ՙՙԱՐՑԱԽԻ ԻՆՔՆԱՊԱՇՏՊԱՆԱԿԱՆ ՈՒԺԵՐՆ Ի ԶՈՐՈՒ ԵՆ ԱԶԱՏԱԳՐԵԼՈՒ ԻՐԵՆՑ ՏԱՐԱԾՔՆԵՐԸ՚

ՙԱՐՑԱԽԻ ԻՆՔՆԱՊԱՇՏՊԱՆԱԿԱՆ ՈՒԺԵՐՆ

Ի ԶՈՐՈՒ ԵՆ ԱԶԱՏԱԳՐԵԼՈՒ ԻՐԵՆՑ ՏԱՐԱԾՔՆԵՐԸ՚

Ադրբեջանի արտգործնախարար Էլդար Մամեդյարովը հայտարարել է, որ իրենք համաձայն են, որպեսզի մոտ ապագայում մեխանիզմ ընդունվի, որ հետաքննություն անցկացվի միջսահմանային միջադեպերի առնչությամբ:

Բայց դրանից հետո միանգամից ասում է, որ դա կպահպանի ստատուս-քվոն, իսկ իրենք դրան դեմ են: Վերջում էլ հավելում է, որ եթե Հայաստանը ցանկանում է, որ իր զինվորները չզոհվեն, ապա պետք է ՙազատագրի օկուպացված տարածքները՚, եւ այդ դեպքում դիպուկահարների կարիք էլ չի զգացվի:
Վերոնշյալի վերաբերյալ խնդրեցինք կարծիք հայտնել ԱԺ փոխխոսնակ, ՀՀԿ մամլո պատասխանատու ԷԴՈՒԱՐԴ ՇԱՐՄԱԶԱՆՈՎԻՆ, ով ասաց.
- Ադրբեջանի ղեկավարությունը հերթական անգամ ցույց տվեց, որ իր գործունեությունը հիմնված է ցինիզմի եւ հակասականության վրա: Նախ Ադրբեջանի արտգործնախարարը հայտարարում է, թե միջադեպերի քննության վերաբերյալ իրենք պատրաստ են հետաքննության մեխանիզմ ստեղծել, սակայն դրանից հետո միանգամից ասում է, որ այդ մեխանիզմը ներկայիս պայմաններում անթույլատրելի է, քանի որ պահպանվում է ստատուս-քվոն: Այսինքն` պարոն Մամեդյարովը եզրակացնում է, որ, չնայած ադրբեջանական կողմը, իբր թե, համաձայնվում է սրա հետ, բայց իրականում ինքը որերորդ անգամ մերժում է դիպուկահարների դուրսբերումը կամ այդ հարցի քննարկումը: Սա եւս մեկ անգամ ցույց է տալիս, որ Ադրբեջանը շարունակում է իրականացնել քաղաքականություն, որը չի բխում բանակցային գործընթացից:
Եվ երկրորդը. հայտարարելով, որ եթե հայերն ուզում են իրենց զինվորները չզոհվեն, պետք է դուրս գան, այսպես ասած, ՙօկուպացված տարածքներից՚, Ադրբեջանի արտգործնախարարը եւս մեկ անգամ ապացուցում է, որ Ադրբեջանում կառուցվում է պետություն, որը հիմնված է ֆաշիզմի եւ ռասիզմի վրա: Եվ այդ հայտարարությամբ Ադրբեջանի արտգործնախարարը ցույց է տալիս իր պետության իրական դեմքը, որ նրանց համար գրոշ չարժե ոչ միայն հայ զինվորի, այլ նաեւ, առաջին հերթին, հենց ադրբեջանցի զինվորի կյանքը, որը զոհվում է իրենց արկածախնդրության հետեւանքով: Իսկ ինչ վերաբերում է ՙօկուպացված տարածքներին՚, ապա բազմիցս ասել եմ ու հիմա եւս մեկ անգամ կրկնում եմ` օկուպացված տարածքներ կան Արցախի Հանրապետության տարածքում, որոնք օկուպացրել է Ադրբեջանը, եւ ուշ թե շուտ Ադրբեջանը պետք է դուրս գա այդ օկուպացված տարածքներից` Մարտունաշենից, Գետաշենից, Շահումյանից... Իսկ եթե դուրս չգա, ես ավելի քան համոզված եմ, որ Արցախի ինքնապաշտպանական ուժերը ի զորու են ազատագրելու իրենց տարածքները:

Ռ. Թ.