ԴԻՎԵՐՍԻԱՆ ԱՆՊԱՏԱՍԽԱՆ ՉԻ ՄՆԱ

ԴԻՎԵՐՍԻԱՆ ԱՆՊԱՏԱՍԽԱՆ ՉԻ ՄՆԱ
ՙ
Ադրբեջանը եւս մեկ անգամ ապացուցեց, որ պետական մակարդակով իրականացնում է ահաբեկչության եւ հայաֆոբիայի քաղաքականություն: Դրա վառ ապացույցն այն է, որ ԱՄՆ պետքարտուղարի այցի նախօրեին Ադրբեջանն իրականացնում է ռազմական ավանտյուրա եւ որը, ավելի քան համոզված եմ, որ պլանավորված է ամենաբարձր մակարդակով՚,- անդրադառնալով ադրբեջանական դիվերսիոն խմբի գործողություններին, մեր թղթակցի հետ զրույցում ասաց ԱԺ փոխնախագահ, ՀՀԿ մամլո խոսնակ Էդուարդ Շարմազանովը:
Ադրբեջանական դիվերսիոն խումբը թիկունքից հարձակում է իրականացրել Չինարի գյուղի մերձակա հայկական հենակետերից մեկի ուղղությամբ, ինչի արդյունքում հայկական կողմից 3 զինծառայող զոհվել է, կան 6 վիրավորներ:
Ըստ Է. Շարմազանովի` ՙժամանակն է, որ թե° ԱՄՆ-ը, եւ թե° մյուս երկու համանախագահ երկրներն ամենաբարձր մակարդակով հստակ պատասխան տան նմանատիպ գործողություններին: Ինչքան դու չես դատապարտում հանցագործությունը, այնքան հանցագործն ավելի լկտի է դառնում՚:
ՙՀայկական կողմը բազմիցս հայտարարել է, որ նմանատիպ գործողություններն անպատասխան չեն մնա: Ադրբեջանցիների մտքով թող չանցնի, որ կարող է նմանատիպ ավանտյուրաներով պանիկա սերմանել՚,- ասաց նա:


ՀԻՄԱ ԱՐՍԵՆՅԱՆՆ Է ԲԱԽՇՅԱՆԻ ՏԵՂԸ

Հինգերորդ գումարման Ազգային ժողովի առաջին նիստում Հովիկ Աբրահամյանի ԱԺ նախագահ ընտրվելուց հետո միակ հարց տվողը ԲՀԿ-ի ցուցակով անցած նորաթուխ պատգամավոր Գուրգեն Արսենյանն էր, ով ցածր ձայնով բարձրացրեց նախորդ գումարման ԱԺ-ում պատգամավորների միմյանց փոխարեն քվեարկելու հարցը, ցանկություն հայտնելով, որ այդ ամենը չկրկնվի նորընտիր Ազգային ժողովում: Արսենյանի այդ ելույթից հետո ԱԺ միջանցքներում պատգամավորները հիշում էին, թե նա ժամանակին, երբ պատգամավոր էր, որքան վատ էր հաճախում ԱԺ-ի նիստերին եւ ով խոսի, այդ հարցի վերաբերյալ, գոնե Արսենյանը պետք է լռի, քանի որ իր նմանների պատճառով է որ հաճախ քվորում չի լինում: Ի դեպ, նույն օրը, աշխատանքային օրվա ավարտին, ԱԺ նիստում, երբ Արսենյանն այլեւս չերեւաց եւ մի պահ առաջացավ քվորումի հարց, այդ պահին պատգամավորներից մեկը հիշեց Անահիտ Բախշյանին, ով նախորդ գումարման ԱԺ-ում մշտապես հաշվում էր, թե քանի պատգամավոր կա դահլիճում, իսկ մեկ այլ պատգամավոր էլ կատակով նշեց, որ ներկայիս ԱԺ-ում Բախշյանի հաշվելու գործը իր վրա է վերցնելու Արսենյանը. ՙՀիմա Արսենյանն է Բախշյանի փոխարեն՚:

ԱՐՄԵՆՈՒՀԻ ՀԱԿՈԲՅԱՆ


ՀԵՔԻԱԹ-ՀԵՔԻԱԹ ՀՄԱՅԱԿԸ

Մամուլում արդեն եղել է տեղեկություն, որ ՙճշտով՚ մանդատազուրկ դարձած Հմայակ Հովհաննիսյանը փորձում է հանդիպել ՀՀ նախագահի հետ, սակայն ապարդյուն: Իսկ թե ինչպիսի ՙվարկածով՚ նա ցանկություն ունի հիմա էլ փորձել նետվել ՀՀԿ, մեր ունեցած տեղեկություններով` Հմայակ Հովհաննիսյանը մի ամբողջ ՙկոնսպիրատիվ՚ պատմություն է մոգոնել: Պատմությունը հետեւյալն է` իբր ՙմիասնական շտաբ՚ ստեղծելու գործը Հմայակը նախաձեռնել է, որ եթե ՀՀԿ-ի համար ինչ-որ բարդություններ առաջանան, նա այդ ՙմիասնական շտաբը՚ մտադիր էր ծառայեցնել ի շահ ՀՀԿ-ի:

ՍԵՓ. ԼՐԱՏՎՈՒԹՅՈՒՆ