ՙԳՅՈՒՄՐՎԱ ՔԱՂԱՔԱՊԵՏԸ ԴԱՇՏԸ ԹՈՂԵՑ ՄԱՐԶՊԵՏԻՆ

ԳՅՈՒՄՐՎԱ ՔԱՂԱՔԱՊԵՏԸ ԴԱՇՏԸ ԹՈՂԵՑ ՄԱՐԶՊԵՏԻՆ

Երեկ աշխատանքային այցով Գյումրի էր մեկնել ՀՀ փոխվարչապետի եւ Տարածքային կառավարման նախարարի պաշտոնակատար Արմեն Գեւորգյանը:

Միգուցե այս մասին հարկ լիներ խոսել միայն որպես պաշտոնական լրահոս, եթե այդ այցի շրջանակներում տեղի չունենար մի մինի-հրաշք. քաղաքապետ Վարդան Ղուկասյանը Ա. Գեւորգյանին դիմավորողների մեջ չէր: Մինչդեռ նման բան նույնիսկ քաղաքապետարանի երկարամյա աշխատակիցները դժվարացան հիշել:
Ճիշտ է, օրվա ընթացքում Գյումրիի քաղաքապետարանի մամուլի ծառայությունից ներկայացվեց պարզաբանում, թե Վ. Ղուկասյանը ՙուղղակի քաղաքում չէր՚, սակայն մեր քաջատեղյակ աղբյուրները բոլորովին այլ պատճառների մասին են խոսում: Ըստ այդ լուրերի` հյուրին դիմավորող եւ ուղեկցող խումբը ղեկավարում էր մարզպետ Աշոտ Գիզիրյան: Եվ ահա մեր աղբյուրները փոխանցում են, որ անցած ընտրություններից հետո քաղաքապետի եւ մարզպետի հարաբերություններն այն աստիճան են սրվել, որ պարոն Ղուկասյանը նույնիսկ Գիզիրյանի հետ ՙմատաղ ուտելու՚ չի գնա, էլ ուր մնաց հյուրեր ընդունել-ճամփելու: Մեկ բան էլ. ըստ նույն լուրերի Վ. Ղուկասյանն ամեն կերպ փորձում է ընդգծել, թե նեղացել է երկրի ղեկավարությունից, քանի որ իր ընտրություններ կազմակերպելու տաղանդները սկսել են հավուր պատշաճի չգնահատել: Ու մեկ էլ, համաձայն նույն լուրերի, Ղուկասյանը սկսել է նաեւ կասկածանքով վերաբերվել այն հարցին, թե առաջիկայում սպասվող քաղաքապետական ընտրություններում հնարավորություն կունենա վերստին զբաղեցնել քաղաքապետի պաշտոնը: Դե, ուրեմն էլ ի±նչ կարիք կա դիմավորել Ա. Գեւորգյանին, առավել եւս, որ նա դեռ ընդամենը պաշտոնակատար է եւ ով իմանա, կրկին կնշանակվի± փոխվարչապետ: Մի խոսքով, այս ամենից լավագույն լուծումը ՙքաղաքից բացակայելն՚ է, եթե անգամ այդ բացակայությունը սահմանափակվում է, ասենք, մերձքաղաքյա որեւէ օբյեկտի սահմաններով:
Իսկ ահա այս ամենից հետո մեր նույն աղբյուրները ենթադրում են, որ այսպես շարունակելու դեպքում Գյումրիի գործող քաղաքապետը հաստատ տանուլ կտա Գիզիրյան-Ղուկասյան ՙպատերազմը՚:

Ս. ԱԲՐԱՄՅԱՆ