ԳՐԵԹԵ ՇԵՇՏԱԿԻ ԱՐՁԱԳԱՆՔ

ԳՐԵԹԵ ՇԵՇՏԱԿԻ ԱՐՁԱԳԱՆՔ

Մայիսի 30-ին լույս տեսավ ՙԻրավունք-Հետաքննության՚ 60-րդ համարը, որում` ՙԱյնուամենայնիվ որտեղի±ց են կեղծ դրամները, դոլարները…՚ վերտառությամբ հոդվածում ակնարկվել էր, որ իրավապահ մարմինները թեպետև բացահայտում են կեղծ փողերի շրջանառության դեպքերը, սակայն դրանց ՙարտադրողները՚ օրենքի համար մնում են անհայտ ու անհասանելի: Հանդիսանալով ՀՀ գլխավոր դատախազության կայքի բաժանորդը, հոդվածի հեղինակը նույն օրը կեսօրին տեղեկացավ, որ այդ կայքում ԳԴ-ն տեղադրել է իր հարցի պատասխանը:

ՈՍՏԻԿԱՆՈՒԹՅՈՒՆԸ ՓԱՍՏԵԼ Է
ՙ
Քրեական գործի նախաքննությամբ մասնավորապես՚ այս պահին պարզվել է, որ Գյումրի քաղաքի բնակիչներ Մ. Զիլֆիմյանը եւ Բ. Հարությունյանը 2012թ. մայիսի 24-ին գունավոր տպիչով պատճենահանելու եղանակով պատրաստել էին կեղծ 20 000 դրամանոց ՀՀ թղթադրամներ եւ նույն օրը դրանք իրացրել էին մարզի 3 գյուղերում: 12 կեղծ 20-հազարանոցներով խարդախները գնել էին 4 գառ եւ 2 ոչխար:
Տեղեկատվության այս մասը հարցեր գրեթե չի առաջացնում` անգամ այն առումով, որ գյուղացի անասնապահները չեն կարողացել տարբերել ՙքսերոքսած՚ թղթադրամները իսկականից. շատերի հետ դա կարող է պատահել…
Նույնը չէի ասի տեղեկատվության 2-րդ մասի վերաբերյալ, որում բառացիորեն նշված է.
ՙԲացի այդ, Մ. Զիլֆիմյանը եւ Բ. Հարությունյանը խոստովանական ցուցմունքներ են տվել, որ միմյանց հետ նախնական համաձայնության գալով` գունավոր տպիչով 5000 անվանական արժեքով 61 հատ կեղծ ՀՀ թղթադրամներ են տպել եւ իրացրել ՀՀ  4 մարզերի խանութներում` սննդամթերք գնելու եղանակով: Հիշյալ 61 հատ 5000 դրամանոց ՀՀ թղթադրամներից 27-ն իրացրել են` Շիրակի, 19-ը` Արագածոտնի, 9-ը` Լոռու եւ 6-ը` Արմավիրի մարզերի տարբեր քաղաքներում եւ գյուղերում…՚:

ՀԱՐՑԵՐ ՉԾԱԳԵԼ ԱՐԴԵՆ ՉԵՆ ԿԱՐՈՂ

61 հատ 5-հազարանոցների իրացումը, այն էլ` տարբեր մարզերի գյուղական եւ, հատկապես, քաղաքային խանութներում` դյուրին գործ չէ: Այս դեպքում խարդախները գործ են ունեցել այնպիսի անձանց հետ, որոնց աշխատանքային հիմնական ՙգործիքը՚ թղթադրամն է: Հետեւաբար, կեղծ թղթադրամները չէին կարող ակնհայտ տարբերվել իսկականից:
Պատճենահանող ինչպիսի± սարքավորում են օգտագործել Մ. Զիլֆիմյանը եւ Բ. Հարությունյանը փող ՙշինելու՚ համար: Հարցը վերացական չէ, քանի որ նման որակի ապարատը շատ թանկ է, եւ այն ձեռք բերողը պարզապես չէր կարող իրեն թույլ տալ աշխատեցնել մեքենան ընդամենը 1-2 ժամ` տպելով ընդամենը 7 տասնյակ թղթադրամ…
Ի դեպ, խոստովանելով հանցավոր այն արարքների մասին, որոնք անհայտ էին իրավապահ մարմիններին, հանցագործները, այնուամենայնիվ, չէին մատնանշել ՙկեղծ թղթադրամներ պատրաստելու վայրը եւ եղանակը՚: Վերջիններս, ըստ Գլխավոր դատախազության տեղեկատվության, ՙպարզվել էին ձեռնարկված օպերատիվ-հետախուզական միջոցառումների արդյունքում՚:
Այստեղից նաեւ առաջանում են բազմաթիվ այլ հարցեր, սակայն…

ՊԱՐԶՎԵԼ Է ՙՄԱՍՆԱՎՈՐԱՊԵՍ՚

Հաղորդագրության հենց սկզբում նշված էր, որ տեղեկատվությունը մասնակի է: Հասկանալի եւ ընդունելի է. իրականացվում է նախնական քննություն:  
Նույն ոճով հանրությունը տեղեկացվել է, որ ՙկեղծ թղթադրամների իրացման դեպք է արձանագրվել նաեւ Շիրակի մարզի Բավրա գյուղի նախկին անասնապահական համալիրի հարակից տարածքում: Պարզվել է, որ 2012թ. մայիսի 26-ին` ժամը 19:00-ի սահմաններում, նշված գյուղի բնակիչ Ա. Մարգարյանից անհայտ անձանց կողմից 6 գառ գնելու եղանակով իրացվել են 10 հատ 20 000 դրամանոց կեղծ ՀՀ թղթադրամներ: Միջոցներ են ձեռնարկվում` կեղծ թղթադրամներ իրացնող անձանց ինքնությունը պարզելու ուղղությամբ՚:
Երկու դեպքի առթիվ էլ հարուցվել է քրեական գործ` ՀՀ քրեական օրենսգրքի 178-րդ հոդվածի (Խարդախություն) 2-րդ մասի 1-ին կետով եւ 202-րդ (Կեղծ փողեր կամ արժեթղթեր պատրաստելը, պահելը կամ իրացնելը) հոդվածի 2-րդ մասի 2-րդ կետով:
Մենք կաշխատենք ուշադրությամբ հետևել այս` առայժմ 2 գործերի վարույթներին եւ երախտապարտ կլինենք իրավապահներին, եթե տեղեկացվենք, որ այդ գործերը միացված են մեկ վարույթում:
Եթե, իհարկե, պարզվի, որ Հայաստանում գործում է կեղծ փողեր պատրաստող, պահող ու իրացնող կազմակերպված խումբ…

Ա. ԱԲԳԱՐՅԱՆ