ՈՐՏԵՂ ԹԱՂՎԱԾ Է ԱԲՈՎՅԱՆԻ ՀԵՐՈՍ ԱՂԱՍԻՆ

ՙՈՐՏԵՂ ԹԱՂՎԱԾ Է ԱԲՈՎՅԱՆԻ ՀԵՐՈՍ ԱՂԱՍԻՆ

Մենք անցյալ տարի անդրադարձել ենք Քանաքեռի Սուրբ Մարիամ Աստվածածին եկեղեցու, մեղմ ասած, անմխիթար վիճակին: Հիշեցնենք, որ այն 17-րդ դարի կառույց է:

Եկեղեցու գործունեությունը դադարեցվել է խորհրդային կարգերի հաստատումից սկսած եւ չի վերականգնվել մինչեւ այժմ: Վերջին անգամ եկեղեցին վերանորոգվել է 1985թ:
Օրերս ՙԱռավոտի՚ թղթակցին Քանաքեռ համայնքի բնակչուհի ԱՆԻՆ մասնավորապես ասել է. ՙԵս 15 տարի է` այստեղ եմ ապրում, եւ 15 տարիների ընթացքում եկեղեցու բանալին միշտ մեզ մոտ է եղել: Առաջ եկեղեցու տարածքում աղբանոց էր, տարբեր մարդիկ էին գալիս, այս տարածքում թղթախաղ էին խաղում: Հիմա ամուսնուս ջանքերով տարածքը մաքրվել է... Եկեղեցին գտնվում է հին Քանաքեռում` հենց այն վայրում, որը նկարագրված է Խաչատուր Աբովյանի ՙՎերք Հայաստանի՚ վեպում: Այս եկեղեցու բակում է թաղված Աբովյանի հերոս Աղասին: Բայց, ցավոք, նրա գերեզմանը գտնելը շատ դժվար կլինի՚:
Արարատյան Հայրապետական թեմի տեղեկատվական համակարգի պատասխանատու ԷԼԶԱ ՄԱՆՈՒԿՅԱՆՆ իր կարծիքն ունի վերոնշյալի վերաբերյալ. ՙՀՀ կառավարության որոշմամբ` Քանաքեռի Սուրբ Մարիամ Աստվածածին եկեղեցին անհատույց տրամադրվել է Հայ առաքելական եկեղեցուն` մի շարք այլ եկեղեցիների հետ միասին: Եկեղեցին ներկայումս չի գործում, քանի որ արմատական լուրջ վերականգնման եւ ամրացման աշխատանքների կարիք ունի: 2011թ. աշնանը սկսվեց եկեղեցու վերականգնման եւ ամրացման նախագծային գործընթացը, որը կիրականանա ՀՀ հուշարձանների պահպանության գործակալության հետ համատեղ... Ինչ վերաբերում է եկեղեցու բակում կասկածելի մարդկանց հավաքվելուն եւ թղթախաղով զբաղվելուն, ապա եկեղեցու ներսում որեւէ մեկը թղթախաղով չի զբաղվել: Հավանական է, չգործող եկեղեցու հարակից տարածքում մարդիկ են հավաքվել` իրենց ազատ ժամանակն անցկացնելու համար: Երբ եկեղեցին բնականոն կգործի, այդպիսի բաներ չեն լինի՚:
Քանաքեռ համայնքի բնակչուհին եւս նշել է, որ եկեղեցին երբեմն այցելուներ է ունենում. ՙԿիրակի օրերին ու տոն օրերին գալիս է Սբ. Հակոբ եկեղեցու քահանան: Գալիս են նաեւ հավատացյալները՚:
Հույս ունենանք, որ եկեղեցին վերջապես կվերանորոգվի, ու կվերանան նաեւ նրա շրջակայքում թղթախաղով զբաղվելու վերաբերյալ խոսակցությունները, որոնք մի քանի տասնամյակի պատմություն ունեն:

ՙԳՐՈՂՆԵՐԻ ՓՈԽԱՐԵՆ ԵԼՈՒՅԹ ԵՆ ՈՒՆԵՆՈՒՄ ՊԵՏԱԿԱՆ ՊԱՇՏՈՆՅԱՆԵՐԸ՚

Բոլորը գիտեն, որ Երեւանն այս տարի ՅՈՒՆԵՍԿՕ-ի կողմից հռչակվել է Գրքի համաշխարհային մայրաքաղաք, որին նվիրված մի քանի ճոխ միջոցառումներ եղան ապրիլին ու...
Գրաքննադատ ՀԱՍՄԻԿ ՀԱԿՈԲՅԱՆԸ դժգոհ է Գրքի համաշխարհային մայրաքաղաքից, քանի որ, ըստ նրա, միջոցառումները կազմակերպվել էին ոչ մշակույթի մարդկանց համար. ՙԳրողների փոխարեն ելույթ էին ունենում պետական պաշտոնյաները, իսկ ՙArm EXPO՚ ցուցահանդեսին շուրջ 30 գրողի մուտքն արգելվեց: Բացի այդ, սերիալներին պետք է փոխարինեն մշակութային-գրական հաղորդումները՚:
Գրականագետի կարծիքով` գրքի շրջանառության շուկան կայանում է, սակայն այդ գործընթացում մեծ է նաեւ պետության դերը. ՙՄշակույթի մարդիկ, բան ու գործը թողած, պայքարում են գրքի հետ կապված խնդիրների վերացման համար: Կառավարությունից ակնկալում ենք, որ չխանգարի մշակույթի մարդկանց առաջընթացին եւ նոր գործեր ստեղծելուն՚:

ՀԱՆԳԻՍՏ ՉԵՆՔ ՏԱԼՈՒ ԳՐԱՆՏԱԾԻԾՆԵՐԻՆ

Երեկվա ՙԻրավունքի՚ ՙՄշակույտ՚ խորագրի ներքո մենք անդրադարձել էինք Արվեստի քննադատների ազգային ասոցիացիայի (AICA-Հայաստան)` ՙԱնադոլու քուլթուր՚-ի, Հայաստանի ազգային կինոկենտրոնի, Հայաստան-Թուրքիա կինոպլատֆորմի եւ tranzit.at-ի հետ համատեղ ներկայացվող ՙՔաղցր վարանմունք` քաղցր վաթսունականներ՚ նախագծին: Հիշեցնենք, որ դրա շրջանակներում հունիսի 11-13-ը կազմակերպվում է հայկական եւ թուրքական մի շարք ֆիլմերի ցուցադրություններ եւ կինոքննադատների ու մշակութաբանների կոնֆերանս` Երեւանի ՙՆաիրի՚ կինոթատրոնում: Նախագծի վերնագիրը եւ դրան հետեւող բացատրությունները ոչինչ չեն ասում, եւ դրանք, ամենայն հավանականությամբ, պարզապես անգլերենից կամ թուրքերենից բառացի թարգմանություններ են: Եվ ընդհանրապես այդ կոնֆերանսի նպատակը ՙթուրքական կինո՚, ՙհարեւան երկիր՚, ՙբարեկամ թուրք՚, ՙժամանակակից թուրք՚ բառակապակցություններին հայ հանրությանը սովորեցնելն է: Եվ դա արվում է թուրքերի կրտսեր եղբայր ազերիների հերթական դիվերսիաներից հետո...
Մենք ցանկացանք վերոնշյալի վերաբերյալ իմանալ ՀՀ մշակույթի նախարարության` որպես երկրի մշակութային քաղաքականությունն իրականացնող մարմնի, կարծիքը եւ այն ստանալուն պես կներկայացնենք ընթերցողներին:
Կներկայացնենք նաեւ այս ամենով մտահոգ մտավորականների կարծիքներ: Մի խոսքով` հանգիստ չենք տալու թուրքամետ ու ադրբեջանամետ գրանտածիծ կազմակերպություններին ու նրանց հովանավորներին:  

Կույտը մշակեց ՌՈՒՍԼԱՆ ԹԱԹՈՅԱՆԸ