրել էինք, բայց հիշեցնում ենք, որ երրորդ տուրի բոլոր հանդիպումներն սկսվելու են միեւնույն ժամին` 22:45-ին: Կիրակի օրը B խմբում միմյանց հետ կմրցեն Պորտուգալիա-Հոլանդիա եւ Դանիա-Գերմանիա զույգերը: Հունիսի 18-ին արդեն հայտնի կդառնան C խմբի հաղթողները, երբ կհանդիպեն Խորվաթիա-Իսպանիա եւ Իտալիա-Իռլանդիա զույգերը: Եվ վերջապես, հունիսի 19-ին կտրվեն խմբային մրցաշարի բոլոր հարցերի պատասխանները, երբ D խմբում իրենց հարաբերությունները կպարզեն Անգլիայի ու Ուկրաինայի, ինչպես նաեւ Շվեդիայի եւ Ֆրանսիայի հավաքականները:

Իսկ մինչ այդ ՈՒԵՖԱՆ որոշել է Եվրո-2016-ի ընտրական փուլի ընթացքում Ռուսաստանի հավաքականին պայմանականորեն զրկել 6 միավորից: Դա պայմանավորված է Վարշավայում ռուս ֆուտբոլասերների պահվածքով: Պատիժն ուժի մեջ կմտնի այն ժամանակ, եթե ռուս ֆուտբոլասերների կողմից այդպիսի պահվածք դրսեւորվի մինչեւ ընթացիկ առաջնության ավարտը: Բացի այդ, Ռուսաստանի ֆուտբոլային միությունը պատժվել է 120 հազար եվրոյով: ՈՒԵՖԱ-ի ղեկավարներն ուշադրություն են դարձրել խաղի ընթացքում խաղադաշտ նետված ճայթրուկների, ինչպես նաեւ տրիբունաներում հայտնված ցուցապաստառների վրա: Զարմանալի է, որ եվրոպական արժեքներ, հանդուրժողականություն քարոզող եվրոպացիները, մասնավորապես` լեհերը անհանդուրժողականության եւ ռասիզմի տարրեր են դրսեւորում իրենց պահվածքում, իսկ նրանց կառույցներից մեկը` ՈՒԵՖԱ-ն, պատժում է ավելի շատ տուժողներին...
Ինչ որ է, այդ թեմային նորից կանդրադառնանք, իսկ այժմ ներկայացնենք մեր փոքրիկ հարցազրույցը ՙԲանանց՚ ակումբի նախագահ ՍԱՐԳԻՍ ԻՍՐԱՅԵԼՅԱՆԻ հետ:
- Ի±նչ տպավորություն եք ստացել Եվրոպայի առաջնության արդեն կայացած հանդիպումներից:
- Միջին տպավորություն ունեմ: Ինձ համար մեծ անակնկալ էր Հոլանդիայի վատ հանդես գալը, փաստորեն, ունենալով լավ կազմ, նրան չհաջողվեց ցույց տալ այն խաղը, որին ինքն արժանի էր: Դա ինձ հիասթափեցրեց:
- Չէր ստացվում հատկապես Ռոբենի խաղը...
- Ես համարում եմ, որ այս տարի Ռոբենի տարին չէր, եւ դա ապացուցեցին նաեւ ՙԲավարիայի՚ կազմում նրա ելույթները: Նա այս տարի, մեղմ ասած, այնքան էլ լավ մարզավիճակում չէր: Կարելի է ուրախալի համարել Ուկրաինայի վստահ խաղը, Ռուսաստանի հավաքականը վատ չի նայվում, բայց առաջին հաղթանակից հետո, կարծես, ՙյոթերորդ երկնքից՚ դեռ չէին կարողացել իջնել:
- Ամենայն հավանականությամբ, նրանց խաղի վրա հոգեբանորեն ազդել էին լեհ եւ ռուս ֆուտբոլասերների բախումները, հակառուսական տրամադրությունները: Ոմանց կարծիքով` թիմերը ոչ-ոքիի համաձայնության էին եկել, որպեսզի ավելի չշիկացնեն բորբոքված կրքերը:
- Բայց ամեն դեպքում խաղից հետո էլ բախումներ են եղել: Ես նման բան չեմ ընդունում, քանի որ ՈՒԵՖԱ-ն շատ խիստ է մոտեցել, ու պայմանականորեն 6 միավոր է հանել Ռուսաստանի` Եվրոպայի հաջորդ առաջնության նախնական փուլում վաստակելիք միավորներից: Դա վերջնական որոշում չէ:
- Ո±ր թիմերի խաղն է Ձեզ դուր եկել:
- Գերմանիայի խաղը շատ ուրախացրեց. դիտարժան է: Երկրորդ տուրից հետո կարելի է ավելի լավ պատկերացում կազմել, իսկ առաջին տուրում բոլորն էլ զգույշ են խաղում:
- Երբ դեռ չէր սկսել առաջնությունը, ո±ր թիմերին էիք համարում ֆավորիտ:
- Ցանկանում եմ, որ Իսպանիան դառնա չեմպիոն, եւ, եթե մինչեւ եզրափակիչ չխաչվեն ուղիները, եզրափակչում հանդիպեն Իսպանիան ու Գերմանիան: Եվ չեմպիոն դառնա Իսպանիան:
- Եթե Հայաստանի հավաքականին հաջողվեր դուրս գալ եզրափակիչ փուլ, նա կարո±ղ էր արժանի մրցակից լինել մյուս թիմերի համար:
- Կան թիմեր, օրինակ, նույն Իռլանդիան, որը մեզ ոչնչով չի գերազանցում: Կամ վերցնենք Չեխիային... Մի խոսքով` Հայաստանի հավաքականը կարող էր արժանի տեղ զբաղեցնել, շատ թիմերի հետ կարող էր հավասարի պես խաղալ:

Պատրաստեց Ռ. ԹԱԹՈՅԱՆԸ