ՙԻՍԿ ՈՒՄ ՀԵՏ ԵՔ ԿԻՍԵԼ ՓՈՂԵՐԸ, ՎԱՐԴԱՆ ՄԻՆԱՍԻՉ

ԻՍԿ ՈՒՄ ՀԵՏ ԵՔ ԿԻՍԵԼ ՓՈՂԵՐԸ, ՎԱՐԴԱՆ ՄԻՆԱՍԻՉ

Ինչպես ասում են` ՙընկերովի մահը հարսանիք է՚, եւ ԱԳ նախկին նախարար Վարդան Օսկանյանը, իր ՙզիբիլիթաս՚ դարձած ՙՍիվիլիթաս՚ հիմնադրամն ու քրեականախառը գործընթացը միայնակ չեն մնա:

ԲՀԿ-ական պատգամավոր Վ.Օսկանյանը օրերս որոշել է այս ամենի մեջ ներքաշել մի շարք արտասահմանյան պետական ու ոչ պետական կառույցների: Այս մասին վերջինս նշում էր. ՙՙՍիվիլիթաս՚-ի գործունեության առաջին օրերից` 2008-ից սկսած` հիմնադրամին ֆինանսավորել եւ նրա հետ համատեղ ծրագրեր են իրականացրել Նիդեռլանդների եւ Լեհաստանի կառավարությունները, Նորվեգիայի եւ Գերմանիայի արտաքին գործերի նախարարությունները, Շվեյցարիայի եւ Միացյալ Թագավորության զարգացման գործակալությունները, Հայաստանում ԱՄՆ դեսպանությունը, ԵԱՀԿ երեւանյան գրասենյակը, ինչպես նաեւ այլ հեղինակավոր կազմակերպություններ, կորպորացիաներ եւ անհատներ՚: Հետաքրքրվելով վերոնշյալ կառույցներից, թե ի±նչ նպատակներ է հետապնդում  եւ տվյալ պետության կամ կառույցի ո±ր շահի իրականացման համար է ֆինանսավորվում ՙՍիվիլիթաս՚ հիմնադրամը, ստացանք առայժմ միայն ԵԱՀԿ երեւանյան գրասենյակի մամուլի եւ հանրային կապերի պատասխանատու ԳՈՀԱՐ ԱՎԱԳՅԱՆԻ պատասխանը. ՙԵԱՀԿ երեւանյան գրասենյակի մանդատը այլ գործունեության հետ միասին ներառում է նաեւ Հայաստանում քաղաքացիական հասարակության հզորացում` հրատարակություններին, ուսուցողական ծրագրերի եւ համաժողովների կազմակերպմանն աջակցելու միջոցով: Այս գործունեության նպատակն է նպաստել թե° քաղաքացիական հասարակության դերակատարների, թե° իշխանությունների կարողությունների զարգացմանը, որը գրասենյակը դիտարկում է լայն եւ ներառական տեսանկյունից` շատ տարբեր դերակատարների ներգրավմամբ՚:
Իհարկե, հաշվի առնելով` ՙօսկանյանական կեղտոտ խաղերի՚ մասին վերջին շրջանում լայնորեն քննարկվող քրեական գործընթացը, համաձայնեք, որ շատ ռոմատիկ եւ լիրիկական է հնչում այս ամենի մեջ ԵԱՀԿ երեւանյան գրասենյակի պատասխանը, թեպետ գուցե նրանք էլ տուժած կողմն են այս պատմության մեջ:
Իսկ ՙՍիվիլիթասին՚ ՙթափանցիկ՚ ֆինանսավորած մյուս աստվածահաճո արեւմտյան հիմնարկություններից պատասխան դեռ չենք ստացել, բայց բնականաբար հետամուտ ենք լինելու ՙթափանցիկ՚ փողերի ոչ թափանցիկ ճակատագրի հարցով:

ՀՐԱՆՏ ՍԱՐԱՖՅԱՆ