ՍԵՐԺ ԹԱՆԿՅԱՆԻ ՀԱՐՍՆԱՑՈՒՆ ՎԱՆԱՁՈՐԻՑ

ՍԵՐԺ ԹԱՆԿՅԱՆԻ ՀԱՐՍՆԱՑՈՒՆ ՎԱՆԱՁՈՐԻՑ

Այսօր Լոս Անջելեսից 10 մղոն հեռու մի վիլլայում տեղի կունենա աշխարհահռչակ ռոք երաժիշտ, System of a Down խմբի մեներգիչ ՍԵՐԺ ԹԱՆԿՅԱՆԻ հարսանիքը: Երաժիշտն ամուսնանում է վանաձորցի ԱՆԺԵԼԱ ՄԱԴԱԹՅԱՆԻ հետ:
Արարողությունը լինելու է փակ, իսկ հյուրերին էլ արգելված կլինի լուսանկարել եւ տեսագրել: Հարսանեկան արարողությանը ներկա կլինեն միայն ամենամոտ ընկերներն ու հարազատները, այդ թվում նաեւ երաժիշտներ Արտո Թունջբոյաջյանը, Արմեն Մանուկյանը, Վարդան Հովսեփյանը:
Վիքիպեդիայից` ազատ հանրագիտարանից ներկայացնենք մեր հայրենակցի տվյալները. ժանրեր` ծանր ռոք, ալտերնատիվ ռոք, ալտերնատիվ մետալ, արտ ռոք, էքսպերիմենտալ ռոք, նյու մետալ, պրոգրեսիվ մետալ, ֆանկ մետալ, ֆոլկ ռոք, մասնագիտությունը` երաժիշտ, երգահան, բանաստեղծ, գործիքներ` ստեղնաշարային, դաշնամուր, կիթառ, բաս կիթառ: Վոկալ:
Սերժ Թանկյանը (անգլերեն` Serj Tankian) ծնվել է 1967 թ. օգոստոսի 21-ին, Բեյրութում` Լիբանան) ամերիկահայ ռոք երաժիշտ է եւ երգահան: Աշխարհահռչակ System of A Down ալտերնատիվ մետալ-ռոք խմբի եւ Axis of Justice (ՙԱրդարության առանցք՚) հասարակական կազմակերպության հիմնադիրն է, ճանաչվել է որպես աշխարհի 26-րդ լավագույն մետալ վոկալիստ: Որպես մենակատար` SOAD-ի գործունեության ընդմիջման ժամանակ ձայնագրել է ՙElect The Dead՚ եւ ՙImperfect Harmonies՚ ալբոմը: 2010 թվականի նոյեմբերին հայտարարեց System of a Down-ի վերամիավորման մասին: Իսկ մեզ համար երգիչը հայտնի է ավելի շատ իր հայրենասիրական, Ցեղասպանության ճանաչմանն ուղղված բազմաթիվ միջոցառումներով: Եվ շատերը այդ ուղղությամբ նրա արածը համարում են ավելի արժեքավոր, քան մեր դիվանագիտական կորպուսի աշխատանքը:
Դառնալով հարսանիքին` նշենք, որ աշխարհահռչակ երգչի հարսնացուն Անժելա Մադաթյանը, վանաձորցի է, երեւի արդեն 5-6 տարի է, ինչ ծանոթացել է երգչի հետ: Ավելորդ չենք համարում հավելել, որ հարսնացուին տվել են իր տատիկի` անգլերեն լեզվի հարգված ու հայտնի ուսուցչուհի Անժելա Շովգարյանի անունը: Երբ տարիներ առաջ Սերժ Թանկյանը հյուրընկալվել էր Մադաթյանների տանը, Վանաձորի ռոքի սիրահարները, երգչի երկրպագուները չէին թաքցնում իրենց ուրախությունը եւ ամեն կերպ ձգտում էին լուսանկարվել նրա հետ:

Պատրաստեց Ռ. ԹԱԹՈՅԱՆԸ
Հ.Գ. Հարսանիքի, երկու ընտանիքների վերաբերյալ մանրամասները կներկայացնենք կանանց ՙԶարուհի՚ հանդեսի հուլիսյան համարում: